Skanda Purana · Chapter 3.22

// yudhiṣṭhira uvāca // //
sthānavāsinyo yoginyaḥ kājeśena vinirmitāḥ //
kasminsthāne hi kā devyaḥ kīdṛśyastā vadasva me

// vyāsa uvāca // //
sarvajñosi kulīnosi sādhu pṛṣṭaṃ tvayānagha //
kathayiṣyāmyahaṃ sarvamakhilena yudhiṣṭhira

nānābharaṇabhūṣāḍhyā nānāratnopaśobhitāḥ //
nānāvasanasaṃvītā nānāyuvasamanvitāḥ

nānāvāhanasaṃyuktā nānāsvaraninādinīḥ //
bhayanāśāya viprāṇāṃ kājeśena vinirmitāḥ

prācyāṃ yāmyāmudīcyāṃ ca pratīcyāṃ sthāpitā hi tāḥ //
āgneyā nairṛte deśe vāyavyeśānayostathā

āśāpurī ca gātrāī chatrāī jñānajā tathā //
pippalāṃbā tathā śāṃtā siddhā bhaṭṭārikā tathā

kadaṃbā vikaṭā mīṭhā suparṇā vasujā tathā //
mātaṃgī ca mahādevī vārāhī mukuṭeśvarī

bhadrā caiva mahāśaktiḥ siṃhārā ca mahābalā //
etāścānyāśca bahavaḥ kathituṃ naiva śakyate

nānārūpadharā devyo nānāveṣasamāśritāḥ //
sthānāduttaradigbhāge āśāpūrṇāsamīpataḥ

pūrve tu vidyate devī ānaṃdānaṃdadāyinī //
vasaṃtī cottare devyo nānārūpadharā mudā

iṣṭānkāmāndadātyetā jaladānena tarpitāḥ //
sthāne nairṛtidigbhāge śāṃtā śāṃtipradāyinī

siṃhopari samāsīnā caturhastā varapradā //
bhaṭṭārī ca mahāśaktiḥ punastatraiva tiṣṭhati

saṃstutā pūjitā bhaktyā bhaktānāṃ bhayanāśinī //
sthānāttu saptame krośe kṣemalābhā vyava sthitā

sā vilepamayī pūjyā ciṃtitā siddhidāyinī //
pūrvasyāṃ diśi lokaistu balidānena tarpitā //
parivāreṇa saṃyuktā bhuktimukti pradāyinī

aciṃtyarūpacaritā sarvaśatruvināśanī //
saṃdhyāyāstriṣu kāleṣu pratyakṣaiva hi dṛśyate

sthānāttu saptame krośe dakṣiṇā vindhyavāsinī //
sāyudhā rūpasaṃpannā bhaktānāṃ bhayahāriṇī

paścime niṃbajā devī tāvadbhūmisamāśritā //
mahābalā sā dṛṣṭāpi nayanānanda dāyinī

sthānāduttaradigbhāge tāvadbhūmisamāśritā //
śaktirbahusuvarṇākṣā pūjitā sāsuvarṇadā

sthānādvāyavyakoṇe ca krośamātra mite śritā //
kṣetradharā mahādevī samaye cchāgadhāriṇī

purāduttaradigbhāge krośamātre tu karṇikā //
sarvopakāraniratā sthānopadravanāśanī

sthānānnirṛtidigbhāge brahmāṇīpramukhāstathā //
nānārūpadharā devyo vidyaṃte jalamātaraḥ

iti śrīskāṃde mahāpurāṇa ekāśīti sāhasryāṃ saṃhitāyāṃ tṛtīye brahmakhaṇḍe pūrvabhāge dharmāraṇyamāhātmye devatāsthāpanaṃnāma dvāviṃśo'dhyāyaḥ