Skanda Purana · Verses 3.3-2

// rājovāca // //
kiṃ dṛṣṭaṃ bhavatā brahmannāścaryaṃ pathi kutra vā //
tanmamākhyāhi yenāhaṃ kṛtakṛtyatvamāpnuyām

// gautama uvāca // //
gokarṇādahamāgacchankvāpi deśe viśāṃpate //
jāte madhyāhnasamaye labdha vānvimalaṃ saraḥ

tatropaspṛśya salilaṃ vinīya ca pathiśramam //
susnigdhaśītalacchāyaṃ nyagrodhaṃ samupāśrayam

athāvidūre cāṃḍālīṃ vṛddhāmaṃdhāṃ kṛśākṛtim //
śuṣyanmukhīṃ nirāhārāṃ bahuroganipīḍitām

kuṣṭhavraṇaparītāṃgīmudyatkṛmikulākulām //
pūyaśoṇitasaṃsaktajaratpaṭala satkaṭīm

mahāyakṣmagalasthena kaṃṭhasaṃrodhavihvalām //
vinaṣṭadaṃtāmavyaktāṃ viluṭhaṃtīṃ muhurmuhuḥ

caṃḍārkakiraṇaspṛṣṭakharoṣṇarajasāplutām//
viṇmūtrapūyadigdhāṃgīmasṛggaṃdhadurāsadām

kapharogabahuśvāsaślathannāḍībahuvyathām //
vidhvastakeśāvayavāmapaśyaṃ maraṇonmukhīm

tādṛgvyathāṃ ca tāṃ vīkṣya kṛpayāhaṃ pariplutaḥ //
pratīkṣanmaraṇaṃ tasyāḥ kṣaṇaṃ tatraiva saṃsthitaḥ

athāṃtarikṣapadavīṃ siṃcaṃtamiva raśmibhiḥ //
divyaṃ vimānamānītamadrākṣaṃ śivakiṃkaraiḥ

tasminravīṃduvahnīnāṃ tejasāmiva paṃjare //
vimāne sūryasaṃkāśānapaśyaṃ śivakiṃkarān

te vai triśūlakhaṭvāṃgaṭaṃkacarmāsipāṇayaḥ //
caṃdrārdhabhūṣaṇāḥ sāṃdracaṃdrakuṃdoruvarcasaḥ

kirīṭakuṃḍalabhrājanmahāhivalayojjvalāḥ //
śivānugā mayā dṛṣṭā ścatvāraḥ śubhalakṣaṇāḥ

tānāpatata ālokya vimānasthānsuvismitaḥ //
upasṛtyāṃtike vegādapṛcchaṃ gagane sthitān

namonamo vastridaśottamebhyastrilocanaśrīcaraṇānugebhyaḥ //
trilokarakṣāvidhimāvahadbhyastriśūlacarmāsigadādharebhyaḥ

viditā hi mayā yūyaṃ maheśvarapadā nugāḥ //
iyaṃ vo lokarakṣārthā gatirāho vinodajā // /६ //
uta sarvajanāghaughavijayāya kṛtodyamāḥ //
brūta kāruṇyato mahyaṃ yasmādyūyamihāgatāḥ

// śivadūtā ūcuḥ // //
eṣāgre dṛśyate vṛddhā cāṃḍālī maraṇonmukhī //
etāmānetumāyātāḥ saṃdiṣṭā prabhuṇā vayam

ityukte śivadūtaistairapṛcchaṃ punarapyaham //
vismayāviṣṭacittastānkṛtāṃjaliravasthitaḥ

aho pāpīyasī ghorā cāṃḍālī kathamarhati //
divyaṃ vimānamāroḍhuṃ śunīvādhvaramaṃḍalam

ājanmato'śuciprāyā pāpāṃ pāpā nugāminīm //
kathamenāṃ durācārāṃ śivalokaṃ ninīṣatha

asyā nāsti śivajñānaṃ nāsti ghorataraṃ tapaḥ //
satyaṃ nāsti dayā nāsti kathamenāṃ ninīṣatha

paśumāṃsakṛtāhārā vāruṇīpūritodarām //
jīvahiṃsāratāṃ nityaṃ kathamenāṃ ninīṣatha

na ca paṃcākṣarī japtā na kṛtaṃ śivapūjanam//
na dhyāto bhagavāñchaṃbhuḥ kathamenāṃ ninīṣatha

nopoṣitā śivatithirna kṛtaṃ śivapūjanam //
bhūtasauhṛdaṃ na jānāti na ca bilvaśivārpaṇam//
neṣṭāpūrtādikaṃ vāpi kathamenāṃ ninīṣatha

na ca snātāni tīrthāni na dānāni kṛtāni ca //
na ca vratāni cīrṇāni kathamenāṃ ninīṣatha

īkṣaṇe pariharttavyā kimu saṃbhāṣaṇādiṣu //
satsaṃgarahitāṃ caṃḍāṃ kathamenāṃ ninīṣatha

janmāṃtarārjitaṃ kiṃcidasyāḥ sukṛtamasti vā //
tatkathaṃ kuṣṭharogaṇa kṛmibhiḥ paribhūyate

aho īśvaracaryeyaṃ durvibhāvyā śarīriṇām //
pāpātmāno'pi nīyaṃte kāruṇyātparamaṃ padam

ityuktāste mayā dūtā devadevasya śūlinaḥ //
pratyūcurmāmatha prītyā sarvasaṃśayabhedinaḥ

// śivadūtā ūcuḥ // //
brahmansumahadāścaryaṃ śṛṇu kautūhalaṃ yadi //
imāmuddiśya cāṃḍālīṃ yaduktaṃ bhavatādhunā

āsīdiyaṃ pūrvabhave kācidbrāhmaṇakanyakā //
sumitrānāma saṃpūrṇasomabimbasamānanā

utphullamallikādāmasukumārāṃgalakṣaṇā //
kaikeyadvijamukhyasya kasyacittanayā satī

tāṃ sarvalakṣaṇopetāṃ ratermūrtimivāparām//
varddhamānāṃ piturgehe vīkṣyāsanvismitā janāḥ

dinedine vardhamānā baṃdhubhirlālitā bhṛśam //
sā śanairyauvanaṃ bheje smarasyeva mahādhanuḥ

atha sā baṃdhuvargaiśca sametena kumārikā //
pitrā pradattā kasmaicidvidhinā dvijasūnave

sā bharttāramanuprāpya navayauvanaśālinī //
kaṃcitkālaṃ śubhācārā reme baṃdhubhirāvṛtā

atha kālavaśāttasyāḥ patistīvra rujārditaḥ //
rūpayauvanakāṃtopi paṃcatvamagamanmune

mṛte bharttari duḥkhena vidagdhahadayā satī //
uvāsa katicinmāsānsuśīlā vijiteṃ driyā

atha yauvanabhāreṇa jṛṃbhamāṇena nityaśaḥ //
babhūva hṛdayaṃ tasyāḥ kaṃdaparparikaṃpitam

sā guptā bandhuvargeṇa śāsitāpi mahottamaiḥ //
na śaśāka mano roddhaṃ madanākṛṣṭamaṃganā

sā tīvramanmathāviṣṭā rūpayauvanaśālinī //
vidhavāpi viśeṣeṇa jāramārgaratābhavat

na jñātā kenacidapi jāriṇīti vicakṣaṇā //
jugūhātmadurācāraṃ kaṃcitkālamasattamā

tāṃ dohadasamākrāṃtāṃ ghananīlamukhastanīm //
kālena baṃdhuvargopi bubodha viṭadūṣitām

iti bhīto mahākleśācciṃtā lebhe duratyayām //
striyaḥ kāmena naśyaṃti brāhmaṇā hīnasevayā/

rājāno brahmadaṃḍena yatayo bhogasaṃgrahāt//
līḍhaṃ śunā tathaivānnaṃ surayā vārpitaṃ payaḥ

rūpaṃ kuṣṭharujāviṣṭaṃ kulaṃ naśyati kustriyā//
iti sarve samālocya sametāḥ patisodarāḥ

tatyajurgotrato dūraṃ gṛhītvā sakacagraham //
saghaṭotsargamutsṛṣṭā sā nārī sarvabandhubhiḥ// ४८
vicaraṃtī ca śūdreṇa ramamāṇā ratipriyā //
sā yayau strī bahiryāmā dṛṣṭā śūdreṇa kenacit

sa tāṃ dṛṣṭvā varārohām̐ pīnonnatapayodharām //
gṛhaṃ nināya sāmnā ca vidhavāṃ śūdranāyakaḥ //
sā nārī tasya mahiṣī bhūtvā tena divāniśam

ramamāṇā kvaciddeśe nyavasadgṛhavallabhā //
tatra sā piśitāhārā nityamāpītavāruṇī

lebhe sutaṃ ca śūdreṇa ramamāṇā ratipriyā //
kadācidbharttari kvāpi yāte pītasurā tu sā

iyeṣa piśitāhāraṃ madirāmadavihvalā //
atha meṣeṣu baddheṣu gobhiḥ saha bahirvraje

yayau kṛpāṇamādāya sā tamīṃdhe niśāmukhe //
avimṛśya madāveśānmeṣabuddhyāmiṣapriyā

ekaṃ jaghānaṃ govatsaṃ krośaṃtaṃ niśi durbhagā //
nihataṃ gṛhamānīya jñātvā govatsamaṃganā

bhītā śivaśivetyāha kenacitpuṇyakarmaṇā //
sā muhūrtamiti dhyātvā piśitāsavalālasā

chittvā tameva govatsaṃ cakārāhāramīpsitam //
govatsārdhaśarīreṇa kṛtāhārātha sā punaḥ

tadardhadehaṃ nikṣipya bahiścukrośa kaitavāt //
aho vyāghreṇa bhagno'yaṃ jagdho govatsako vraje

iti tasyāḥ samākraṃdaḥ sarvageheṣu śuśruve /
atha sarve śūdrajanāḥ samāgamyāṃtike sthitāḥ

hataṃ govatsamālokya vyāghreṇeti śucaṃ yayuḥ //
gateṣu teṣu sarveṣu vyuṣṭāyāṃ ca tato niśi

tadbhartā gṛhamāgatya dṛṣṭavāngṛhaviḍvaram /
evaṃ bahutithe kāle gate sā śūdvavallabhā // ६१ /
kālasya vaśamāpannā jagāma yamamaṃdiram /
yamopi dharmamālokya tasyāḥ karma ca paurvikam

nirvatrya nirayāvāsāñcakre caṃḍālajātikām //
sāpi bhraṣṭā yamapurāccāṃḍālīgarbhamāśritā

tato babhūva jātyaṃdhā praśāṃtāṃgāramecakā //
tatpitā kopi cāṃḍālo deśe kutracidāsthitaḥ

tāṃ tādṛśīmapi sutāṃ kṛpayā paryapoṣayat //
abhojyena kadannena śunā līḍhena pūtinā

apeyaiśca rasairmātrā poṣitā sā dinedine //
jātyaṃdhā sāpi kālena bālye kuṣṭharujārditā

ūḍhā na kenacidvāpi cāṃḍālenātidurbhagā //
atītabālye sā kāle vidhvastapitṛmātṛkā

durbhageti parityaktā baṃdhubhiśca sahodaraiḥ //
tataḥ kṣudhārditā dīnā śocantī vigatekṣaṇā

gṛhītayaṣṭiḥ kṛcchreṇa saṃcacāla saloṣṭikā //
pattaneṣvapi sarveṣu yācamānā dinedine

cāṃḍālocchiṣṭapiṃḍena jaṭharāgnimatarpayat//
evaṃ kṛcchreṇa mahatā nītvā subahulaṃ vayaḥ

jarayā grastasarvāṃgī duḥkhamāpa duratyayam //
nirannapānavasanā sā kadācinmahājanān

āyāsyaṃtyāṃ śivatithau gacchato bubudhe'dhvagān//
tasyāṃ tu devayātrāyāṃ deśadeśāṃtayāyinām

viprāṇāṃ sāgnihotrāṇāṃ sastrīkāṇāṃ mahātmanām//
rājñāṃ ca sāvarodhānāṃ sahastirathavājinām

saparīvāraghoṣāṇāṃ yānacchatrādiśobhinām //
tathānyeṣāṃ ca viṭśūdrasaṃkīrṇānāṃ sahasraśaḥ

hasatāṃ gāyatāṃ kvāpi nṛtyatāmatha dhāvatām //
jighratāṃ pibatāṃ kāmādgacchatāṃ pratigarjatām

/
saṃprayāṇe manuṣyāṇāṃ saṃbhramaḥ sumahānabhūt //
iti sarveṣu gacchatsu gokarṇaṃ śivamaṃdiram

paśyaṃti divijāḥ sarve vimānasthāḥ sakautukāḥ //
atheyamapi cāṃḍālī vasanāśanatṛṣṇayā

mahājanānyācayituṃ cacāla ca śanaiḥśanaiḥ //
karāvalaṃbenānyasyāḥ prāgjanmārjitakarmaṇā //
dinaiḥ katipayairyātī gokarṇaṃ kṣetramāyayau

tato vidūre mārgasya niṣaṇṇā vivṛtāṃjaliḥ //
yācamānā muhuḥ pāṃthānbabhāṣe kṛpaṇaṃ vacaḥ

prāgjanmārjitapāpaughaiḥ pīḍitāyāściraṃ mama //
āhāramātradānena dayāṃ kuruta bho janāḥ

trātāraḥ paramārtānāṃ dātāraḥ paramāśiṣām //
kartāro bahupuṇyānāṃ dayāṃ kuruta bho janāḥ // ra१ //
vasanāśanahīnāyāṃ svapitāyāṃ mahītale //
mahāpāṃsunimagnāyāṃ dayāṃ kuruta bho janāḥ

mahāśītātapārttāyāṃ pīḍitāyāṃ mahārujā //
andhāyāṃ mayi vṛddhāyāṃ dayāṃ kuruta bho janāḥ

ciropavāsadīptāyāṃ jaṭharāgnivivardhanaiḥ //
saṃdahyamānasarvāṃgyāṃ dayāṃ kuruta bho janāḥ

anupārjitapuṇyāyāṃ janmāṃtaraśateṣvapi //
pāpāyāṃ maṃdabhāgyāyāṃ dayāṃ kuruta bho janāḥ

evamabhyarthayaṃtyāstu cāṃḍālyāḥ prasṛteṃ'jalau //
ekaḥ puṇyatamaḥ pāṃthaḥ prākṣipadbilvamaṃjarīm

tāmaṃcalau nipatitāṃ sā vimṛśya punaḥ punaḥ //
abhakṣyetyeva matvātha dūre prākṣipadāturā

tasyāḥ kareṇa nirmuktā rātrau sā bilvamaṃjarī //
papāta kasyaciddiṣṭyā śivaliṃgasya mastake

saivaṃ śivacaturdaśyāṃ rātrau pāṃthajanānmuhuḥ //
yācamānāpi yatkiṃcinna lebhe daivayogataḥ

tatroṣitānayā rātrirbhadrakālyāstu pṛṣṭhataḥ //
kiṃciduttarataḥ sthānaṃ tadardhenātidūrataḥ

tataḥ prabhāte bhraṣṭāśā śokena mahatāplutā //
śanairnivavṛte dīnā svadeśāyaiva kevalā

śrāṃtā ciropavāsena nipatantī padepade //
kraṃdaṃtī vahurogārtā vepamānā bhṛśāturā

dahyamānārkatāpena nagnadehā sayaṣṭikā//
atītyaitāvatīṃ bhūmiṃ nipapāta vicetanā

atha viśveśvaraḥ śaṃbhuḥ karuṇāmṛtavāridhiḥ//
enāmānayatettyasmānyuyuje savimānakān

eṣā pravṛttiścāṃḍālyāstaveha parikīrttitā//
tathā saṃdarśitā śaṃbhoḥ kṛpaṇeṣu kṛpālutā//
karmaṇaḥ paripākotthāṃ gatiṃ paśya mahāmate //
adhamāpi paraṃ sthānamārohati nirāmayam

yadetayā pūrvabhave nānnadānādikaṃ kṛtam //
kṣutpipāsādibhiḥ kleśaistasmādiha nipīḍyate

yadeṣā madavegāṃdhā cakre pāpaṃ maholbaṇam//
karmaṇā tena jātyaṃdhā babhūvātraiva janmani

api vijñāya govatsaṃ yadeṣā'bhakṣayatpurā //
karmaṇā tena cāṃḍālī babhūveha vigarhitā

yadeṣāryapathaṃ hitvā jāramārgaratā purā //
tena pāpena kenāpi durvṛttā durbhagāpi vā //

yadāśliṣya madāviṣṭā jāreṇa vidhavā purā //
tena pāpena mahatā bahukuṣṭhavraṇānvitā

kāmārttā yadiyaṃ svairaṃ śūdreṇa ramitā purā //
mahāsṛkpūyakṛmibhiḥ pīḍyate tena pāpmanā

suvratāni na cīrṇāni neṣṭāpūtārdikaṃ kṛtam //
sarvabhogavihīneyaṃ dūyate tena pāpmanā //

yadetayā pūrvabhave surā pītā vimūḍhayā //
mahāyakṣmārtihṛcchūlaiḥ pīḍyate tena pāpmanā

atraiva sarvamartyeṣu pāpacihnāni kṛtsnaśaḥ //
lakṣyate muniśārdūla savivekairmahātmabhiḥ

atra ye bahurogārttā ye putradhanavarjitāḥ

ye ca durlakṣaṇakliṣṭā yācakā vigatahriyaḥ //
vāsonnapānaśayanabhūṣaṇābhyaṃjanādibhiḥ

hīnā virūpā nirvidyā vikalāṃgāḥ kubhojanāḥ //
ye durbhāgyā niṃditāśca ye cānye parasevakāḥ //

ete pūrvabhave sarve sumahatpāpakāriṇaḥ //
evaṃ vimṛśya yatnena dṛṣṭvā lokajanasthitim

budho na kurute pāpaṃ yadi kuryātsa ātmahā //
deho'yaṃ mānuṣo jaṃtorbahukarmaikabhājanam

sadā satkarma seveta duṣkarma satataṃ tyajet //
puṇyaṃ sukhārthī kurvīta duḥkhārthī pāpamācaret //

dvayorekatare loke gṛhīte kuśalo janaḥ //
imaṃ mānuṣamāśritya dehaṃ paramadurlabham

ya ātmahitavānkaściddevamekaṃ samāśrayet //
atha pāpāni sarvāṇi kurvannapi sadā naraḥ

śivamekamatirdhyāyetsa saṃtarati pātakam //
mṛtā pūrvabhave tveṣā yadā prāptā yamālaye

tadā vitarkaḥ sumahānāsīdyamasabhāsadām //
yadyapi brāhmaṇī tveṣā satkulācāradūṣitā

ato'smābhirihānītā nirayaṃ yātu vā na vā //
anayā sādhito bālye puṇyaleśo'sti vā na vā

athāpi suvimṛśyaivaṃ dhāryo daṃḍo'tra nānyathā //
bahujanmasahasreṣu kṛtapuṇyavipākataḥ//

nṛṇāṃ brahmakule janma labhyate hi kathaṃcana //
atosyāḥ pūrvapūrveṣu kṛtāghaṃ nāsti janmasu

anyathā satkule janma kathameṣā prapadyate//
atraiva janmanyanayā kṛtamaṃho duratyayam

athāpi narakāvāsaṃ prāyaśo neyamarhati //
kiṃtu govatsakaṃ hatvā vimṛśyāgatasādhvasā

eṣā śivaśivetyāha prāgjanmārjitakarmaṇā //
yadeṣā pāpavicchittyai sakṛdapyurumaṃgalam

śivanāma vadedbhaktyā tarhi gacchetparaṃ padam //
ekajanmakṛtasyāsya dāruṇasyāpi yatphalam

krameṇānubhavatveṣā bhūtvā cāṃḍālajātikā //
asmādanyatamaḥ ko vā narako'sti nṛṇā miha

anekakleśasaṃghātairyanmuhuḥ paripīḍanam //
duṣkule janma dāridryaṃ mahāvyādhirvimūḍhatā

ekaika eva narakaḥ sarve vā cātha kiṃ punaḥ //
prāgjanmapuṇyabhāreṇa yannāma vivaśā'bravīt

tenaiṣānyabhave bhūri puṇyamaṃte kariṣyati //
tena puṇyena mahatā nistīryāghaughayā tanāḥ

nītā tatpuruṣairaṃte prayāsyati paraṃ padam //
etādṛśānāṃ martyānāṃ śāstāro na vayaṃ kvacit //
vicārya svayameveśo yadyuktaṃ tatkarotu saḥ

evaṃ vaivasvatapure sarvairyamapurogamaiḥ //
vimṛśya citraguptādyairiyaṃ muktā'patadbhuvi

ādau yadeṣā śivanāma nārī pramādato vāpya satī jagāda //
teneha bhūyaḥ sukṛtena śaṃbhorbilvāṃkurārādhanapuṇyamāpa

śrīgokarṇe śivatithāvupoṣya śivamastake //
kṛtvā jāgaraṇaṃ hyeṣā cakre bilvārpaṇaṃ niśi

akāmataḥ kṛtasyāsya puṇyasyaiva ca yatphalam //
adyaiva bhokṣyate seyaṃ paśyatastava no mṛṣā

//
// gautama uvāca // //
ityuktvā śivadūtāste tasyāścāṃḍālayonitaḥ //
jīvaleśaṃ samākṛṣya yuyujurdivyatejasā

tāṃ divyadehasaṃkrāṃtāṃ tejorāśisamujjvalām//
vimāne sthāpayāmāsuḥ prītāste śivakiṃkarāḥ

atha sā paramodārarūpalāvaṇyaśālinī //
divyabhūṣaṇadīptāṃgī divyāṃbaravidhāriṇī

dehena divyagaṃdhena divyatejovikāśinā //
divyamālyāvataṃsena virarāja vimānagā

ratnacchatrapatākādyairgītavāditranisvanaiḥ //
madhye sā śivadūtānāṃ modamānā varānanā

anubhūtāni janmāni smṛtvāsmṛtvā punaḥpunaḥ //
bhītā trastā dṛḍhā ścaryaṃ dṛṣṭvā svapnamivotthitā

kāhaṃ ke'mī mahāsiddhāḥ koyaṃ loko manoramaḥ //
kva gataṃ me vapuḥ kaṣṭaṃ caṃḍacāṃḍālagotrajam

aho sumahadāścaryaṃ dṛṣṭaṃ māyāvilāsajam //
yanme bhavasahasreṣu bhrātaṃbhrāṃtaṃ punaḥpunaḥ

aho īśvarapūjāyā māhātmyaṃ vismayāvaham //
patramātreṇa saṃtuṣṭo yo dadāti nijaṃ padam

iti tāṃ jātanirvedāṃ smarantīṃ bhagavatpadam //
divyaṃ vimānamāropya te maheśvarakiṃkarāḥ //

ālokayatsu sarveṣu lokeśeṣu savismayam //
āmaṃtrya tāmathāninyuḥ parameśvarasannidhim

rājansumahadāścaryamākhyātaṃ girijā pateḥ //
māhātmyaṃ bhaktileśasya sarvāghaughavināśanam

// rājovāca // //
bhagavanparameśasya kīdṛśo loka uttamaḥ //
tasya me lakṣaṇaṃ brūhi yadyasti mayi te dayā

// gautama uvāca // //
brahmādisuranāthānāṃ lokeṣvapi sudurlabhaḥ //
ya ānaṃdaḥ sadā yatra sa lokaḥ pārameśvaraḥ

sarvātigamanaṃ yatra jyotiryatra pratiṣṭhitam //
kvāpi nāsti tamoyogaḥ sa lokaḥ pārameśvaraḥ

guṇavṛtti vinistīrya saṃprāptā yatra yoginaḥ //
na pateyuḥ punaḥ sarve sa lokaḥ pārameśvaraḥ

yatra vāsaṃ na kurvaṃti krodhalobhamadādayaḥ //
yatrāvasthā na janmādyāḥ sa lokaḥ pārameśvaraḥ

sarveṣāṃ nigamānāṃ ca yadekaṃ kṣetramucyate //
yasmānnāsti paraṃ vittaṃ tatpadaṃ pārameśvaram

pratyāhārāsana dhyānaprāṇasaṃyamanādibhiḥ //
yatra yogapathaiḥ prāptuṃ yatate yoginaḥ sadā

yatra devaḥ sadānaṃdanirmalajñānarūpayā //
asti devyā saha krīḍañsa lokaḥ pārameśvaraḥ

janmānekasahasreṣu saṃbhṛtaiḥ puṇyarāśibhiḥ //
ārūḍhāḥ puruṣā nāryaḥ krīḍante yatra saṃgatāḥ

tejo rāśau samālīnā durvibhāvye manorame //
ahorātrādisaṃsthānaṃ na viṃdaṃti kadācana

sa lokaḥ parameśasya durlabho hi kuyoginaḥ //
etadbhakti supūrṇā ye taireva pratipadyate

ye tatkathāśravaṇakīrtanajātaharṣā ye sarvabhūtasuhṛdaḥ praśamaikaniṣṭhāḥ //
saṃsāracakramativāhya nirastamohāste śāṃkaraṃ padamavāpya sukhaṃ ramante

tathā tvamapi rājeṃdra gokarṇaṃ giriśālayam //
gatvā praśamitāghaughaḥ kṛtakṛtyatvamāpnuhi

tatra sarveṣu kāleṣu snātvābhyarcya mahābalam //
kṛtvā śivacaturdaśyāmupavāsaṃ samāhitaḥ

kṛtvā jāgaraṇaṃ rātrau bilvairabhyarcya śaṃkaram //
sarvapāpavinirmuktaḥ śivalokamavāpsyasi

eṣa te vimalo rājannupadeśo mayā kṛtaḥ //
svasti te'stu gamiṣyāmi mithilādhipateḥ purīm

ityāmantrya muniḥ prītyā gautamo mithilāṃ yayau //
so'pi hṛṣṭamanā rājā gokarṇaṃ pratyapadyata

tatra dṛṣṭvā mahādevaṃ snātvābhyarcya mahābalam //
nirdhūtāśeṣapāpaugho lebhe śambhoḥ paraṃ padam

ya imāṃ śṛṇuyānnityaṃ kathāṃ śaivīṃ manoharām //
śrāvayedvā jano bhaktyā sa yāti paramāṃ gatim

śraddadhānaḥ sakṛdvāpi ya imāṃ śṛṇuyātkathām //
triḥsaptakulajaiḥ sārdhaṃ śivalokamavāpnuyāt

iti kathitamaśeṣaṃ śreyasāmādibījaṃ bhavaśataduritaghnaṃ dhvastamohāṃdhakāram //
caritamamarageyaṃ manmathārerudāraṃ satatamapi niṣevyaṃ svastimadbhiśca lokaiḥ //

iti śrīskānde mahāpurāṇa ekāśītisāhasryāṃ saṃhitāyāṃ tṛtīye brahmottarakhaṇḍe śivacaturdaśīgokarṇamāhātmyavarṇanaṃnāma tṛtīyo'dhyāyaḥ //