Skanda Purana · Verses 2.6-3

// munaya ūcuḥ // //
kasmindeśe dvijaśreṣṭha tatkṣetraṃ puruṣottamam //
yatra nārāyaṇaḥ sākṣāddārurūpī prakāśate

// jaimini ruvāca // //
utkalonāma deśo'sti khyātaḥ paramapāvanaḥ //
yatra tīrthānyanekāni puṇyānyāyatanāni ca

dakṣiṇasyodadhestīre sa tu deśaḥ pratiṣṭhitaḥ //
yatra sthitā vai puruṣāḥ sadācāranidarśanāḥ

vṛttādhyayanasaṃpannā yajvāno yatra bhūsurāḥ //
sṛṣṭyādau kratavo vedā vedaśāstrapravartakāḥ

/
aṣṭādaśānāṃ vidyānāṃ nidhānaṃ saṃprakīrtitam //
gṛhe gṛhe nivasati lakṣmīrnārāyaṇājñayā

lajjāśīlā vinītāśca ādhivyādhivivarjitāḥ //
pitṛmātṛratāḥ satyavādino vaiṣṇavā janāḥ

na cātrāvaiṣṇavaḥ kaścinnāstiko vāpi vartate //
sarve parahitāstatra na lubdhā na śaṭhāḥ khalāḥ

dīrghāyuṣastatra janāḥ striyaśca patidevatāḥ //
suśīlā dharmaśīlāśca trapācāritrabhūṣitāḥ

rūpayauvanagarvāḍhyāḥ sarvālaṃkārabhūṣitāḥ //
kulaśīlavayovṛttānurūpācāracaṃcavaḥ

svakarmaniratāstatra prajārakṣaṇadīkṣitāḥ //
kṣatriyā dānaśauṃḍāśca śastraśāstraviśāradāḥ

yajaṃte kratubhiḥ sarve satataṃ bhūridakṣiṇaiḥ //
dīpyaṃte cittayo yeṣāṃ yūpāḥ kāṃcanabhūṣitāḥ

yeṣāṃ gṛheṣvatithayaḥ kāmanādhikapūjitāḥ //
vaiśyāśca kṛṣi vāṇijyagorakṣāvṛttisaṃsthitāḥ

devāngurūndvijānbhaktyā prīṇayaṃti dhanairapi //
ekasya dvāri yāto'rthī na gacchedanyaveśmani

gītakāvyakalāśilpakuśalāḥ priyavādinaḥ //
śūdrāśca dhārmikāstatra snānadānakriyāratāḥ

karmaṇā manasā vācā dhanaiśca dvijasevakāḥ //
ye'nye saṃkarajātāste svesve dharme pratiṣṭhitāḥ

na viparyaṃti ṛtavo nākāle varṣate ghanaḥ //
na sasyahānirna marutkṣunna pīḍayati prajāḥ

durbhikṣamarake nātra rāṣṭrabhaṃgaḥ prajāyate //
nālabhyaṃ tatra vastvasti yatkiṃcitpṛthivīgatam

evaṃ sarvaguṇairyukto nānādrumalatākulaḥ //
arjunāśokapunnāga tālahiṃtālaśālakaiḥ

prācīnāmalakairlodhrairbakulairnāgakeśaraiḥ //
nārikelaiḥ priyālaiśca saralairdevadārubhiḥ //

dhavaiśca khadirairbilvaiḥ panasaiśca kapitthakaiḥ //
caṃpakaiḥ karṇikāraiśca kovidāraiḥ sapāṭalaiḥ

kadaṃbaniṃbanicuralarasālāmalakaistathā //
nāgaraṃgaiśca jaṃbīrairnīpakairmātuluṃgakaiḥ

maṃdāraiḥ pārijātaiśca nyagrodhāgurucaṃdanaiḥ //
kharjūrāmrātakaiḥ siddhairmucukuṃdaiḥ sakiṃśukaiḥ

tiṃdukaiḥ saptaparṇaiśca aśvatthaiśca bibhītakaiḥ //
anyaiśca vividhairvṛkṣaiḥ prakīrṇaḥ sumanoharaiḥ

mālatīkuṃdabāṇaiśca karavīraiḥ sitetaraiḥ //
ketakīvanaṣaṃḍaiśca atimuktaiḥ sakubjakaiḥ

elālavaṃgakaṃkoladāḍimairbījapūrakaiḥ //
śreṇīkṛtaiḥ pūgavanairudyānaiḥ śataśo vṛtaḥ

nānādrumalatākīrṇaḥ parvataiḥ siṃdhurbhirvṛtaḥ //
sa eṣa deśapravara utkalākhyo dvijottamāḥ

ṛṣikulyāṃ samāsādya dakṣiṇodadhigāminīm //
svarṇarekhāmahānadyormadhye deśaḥ pratiṣṭhitaḥ

santyatra puṇyāyatane kṣetrāṇi subahūnyapi //
pūrvaṃ vastīrthayātrāyāṃ varṇitāni mayā dvijāḥ //
bhūsvargaḥ sāṃprataṃ hyeṣa kathitaḥ puruṣottamaḥ

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetramāhātmya oḍhradeśavarṇanaṃ nāma ṣaṣṭho'dhyāyaḥ