Skanda Purana · Verses 2.6-7

// atha bakulamālikāṃ prati sakhīviniveditapadmāvatyudantaḥ //
// yoṣita ūcuḥ // //
vayamākāśarājasya śuddhāntanilayāḥ striyaḥ //
sakhyaḥ padmālayāyā vai duhiturvasudhāpateḥ

rājaputrīṃ puraskṛtya gatāḥ pūrvaṃ vanāṃtaram //
kurvaṃtyaḥ puṣpāvacayaṃ rājaputryarthamākulāḥ

vṛkṣamūle samāsīnāstatra paśyāma pūruṣam //
indranīlamaṇiśyāmamindirāmandirorasam

īṣatsmitamukhaṃ cārupīnadīrghabhujadvayam //
mṛṣṭapītāṃbaraṃ hemabāṇabāṇāsanojjvalam

suvarṇamukuṭaṃ hārakeyūrādivibhūṣitam //
taṃ tu padmālayā dṛṣṭvā sakhī kamalalocanā

drutahemanibhākārā paśya paśyeti sābravīt //
paśyantīnāṃ tadāsmākaṃ gato'ntardhānamāśu saḥ

sā sakhī mūrcchitāsmābhinītā rājagṛhaṃ tataḥ

//
atha padmāvatīmuddiśya daivajñaṃ prati viyadrājakṛtapraśnādiḥ // //
dṛṣṭvā'svasthāṃ nṛpaḥ putrīmapṛcchaddaivacintakam //
vada viprendra putryā me grahacāraphalaṃ mune

bṛhaspatisamo vipro vicāryātmani khecarān //
anukūlā grahāḥ sarve tava putryā nṛpottama

kintu nityaṃ grahaphalaṃ kiṃcidbhrāṃtikaraṃ nṛpa //
tamuvāca punardhīmānpraśnakālaṃ vicārya ca

chāyāṃ guṇitvā lagnaṃ ca tatphalāni vicārya ca //
lagne lagnādhipaścandraḥ keṃdre caiva bṛhaspatiḥ

nidrāti dinapakṣī tu praśnapakṣī tu rājyagaḥ //
śṛṇu rājanphalaṃ tasya svāsthyameva bhaviṣyati

uttamaḥ puruṣaḥ kaścidāgataḥ kanyakāṃ prati //
taṃ dṛṣṭvā mūrcchitā putrī tena yogaṃ sameṣyati

tenaiva preṣitā kācidāgamiṣyati kanyakā //
sā tu vakṣyati yadvākyaṃ taddhitaṃ te bhaviṣyati

tatkuruṣva mahārāja satyaṃsatyaṃ vadāmyaham //
kiṃ ca sarvārthadaṃ yattu sarvavyādhivināśanam

vakṣyāmi tatkuruṣvādya putryāstava sukhāvaham //
kārayāgastyaliṃgasya brāhmaṇairabhiṣecanam

ityuktātha gṛhaṃ yāto rājānaṃ daivacitakaḥ //

// atha daivajñoktyāgastyaliṃgārcanāya viprādipreṣaṇam // //
ākāśarājo'pi tadā viprānāhūya vaidikān //
abhyarcyājñāpayāmāsa gatvā devālayaṃ dvijāḥ

mahābhiṣekaṃ śambhośca kurudhvaṃ maṃtrapūrvakam //
ityanujñāpya tānasmānāhūyābhyavadacchubhe

mahābhiṣekasambhārānsampādayata kanyakāḥ //
ityājñaptā nṛpeṇaiva vayaṃ devālayaṃ gatāḥ

brūhi tvaṃ subhage'smākaṃ tvadāgamanamaṃjasā //
kutosi kasya vārthena kva vā jigamiṣā hi te

divyāśvamadhiruhyemaṃ devalokādivāgatā

// śrīvarāha uvāca // //
iti tābhistadā pṛṣṭā hṛṣṭā bakulamālikā //
provāca vācaṃ madhurāṃ harṣayantīva bālikāḥ

// bakulamālikovāca // //
śrīveṃkaṭādreḥ prāptāhaṃ nāmnā bakulamālikā //
dharaṇīṃ draṣṭukāmāhamāruhyemaṃ turaṃgamam

draṣṭuṃ śakyā bhaveddevī kimu tatra nṛpālaye //
iti tasyā vacaḥ śrutvā tāḥ procurnṛpakanyakāḥ

asmābhiḥ sahitā tvaṃ vai drakṣyase dharaṇīṃ śubhe //
ityuktā sā tatastābhirāgatā nṛpamaṃdiram

āgacchantīṣu tāsvevaṃ dharaṇī tu pulindinīm

// atha dharaṇīkṛta praśnasya pulindinīprativacanam // //
āyāntīṃ vīthikāyāṃ sā saguṃjāśaṃkhabhūṣitām //
śiśuṃ stanaṃ dhayaṃ pṛṣṭhe baddhvā vastrāṃcalena vai

vadāmi satyaṃ śṛṇuta bhūtaṃ bhavyaṃ bhaviṣyakam //
vadantī vīthivīthīṣu tāmāhūya śucismitā

svarṇaśūrpaṃ samādāya tasminmuktā nidhāya ca //
triprasthamātrāṃstrīnrāśīnkṛtvā tasyai nidhāya ca

vada satyaṃ tvameṣyadvā bhūtameva vā //
ityevaṃ dharaṇī devī pṛcchaṃtī tāṃ sthitā'bhavat

pṛṣṭā sāvadadasyāstu manasā yadvicintitam//
madhyarāśau cintitaṃ te vada kalyāṇi me ṛju

omityāhātha dharaṇī puliṃdāṃ rājavallabhā //
// dharaṇyuvāca // //
rāśiruktaḥ phalaṃ brūhi dhanarāśiṃ dadāmi te

// pulindovāca // //
satyaṃ vadāmi te subhru śiśorannaṃ prayaccha me //
ityuktā sā tu dharaṇī svarṇapātre'nnamādade

dattvā tasyai puliṃdinyai satyaṃ brūhīti sāvadat//
sakṣīramannamādāya dattvā putrāya bhāminī

sā satyamavadatsubhrūrduhiturdehaśoṣaṇam//
puruṣādāgataṃ bhīru tadrūpā'darśanādiyam

aṃgatāpaṃ samāpannā hyanaṃgaśarapīḍitā //
sa tu devādidevo vai vaikuṇṭhādāgataḥ svayam

śrīveṃkaṭādriśikhare svāmipuṣkariṇītaṭe //
māyāvī paramānaṃdaḥ śriyā saha ramāpatiḥ

kāmarūpī viharate bhaktābhīṣṭaprado hariḥ //
sa turaṃgaṃ samāruhya viharankānanāntare

āgatyopavanaṃ rājñi tava kanyāṃ sa dṛṣṭavān //
ramāsamāmimāṃ dṛṣṭvā svayaṃ kāmavaśaṃ gataḥ

svasakhīṃ lalitāṃ devaḥ preṣayiṣyati teṃtikam //
rameva taṃ sametyaiṣā ramiṣyati sukhaṃ ciram

etatsatyaṃ mama vacaḥ paśyādyaiva nṛpātmaje //
putrasyānnaṃ prayaccheti tūṣṇīmāsa pulindinī

annaṃ dattvā punarbhūri tasyai tāṃ visasarja ha //
tasyāṃ vinirgatāyāṃ tu puliṃdinyāmaninditā

utthāya cāṃgaṇāttasmādviveśāṃtaḥpuraṃ śubham //
yatra padmālayā kanyā samāste svasakhīvṛtā

gatvā putrīsamīpasthā kanyāṃ kāmāturāṃ sutām//
putri kiṃ te kariṣyāmi vastu kiṃ vā priyaṃ śubhe

iti mātrābhipṛṣṭā sā mandamāha manasvinī

// atha padmāvatī nivedita bhagavadbhāgavatayorlakṣaṇāni // //
netrābhirāmaṃ yalloke satāmapi manaḥpriyam //
yaddraṣṭukāmā brahmādyā yattu sarvagataṃ mahat

tejasāmapi tejasvi devānāmapi daivatam //
bhaktaissadbhiriha prāpyamabhaktairna kadācana

tasminneva mano me'mba vastunīha pravartate//
tadevānviṣyatāṃ mātarbhaktānāṃ sarvakāmadam

// śrīvarāha uvāca // //
etacchrutvātha dharaṇī tāmapṛcchatpunaḥ sutām //
tadbhaktalakṣaṇaṃ brūhi yaiḥ prāpyaṃ tatsulocane

// padmālayovāca // //
bhaktānāṃ lakṣaṇaṃ mātaḥ śṛṇu guhyaṃ samāhitā //
śaṃkhacakrāṃkitā nityaṃ bhujayugme vasundhare//

ūrdhvapuṃḍraṃ sāntarālaṃ teṣāmeva viśeṣataḥ //
puṇḍrāni dvādaśa punardhārayaṃti tathāpare

lalāṭodarahṛtkaṇṭhe jaṭhare pārśvayorapi //
kūrparayorbhujadvandve pṛṣṭhe ca galapṛṣṭhake

keśavādīni nāmāni dvādaśāṃgeṣu dvādaśa //
vāsudeveti tanmūrdhni dhārayaṃti namo'stviti

teṣāṃ tu niyamānvakṣye mātaḥ śṛṇu manoramān //
vedapārāyaṇaratāḥ karma kurvaṃti vaidikam

satyaṃ vadanti ye devi nāsūyaṃti parānkvacit //
paraniṃdāṃ na kurvaṃti parasvaṃ na haraṃti ca

na smaraṃti na paśyanti na spṛśaṃti kadācana //
paradārānsurūpāṃśca ye ca tānviddhi vaiṣṇavān

sarvabhūtadayāvaṃtaḥ sarvabhūtahite ratāḥ //
sadā gāyaṃti deveśametānbhaktānavehi vai

yena kena ca santuṣṭāḥ svadāraniratāśca ye //
vītarāgabhayakrodhāstānbhaktānviddhi vaiṣṇavān

evaṃvidhairguṇairyuktāḥ paṃcāyudhadharā api //
pitrā cācāryarūpeṇa śiṣṭenānyena vā punaḥ

svagṛhyoktavidhānena vahnimādāya vai budhaḥ //
cakrādyāyudhamaṃtreṇa juhuyātṣoḍaśāhutīḥ

mūlamaṃtreṇa sūktena pauruṣeṇa tataḥ param //
jātavedaḥ sumaṃtreṇa paścādaṣṭottaraṃ śatam

hutvā mahāvyāhṛtibhiścakrādīṃstatra tāpayet //
sahyānsutaptānguruṇā maṃtravaddhārayedbudhaḥ

bhujadvaye śaṃkhacakre mūrdhni śārṅgaśarau tathā //
lalāṭe tu gadā dhāryā hṛdaye khaḍgameva ca

evaṃ dhāryāṇi pañcaiva viṣṇubhaktairmumukṣubhiḥ //
athavā bhujayoścakra śaṃkhau caiva sulakṣaṇau

evaṃ lāñchanayuktā ye bhaktāste vaiṣṇavāḥ smṛtāḥ //
taireva labhyaṃ tadbrahma sadācārasamanvitaiḥ

tasminneva mama prītistatprāptiṃ kāṃkṣate manaḥ //
mātarviṣṇuvinānyeṣu vāñchā kācinna jāyate

smarāmi śyāmalaṃ viṣṇuṃ vadāmi harimacyutam //
tenaiva mātarjīvāmi tadyoge cintyatāṃ vidhiḥ

// śrīvarāha uvāca // //
ityuktvā mātaraṃ dīnā virarāmāmbujānanā //
tacchrutvā cintayāmāsa viṣṇuḥ prītaḥ kathaṃ bhavet

atha bakulamālikayā sārddhaṃ sakhīnāṃ dharaṇīsamīpa āgamanam//
etasminnaṃtare kanyā agastyeśaṃ samarcya ca //
āgatā dharaṇīṃ draṣṭuṃ sahaiva bakulasrajā

āgatānbrāhmaṇānsātha pūjayitvā subhojanaiḥ //
dattvātha dakṣiṇāḥ pūrṇā vastrālaṃkārasaṃyutāḥ

āśiṣau vācayitvātha vāṃchitārthasya siddhaye //
visṛjya vrāhmaṇānsarvānathāpṛcchatsvayoṣitaḥ

pūjayitvā hyagastyeśamāgatāstā manasvinīḥ

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīveṃkaṭācalamāhātmye dharaṇīvarāhasaṃvāde bakulamālikāṃ prati sakhīviniveditapadmāvatyudantaviṣṇubhaktalakṣaṇādivarṇanaṃnāma ṣaṣṭho'dhyāyaḥ