Skanda Purana · Verses 2.16-6

// // śrutadeva uvāca // //
taddarśanāhlādapariplutāśayaḥ sadyaḥ samutthāya nanāma mūrdhnā //
ciraṃ nirīkṣyā''kulalocano hyamuṃ viśvātmadevaṃ jagatāmadhīśam

dadhāra pādāvavanijya tajjalaṃ yatpādajā''brahma jagatpunāti //
samarcayāmāsa mahāvibhūtibhirmahārhavastrābharaṇānulepanaiḥ

sragdhūpadīpāmṛtabhakṣaṇādibhistvaggātravittātmasamarpaṇena //
tuṣṭāva viṣṇuṃ puruṣaṃ purāṇaṃ nārāyaṇaṃ nirguṇamadvitīyam

niraṃjanaṃ viśvasṛjāmadhīśaṃ vande paraṃ padmabhavādivaṃditam //
yanmāyayā tattvaviduttamā janā vimohitā viśvasṛjāmadhīśvaram //

muhyaṃti māyācariteṣu mūḍhā guṇeṣu citraṃ bhagavadviceṣṭitam //
anīha etadbahudhaika ātmanā sṛjatyavatyatti na sajjate'pyatha

samastadevāsurasaukhyaduḥkhaprāptyai bhavānpūrṇamanoratho'pi //
tatrā'pi kāle svajanābhiguptyai bibharṣi sattvaṃ khalanigrahāya

tamoguṇaṃ rākṣasa bandhanāya rajoguṇaṃ nirguṇa viśvamūrte //
diṣṭyā tvadaṃghriḥ praṇatāghanāśanastīrthāspadaṃ hṛdi dhṛtaḥ suvipakvayogaiḥ

utsiktabhaktyupahṛtāśaya jīvabhāvāḥ prāpurgatiṃ tava padasmṛtimātrato ye //
bhavākhyakāloragapāśabandhaḥ punaḥpunarjanmajarādiduḥkhaiḥ

bhramāmi yoniṣvahamākhubhakṣyavatpravṛddhatarṣastava pādavismṛteḥ //
nūnaṃ na dattaṃ na ca te kathā śrutā na sādhavo jātu mayā'pi sevitāḥ

tenāribhirdhvastaparārdhyalakṣmīrvanaṃ praviṣṭaḥ svaguruhyaghaṃ smaran //
smṛtau ca tau māṃ samupetya duḥkhātsaṃbodhayāṃcakraturārtabaṃdhū

vaiśākhadharmaiḥ śruticoditaiḥ śubhaiḥ svargāpavargādi pumarthahetubhiḥ //
tadbodhato'haṃ kṛtavānsamastāñcchubhāvahānmādhavamāsadharmān

tasmādabhūnme paramaḥ prasādastenākhilāḥ saṃpada ūrjitā imāḥ //
nāgnirna sūryo na ca candratārakā na bhūrjalaṃ khaṃ śvasano'tha vāṅmanaḥ

upāsitāste'pi haratyaghaṃ cirādvipaścito ghnanti muhūrtasevayā //
yānmanyase tvaṃ bhavino'pi bhūriśastyakteṣaṇāṃstvatpadanyastacittān

namaḥ svataṃtrāya vicitrakarmaṇe namaḥ parasmai sadanugrahāya //
tvanmāyayā mohito'haṃ guṇeṣu dārārtharūpeṣu bhramāmyanarthadṛk

tvatpādapadme sati mūlanāśane samastapāpāpaharaṃ sunirmalam //
sukhecchayānarthanidānabhūtaiḥ sutātmadārairmamatābhiyuktaḥ

na kvāpi nidrāṃ labhate na śarma pravṛddhatarṣaḥ punareva tasmin //
labdhvā durāpaṃ naradevajanma tvaṃ yatnataḥ sarvapumarthahetuḥ

padāravindaṃ na bhajāmi deva saṃmūḍhacetā viṣayeṣu lālasaḥ //
karomi karmāṇi suniṣṭhitaḥ sanpravṛddhatarṣastadapekṣayā dadat

punaśca bhūyāmahamadya bhūyāmityeva cintāśatalolamānasaḥ//
tadaiva jīvasya bhavetkṛpā vibho duraṃtaśaktestava viśvamūrte

samāgamaḥ syānmahatāṃ hi puṃsāṃ bhavāṃbudhiryena hi goṣpadāyate //
satsaṃgamo deva yadaiva bhūyāttarhīśa deve tvayi jāyate matiḥ

samastarājyāpagamaṃ hi manye hyanugrahaṃ te mayi jātamañjasā //
yathārya te brahmasurāsurādyairnivṛttatarṣairapi haṃsayūthaiḥ

itaḥ smarāmyacyutameva sādaraṃ bhavāpahaṃ pādasaroruhaṃ vibho //
akiṃcanaprārthyamamandabhāgyadaṃ na kāmaye'nyattava pādapadmāt //

ato na rājyaṃ na sutādikośaṃ dehena śaśvatpatatā rajobhuvā //
bhajāmi nityaṃ tadupāsitavyaṃ pādāraviṃdaṃ munibhirvicintyam

prasīda deveśa jagannivāsa smṛtiryathā syāttava pādapadme //
saktiḥ sadā gacchatu dārakośaputrātmacihneṣu gaṇeṣu me prabho

bhūyānmanaḥ kṛṣṇapadāravindayorvacāṃsi te divyakathānuvarṇane //
netre mameme tava vigrahekṣaṇe śrotre kathāyāṃ rasanā tadarpite

ghrāṇaṃ ca tvapādasarojasaurabhe tvadbhaktagandhādivilepane sakṛt //
syātāṃ ca hastau tava mandire vibho saṃmārjjanādau mama nityadaiva

pādau vibho kṣetrakathā'nusarpaṇe mūrdhā ca me syāttava vandane'niśam //
kāmaśca me syāttava satkathāyāṃ buddhiśca me syāttava ciṃtane'niśam

dināni me syustava satkathodayairudgīyamānairmunibhirgṛhāgataiḥ //
hīnaḥ prasaṃgastava me na bhūyātkṣaṇaṃ nimeṣārddhamathā'pi viṣṇo

na pārameṣṭhyaṃ na ca sārvabhaumaṃ na cāpavargaṃ spṛhayāmi viṣṇo //
tvatpādasevāṃ ca sadaiva kāmaye prārthyāṃ śriyā brahmabhavādibhiḥ suraiḥ

iti rājñā stuto viṣṇuḥ prasannaḥ kamalekṣaṇaḥ //
meghagambhīrayā vācā tamuvāca kṣitīśvaram

// śrībhagavānuvāca // //
jāne tvāṃ dāsavaryaṃ me niṣkāmukamakalmaṣam //
athā'pi te pradāsyāmi varaṃ daivatadurlabham

āyuṣyaṃ cāyutaṃ divyaṃ saṃpadaśca nareśvara //
bhaktirmayi dṛḍhā bhūyādante sāyujyameva ca

tvayā kṛtena stotreṇa māṃ stuvanti ca ye bhuvi //
teṣāṃ tuṣṭaḥ pradāsyāmi bhuktiṃ muktiṃ na saṃśayaḥ

tṛtīyaiṣā'kṣayānāma bhuvi khyātā bhaviṣyati //
yasyāṃ tava prasanno'haṃ bhuktimuktiphalapradaḥ

ye kurvaṃti narā mūḍhāḥ snānadānādikāḥ kriyā //
vyājenā'pi svabhāvādvā yāṃti matpadamavyayam

ye cā'kṣayatṛtīyāyāṃ pitṝnuddiśya mānavāḥ //
śrāddhaṃ kurvaṃti teṣāṃ vai tadānaṃtyāya kalpate

na cānayā tithirloke samā vā nādhikā bhuvi//
asyāṃ kṛtaṃ svalpamapi tadakṣayyaphalaṃ bhavet

yo gāṃ dadyānnṛpaśreṣṭha brāhmaṇāya kuṭuṃbine //
sarvasaṃpatpravarṣākhyā bhuktimuktiḥ kare sthitā

yo hi dadyādanaḍvāhaṃ sarvapāpavināśanam //
kālamṛtyuvimuktaḥ sandīrghāyuṣyamavāpnuyāt

vaiśākhamāse yo dharmānkurute matpriyāvahān //
teṣāṃ mṛtyujarājanmabhayaṃ pāpaṃ harāmyaham

yathā vaiśākhadharmaistu tuṣṭaḥ syāṃ sakalairapi //
māsadharmairna tuṣṭaḥ syāṃ māso me mādhavaḥ priyaḥ //

sarvadhamojjhitā vāpi brahmacaryavivarjitāḥ//
vaiśākhamāsaniratā yāṃti matpadamavyayam

yaddurāpaṃ tapobhiśca sāṃkhyayogairmakhairapi //
taddhāma paramaṃ yāṃti vaiśākhaniratā narāḥ

api pāpasahasraṃ vā māso'yaṃ harate'nagha //
prāyaścittavihīnaṃ vā matpādasmaraṇaṃ yathā

gurūpadiṣṭaḥ kāṃtāre vaiśākhe nirato bhavān //
samārādhya jagannāthaṃ tenāptamakhilaṃ nṛpa

dharmeṇānena saṃprītaḥ pratyakṣo'haṃ bhavāmi te //
bhuktvā bhogānyathākāmāndevairapisudurlabhān

iti tasmai varaṃ dattvā devadevo janārdanaḥ //
paśyatāmeva sarveṣāṃ tatraivāṃtaradhīyata

tato bhūpālavaryo'sau babhūvātyaṃtavismitaḥ //
hṛṣṭapuṣṭatanurbhūpa labdhanaṣṭadhano yathā

tataḥ śaśāsa pṛthivīṃ taccittastatparāyaṇaḥ //
mahadbhirbodhito nityaṃ gurubhiśca niraṃtaram

nānyaṃ priyatamaṃ mene vāsudevamṛte nṛpaḥ //
yatsaṃparkātpriyā āsandārāmātyasutādayaḥ

sarvāndharmāṃścakārā'sau vaiśākhoktānpunaḥpunaḥ //
tena puṇyaprabhāvena putrapautrādibhirvṛtaḥ

bhuktvā manorathānsarvāndevānāmapi durlabhān //
aṃte jagāma sāyujyaṃ viṣṇordevasya cakriṇaḥ

ya idaṃ paramākhyānaṃ śṛṇvanti śrāvayaṃti ca //
te sarve pāpanirmuktā yāṃti viṣṇoḥ paraṃ padam

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe vaiśākhamāsamāhātmye nāradāmvarīṣasaṃvāde pāṃcālādhipateḥ sāyujyaprāptirnāma ṣoḍaśo'dhyāyaḥ