સ્કંદ પુરાણ · અધ્યાય 3.22

॥ યુધિષ્ઠિર ઉવાચ ॥ ॥
સ્થાનવાસિન્યો યોગિન્યઃ કાજેશેન વિનિર્મિતાઃ ॥
કસ્મિન્સ્થાને હિ કા દેવ્યઃ કીદૃશ્યસ્તા વદસ્વ મે

॥ વ્યાસ ઉવાચ ॥ ॥
સર્વજ્ઞોસિ કુલીનોસિ સાધુ પૃષ્ટં ત્વયાનઘ ॥
કથયિષ્યામ્યહં સર્વમખિલેન યુધિષ્ઠિર

નાનાભરણભૂષાઢ્યા નાનારત્નોપશોભિતાઃ ॥
નાનાવસનસંવીતા નાનાયુવસમન્વિતાઃ

નાનાવાહનસંયુક્તા નાનાસ્વરનિનાદિનીઃ ॥
ભયનાશાય વિપ્રાણાં કાજેશેન વિનિર્મિતાઃ

પ્રાચ્યાં યામ્યામુદીચ્યાં ચ પ્રતીચ્યાં સ્થાપિતા હિ તાઃ ॥
આગ્નેયા નૈરૃતે દેશે વાયવ્યેશાનયોસ્તથા

આશાપુરી ચ ગાત્રાઈ છત્રાઈ જ્ઞાનજા તથા ॥
પિપ્પલાંબા તથા શાંતા સિદ્ધા ભટ્ટારિકા તથા

કદંબા વિકટા મીઠા સુપર્ણા વસુજા તથા ॥
માતંગી ચ મહાદેવી વારાહી મુકુટેશ્વરી

ભદ્રા ચૈવ મહાશક્તિઃ સિંહારા ચ મહાબલા ॥
એતાશ્ચાન્યાશ્ચ બહવઃ કથિતું નૈવ શક્યતે

નાનારૂપધરા દેવ્યો નાનાવેષસમાશ્રિતાઃ ॥
સ્થાનાદુત્તરદિગ્ભાગે આશાપૂર્ણાસમીપતઃ

પૂર્વે તુ વિદ્યતે દેવી આનંદાનંદદાયિની ॥
વસંતી ચોત્તરે દેવ્યો નાનારૂપધરા મુદા

ઇષ્ટાન્કામાન્દદાત્યેતા જલદાનેન તર્પિતાઃ ॥
સ્થાને નૈરૃતિદિગ્ભાગે શાંતા શાંતિપ્રદાયિની

સિંહોપરિ સમાસીના ચતુર્હસ્તા વરપ્રદા ॥
ભટ્ટારી ચ મહાશક્તિઃ પુનસ્તત્રૈવ તિષ્ઠતિ

સંસ્તુતા પૂજિતા ભક્ત્યા ભક્તાનાં ભયનાશિની ॥
સ્થાનાત્તુ સપ્તમે ક્રોશે ક્ષેમલાભા વ્યવ સ્થિતા

સા વિલેપમયી પૂજ્યા ચિંતિતા સિદ્ધિદાયિની ॥
પૂર્વસ્યાં દિશિ લોકૈસ્તુ બલિદાનેન તર્પિતા ॥
પરિવારેણ સંયુક્તા ભુક્તિમુક્તિ પ્રદાયિની

અચિંત્યરૂપચરિતા સર્વશત્રુવિનાશની ॥
સંધ્યાયાસ્ત્રિષુ કાલેષુ પ્રત્યક્ષૈવ હિ દૃશ્યતે

સ્થાનાત્તુ સપ્તમે ક્રોશે દક્ષિણા વિન્ધ્યવાસિની ॥
સાયુધા રૂપસંપન્ના ભક્તાનાં ભયહારિણી

પશ્ચિમે નિંબજા દેવી તાવદ્ભૂમિસમાશ્રિતા ॥
મહાબલા સા દૃષ્ટાપિ નયનાનન્દ દાયિની

સ્થાનાદુત્તરદિગ્ભાગે તાવદ્ભૂમિસમાશ્રિતા ॥
શક્તિર્બહુસુવર્ણાક્ષા પૂજિતા સાસુવર્ણદા

સ્થાનાદ્વાયવ્યકોણે ચ ક્રોશમાત્ર મિતે શ્રિતા ॥
ક્ષેત્રધરા મહાદેવી સમયે ચ્છાગધારિણી

પુરાદુત્તરદિગ્ભાગે ક્રોશમાત્રે તુ કર્ણિકા ॥
સર્વોપકારનિરતા સ્થાનોપદ્રવનાશની

સ્થાનાન્નિરૃતિદિગ્ભાગે બ્રહ્માણીપ્રમુખાસ્તથા ॥
નાનારૂપધરા દેવ્યો વિદ્યંતે જલમાતરઃ

ઇતિ શ્રીસ્કાંદે મહાપુરાણ એકાશીતિ સાહસ્ર્યાં સંહિતાયાં તૃતીયે બ્રહ્મખણ્ડે પૂર્વભાગે ધર્મારણ્યમાહાત્મ્યે દેવતાસ્થાપનંનામ દ્વાવિંશોઽધ્યાયઃ