Skanda Purana · Verses 3.21-3

// śrīsūta uvāca // //
jaṭā tīrthābhidhe tīrthe sarvapātakanāśane //
snānaṃ kṛtvā viśuddhātmā lakṣmītīrthaṃ tato vrajet

yaṃyaṃ kāmaṃ samuddiśya lakṣmītīrthe dvijottamāḥ //
snānaṃ samācarenmartyastaṃtaṃ kāmaṃ samaśnute

mahādāridryaśamanaṃ mahādhānyasamṛddhidam //
mahāduḥkhapraśamanaṃ mahāsaṃpadvivardhanam

atra snātvā dharmaputro mahadaiśvaryamāptavān //
indraprasthe vasanpūrvaṃ śrīkṛṣṇena pracoditaḥ

// ṛṣaya ūcuḥ // //
yathaiśvaryaṃ dharmaputro lakṣmītīrthe nimajjanāt //
āptavānkṛṣṇavacanāttanno brūhi mahāmune

// śrīsūta uvāca // //
indraprasthe purā viprā dhṛtarāṣṭreṇa coditāḥ //
nyavasanpāṃḍavāḥ paṃca mahābalaparākramāḥ

indraprasthaṃ yayau kṛṣṇaḥ kadācittānnirīkṣitum //
tamāgatamebhiprekṣya pāṃḍavāste samutsukāḥ

svagṛhaṃ prāpayāmāsurmudā paramayā yutāḥ //
kañcitkālamasau kṛṣṇastatrāvātsītpurottame

kadācitkṛṣṇamāhūya pūjayitvā yudhiṣṭhiraḥ //
papraccha puṃḍarīkākṣaṃ vāsudevaṃ jagatpatim

// yudhiṣṭhira uvāca // //
kṛṣṇakṛṣṇa mahāprājña yena dharmeṇa mānavāḥ //
labhaṃte mahadaiśvaryaṃ tanno brūhi mahāmate //
ityukto dharmaputreṇa kṛṣṇaḥ prāha yudhiṣṭhiram

// śrīkṛṣṇa uvāca // //
dharmaputra mahābhāga gandhamādanaparvate

lakṣmī tīrthamiti khyātamastyaiśvaryaikakāraṇam //
tatra snānaṃ kuruṣva tvamaiśvaryaṃ te bhaviṣyati

tatra snānena vardhaṃte dhanadhānyasamṛddhayaḥ //
sarve sapatnā naśyaṃti kṣātrameṣāṃ vivarddhate

tīrthe sasnuḥ purā devā lakṣmīnāmani puṇyade //
alabhantsarvamaiśvaryaṃ tena puṇyena dharmaja

asurāṃśca mahāvīryānsamare jaghnuraṃjasā //
mahī lakṣmīśca dharmaśca tattīrthasnāyināṃ nṛṇām

bhaviṣyatyacirādeva saṃśayaṃ mā kṛthā iha //
tapobhiḥ kratubhirdānairāśīrvādaiśca pāṃḍava

aiśvaryaṃ prāpyate yadvallakṣmītīrthanimajjanāt //
sarvapāpāni naśyaṃti viprā yāṃti layaṃ sadā //

vyādhayaśca vinaśyaṃti lakṣmītīrthaniṣevaṇāt //
śreyaḥ suvipulaṃ loke labhyate nātra saṃśayaḥ

snānamātreṇa vai lakṣmyāstīrthe'smi ndharmanaṃdana //
raṃbhāmapsarasāṃ śreṣṭhāṃ labdhavānavadho nṛpaḥ

snātvātra tīrthe puṇye tu kubero naravāhanaḥ //
sa mahāpadmamukhyānāṃ nidhīnāṃ nāyako' bhavat

/
tasmāttvamapi rājeṃdra lakṣmītīrthe śubhaprade //
snātvā vṛkodaramukhairanujairapi saṃvṛtaḥ

lapsyase mahatīṃ lakṣmīṃ jeṣyase ca ripūnapi//
saṃdeho nātra kartavyaḥ paitṛṣvaseya dharmaja

ityukto dharmaputro'yaṃ kṛṣṇenādbhutadarśanaḥ //
sānujaḥ prayayau śīghraṃ gandhamādanaparvatam

lakṣmī tīrthaṃ tato gatvā mahadaiśvaryakāraṇam //
sasnau yudhiṣṭhirastatra sānujo niyamānvitaḥ

lakṣmatīrthasya toye sa sarvapātakanāśane //
sānujo māsamekaṃ tu sasnau niyamapūrvakam

gobhūtilahiraṇyādīnbrāhmaṇebhyo dadau bahūn //
sānujo dharmaputro'sāviṃdraprasthaṃ yayau tataḥ

rājasūyakratuṃ kartuṃ tata ecchadyudhiṣṭhiraḥ //
kṛṣṇaṃ samāhvayāmāsa yiyakṣurdharmanaṃdanaṃ

kṛṣṇo dharmajadūtena samāhūtaḥ sasaṃbhramaḥ //
caturbhiraśvaiḥ saṃyuktaṃ rathamā ruhya veginam

satyabhāmāsahacara iṃdraprasthaṃ samāyayau //
tamāgataṃ samālokya pramodāddharmanaṃdanaḥ

nyavedayatsa kṛṣṇāya rājasūyodyamaṃ tadā //
anvamanyata kṛṣṇopi tathaiva kriyatāmiti

vākyaṃ ca yuktisaṃyuktaṃ dharmaputramabhāṣata //
paitṛṣvasreya dharmātmañcchṛṇu pathyaṃ vaco mama //

duṣkaro rājasūyo'yaṃ sarvairapi mahīśvaraiḥ //
anekaśatapādātarathakuṃjaravājimān

mahīpatirimaṃ yajñaṃ kartumarhati netaraḥ //
diśo daśa vijetavyā prathamaṃ valinā tvayā

parājitebhyaḥ śatrubhyo gṛhītvā karamuttamam //
tena kāṃcanajātena kartavyo'yaṃ kratūttamaḥ

rocaye yuktividahaṃ na hi tvāṃ bhīṣayāmi bhoḥ //
ataḥ kratusamāraṃbhātpūrvaṃ digvijayaṃ kuru

tato dharmātmajaḥ śrutvā kṛṣṇasya vacanaṃ hitam //
praśaṃsandevakīputramājuhāva nijānujān

āhūya caturo bhrātṝndharmajaḥ prāha harṣayan //
ayi bhīma mahābāho bahuvīrya dhanaṃjaya

yamau ca sukumāgaṃgau śatrusaṃhāradīkṣitau //
cikīrṣāmi mahāyajñaṃ rājasūyamanuttamam

sa ca sarvānraṇe jitvā kartavyaḥ pṛthivīpatīn //
ato vijetuṃ bhūpālāṃścatvaro'pi sasainikāḥ

diśaścatasro gacchaṃtu bhavaṃto vīryavattarāḥ //
yuṣmābhirāhatairdravyaiḥ kariṣyāmi mahākratum

ityuktāḥ sādaraṃ sarve vṛkodaramukhāstadā //
prasannavadanā bhūtvā dharmaputrānujāḥ purāt

rājñāṃ jayāya sarvāsu niryayurdikṣu pāṃḍavāḥ //
te sarve nṛpatīñjitvā caturdikṣu sthitānbahūn

svavaśe sthāpayitvā tānnṛpatīnpāṃḍunaṃdanāḥ //
tairdattaṃ bahudhā dravyamasaṃkhyātamanuttamam

ādāya svapuraṃ tūrṇamāyayuḥ kṛṣṇasaṃśrayāḥ //
bhīmaḥ samāyayau tatra mahābalaparākramaḥ

śatabhārasuvarṇāni samādāya purottamam //
sahasraṃ bhāramādāya suvarṇānāṃ tato'rjunaḥ

śakraprasthaṃ samāyāto mahābalaparākramaḥ //
śatabhāraṃ suvarṇānāṃ pragṛhya nakulastathā

samāgato mahātejāḥ śakraprasthaṃ purottamam //
dattānvibhīṣaṇenātha svarṇatālāṃścaturdaśa

dākṣiṇātyamahīpānāṃ gṛhītvā dhanasaṃcayam //
sahadevopi sahasā samā yāto nijāṃ purīm

lakṣakoṭisahasrāṇi lakṣakoṭiśatānyapi //
suvarṇāni dadau kṛṣṇo dharmaputrāya yādavaḥ

svānujairāhṛtairevamasaṃ khyātairmahādhanaiḥ //
kṛṣṇadattairasaṃkhyātairdhanairapi yudhiṣṭhiraḥ

kṛṣṇāśrayo'yajadviprā rājasūyena pāṃḍavaḥ //
tasminyāge dadau dravyaṃ brāhmaṇebhyo yatheṣṭataḥ

annāni pradadau tatra brāhmaṇebhyo yudhiṣṭhiraḥ //
vastrāṇi gāśca bhūmiṃ ca bhūṣaṇāni dadau tathā

arthinaḥ parituṣyaṃti yāvatā kāṃcanādinā //
tatopi dviguṇaṃ tebhyo dāpayāmāsa dharmajaḥ

iyaṃti dattānyarthibhyo dhanāni vividhānyapi //
itīyattāṃ paricchettuṃ na śaktā brahmakoṭayaḥ

arthibhirdīyamānāni dṛṣṭvā tatra dhanāni vai //
sarvasvamapyaho rājñā dattamityabravījjanaḥ

dṛṣṭvā kośāstathā naṃtānanaṃtamaṇikāṃcanān

svalpaṃ hi dattamarthibhya ityavocañjanāstadā //
iṣṭvaivaṃ rājasūyena dharmaputraḥ sahānujaḥ

bahuvittasamṛddhaḥ sanreme tatra purottame //
lakṣmītīrthasya māhātmyāddharmaputro yudhiṣṭhiraḥ

lebhe sarvamidaṃ viprā aho tīrthasya vaibhavam //
idaṃ tīrthaṃ mahāpuṇyaṃ mahā dāridyanāśanam

dhanadhānyapradaṃ puṃsāṃ mahāpātakanāśanam //
mahānarakasaṃhartṛ mahāduḥkhanivartakam

mokṣadaṃ svargadaṃ nityaṃ mahāṛṇa vimocanam //
sukalatrapradaṃ puṃsāṃ suputrapradameva ca

etattīrthasamaṃ tīrthaṃ na bhūtaṃ na bhaviṣyati //
etadvaḥ kathitaṃ viprā lakṣmītīrthasya vaibhavam

duḥsvapnanāśanaṃ puṇyaṃ sarvābhīṣṭaprasādhakam //
yaḥ paṭhedimamadhyāyaṃ śṛṇute vā sabhaktikam

dhanadhānyasamṛddhaḥ syātsa naro nāsti saṃśayaḥ //
bhuktveha sakalānbhogāndehāṃte muktimāpnuyāt

iti śrīskāṃde mahāpurāṇa ekāśītisāhasyā saṃhitāyāṃ tṛtīye brahmakhaṇḍe setumāhātmye lakṣmītīrthapraśaṃsāyāṃ dharmaputraniratiśayasaṃpadavāptivarṇanaṃnāmaikaviṃśo'dhyāyaḥ