Skanda Purana · Verses 2.11-2

// jaiminiruvāca // //
nāradādbrahmaṇaḥ putrādbhagavadbhaktimuttamām //
śrutvetthaṃ paramaprīta iṃdradyumno'pyuvāca tam

//
iṃdradyumna uvāca // //
sādhusaṃgastu vidvadbhirbhavavyādhivināśanaḥ //
mamopadiṣṭo bhagavanso'bhūtsāṃpratameva me //

yena sākṣātkṛto viṣṇuḥ paramātmā parātparaḥ //
sa tvaṃ yanmaṃdirāyātastvadanyaḥ sādhuratra kaḥ

tvatsaṃnidhānādbhagavastamo me nāśamabhyagāt //
yanme tvarayate cittamarcituṃ nīlamādhavam

vetsi brahmāṃḍavṛttāṃtaṃ paryaṭansārvalaukikaḥ //
tadāvāṃ rathamāsthāya paśyāvo nīlamādhavam //

puruṣottamasaṃjñasya kṣetrasyālaṃkṛtaṃ śubham //
tatra tīrthāni saṃtīti bahubhiḥ kathitāni me //
tvadvākyādyadi jānāmi bhaveyuḥ saphalāni me

//
// nārada uvāca // //
haṃta te darśayiṣyāmi kṣetraṃ kṣetrasthitāni ca //
tīrthāni śaktiśaṃbhūṃśca kṣetramāhātmyameva ca

sākṣāddrakṣyasi deveśaṃ bhaktasyātmasamarpakam //
tavānugrahataḥ śīghraṃ caturddhā saṃvyavasthitam

yasya saṃdarśanānmartyo jāyate bhaktibhājanam //
evaṃ kathāṃte tau prītāvahaḥkṛtyaṃ samāpya ca

yātrānukūlaṃ nirṇīya paṃcamyāṃ budhavāsare //
jyeṣṭhakṛṣṇetare pakṣe puṣyarkṣe lagna uttame //
ekatra śayitau rātriṃ ninyaturnṛpanāradau

tataḥ prabhāte vimala iṃdradyumno nṛpottamaḥ //
ghoṣaṇāṃ kārayāmāsa rājyasya saha baṃdhubhiḥ

yathāvibhavataḥ sainyairnīlādrigamanaṃ prati //
yāvajjīvaṃ tatra vāsaṃ kariṣyāmo viniścitam

yā vṛttiḥ kalpitā yasya sa tayā tatra jīvatu //
rājānaḥ sāvarodhāśca sāmātyāḥ saparicchadāḥ

rathairgajaisturagaiśca koṣaiḥ saha padātibhiḥ

vrajaṃtu sajjitāstatra brāhmaṇāḥ sāgnihotriṇaḥ //
vaṇijaḥ saha bhāṃḍaiśca sapaṇyāḥ paṇyajīvinaḥ

rāṣṭrakarmaṇi niṣṇātā kuśalā rājavartmasu //
jyotirvido nṛtyavido daṃḍanītau pravīṇakāḥ

nṛtyagāyanavāditracaturvidhasubuddhayaḥ //
gajavājinarāṇāṃ ca bhaiṣajye śāstra uttame

kuśalā dṛṣṭakarmāṇo vidyāsvaṣṭādaśasvapi //
upāṃgavidyāsu tathā kuhakārthakutūhalāḥ

vāṭasāhasikāścorāstathānye paśyatoharāḥ //
vicitrakathanājīvāścāṭukārāśca māgadhāḥ

śāstropajīvinaścaiva tathānye śalyahārakāḥ //
dyūtakārāśca puṃścalyo veśyā veśānugā viṭāḥ

kṛṣīvalāśca gomepacchāgoṣṭrakhararakṣakāḥ //
śakuṃtapālāśca kapivyāghraśārdūlarakṣakāḥ

āhituṃḍikagorakṣya śabarā mlecchajātayaḥ

anye ca ye mālavadeśajātā ājñāṃ madīyāmanupālayaṃti //
te yāṃtu sarve vasatau hi nīlācale yathāsvaṃ kṛtavāstubhāgāḥ

evamājñāpya nṛpatiryātrāyāṃ ca kṛtakṣaṇaḥ //
nāradena samāgamya daivajñamidamāha saḥ

sāṃvatsara muhūrttaṃ me nirṇītaṃ te yathā purā //
tāvanmāṃgalikaṃ vastujātaṃ samyagupānaya

purohitamatenāsminkṣaṇe yāvadvimṛgyate //
tenādiṣṭaḥ sa gaṇakaḥ purohitasahāyavān //

ājahāra samastāni māṃgalyāni dvijottamāḥ //
atrāṃtare sa rājarṣirdivyasiṃhāsanasthitaḥ

yātrābhiṣekamāṃgalyaṃ vipraiḥ prāganubhāvitam //
śrīsūktavahnisūktābhyāṃ sūktenābdaivatena ca

pāvamānyābdhisūktena pṛthaṅmāṃgalyavarddhakaiḥ //
tīrthādbhirauṣadhībhiśca sarvagandhaiḥ pṛthakpṛthak

abhiṣiktastato rājā cīnāṃśukahṛtāṃbhasā //
rarāja vapuṣā dīpto nirdhūmaḥ pāvako yathā

āmuktaśuklavasanaḥ svācāṃtaḥ sapavitrakaḥ //
nāṃdīmukhānpitṛgaṇānpūjayitvā yathāvidhi

jayārāṣṭrabhṛto hutvā gaṇahomāṃśca yatnataḥ //
śaṃkhadhvanisugaṃdhāḍhayaṃ śvetavarṇaṃ vidhūmakam

vahniṃ pradakṣiṇaṃ cakre dakṣiṇāvarttagārciṣā //
sākṣātkāreṇa dadataṃ jayaṃ rājñe jayārthine

navagrahamakhāṃte ca grahakuṃbhena sevitaḥ // gra
hāṇāṃ dauṣṭyanāśāya sausthyasyāpi vivṛddhaye

jyotiḥśāstroditairmaṃtrairdaivajñavidhicoditaiḥ //
tato māṃgalyanepathyavidhānamupacakrame

cīnāṃśukaprāvaraṇe vidhāya kavacaṃ nijam //
śiroveṣṭanakaṃ śubhraṃ suratnamukuṭojjvalam

sāvataṃse śrutiyuge ratnakuṃḍalabhūṣite //
graiveyakaṃ mahārghaṃ tu hāraṃ taralabhūṣitam

dadhārātha nṛpaśreṣṭhaḥ keyūrāṃgadamudrikāḥ //
madhyena trivalīsaktaṃ svarṇasūtraṃ trivṛddadhau

hiraṇyakiṃkiṇīyukta muktātoraṇamālikam //
nānāratnaiḥ sughaṭitāṃ dadhārātha sumekhalām

anarghye pādakaṭake pādayoḥ saṃnyaveśayat //
sammukhādarśitādarśe dadṛśe svaṃ vibhūṣitam

maṃgalāropaṇārthāya haimapīṭhamupāviśat //
prāṅmukhaḥ śrīdharaṃ devaṃ saṃsmaranmadhusūdanam

magalāyatanaṃ viṣṇuṃ sarvamāṃgalyakāraṇama //
smaraṇādasya naśyaṃti pātakāni bahūnyapi

saumanasyāmatho mālāmārttavīṃ gaṃdhavarṇitām //
dadhāra prathamaṃ rājā maṃtritāṃ svapurodhasā

mṛdaṃ dīpaṃ phalaṃ dūrvā dadhi gorocanāṃ tataḥ //
mantrābhimaṃtritānsarvānsiddhārthairabhirakṣitaḥ

ātmānaṃ dadṛśe rājā saurabheye haviṣyatha //
mukure maṃtrite paścātsvaṃ dṛṣṭvā nṛpakesarī

bahvṛcaiḥ śāṃtighoṣeṇa samudīrṇaśubhāyatiḥ //
yājuṣkaiḥ pathisūktena vrajanmārge'bhirakṣitaḥ

paurāṇairmaṃgalairvākyaiḥ kṛtavīryadhṛtirnṛpaḥ //
māgadhaiḥ stutipāṭhena prādurbhūtaparākramaḥ

pārijātaharaṃ satyāsahitaṃ garuḍadhvajam//
dhyāyanhṛtpaṃkaje rājā dakṣiṇaṃ pādamuddadhau

pradakṣiṇīkṛtya muniṃ nāradaṃ purataḥ sthitam //
madhyadvāramupāgacchadvetrapāṇibhirāvṛtaḥ //

ādiṣṭapadamārgo'sāvagnihotrapuraḥsaraḥ //
tatrāpaśyatsthitānviprānātmano dakṣiṇena vai

māṃgalyasūktaṃ' paṭhataḥ śubhrābhānpāṃḍurāṃśukān//
lājāḥ sapuṣpā rājāgre kṣipataḥ śaṃsataḥ śubham

vāmapārśvasthitā veśyāścāmaravyagrapāṇayaḥ //
śubhrālaṃkāravasanāḥ smerapadmānanā śubhāḥ

brāhmaṇānpūjayāmāsa bhaktinamro dvijottamāḥ //
vastrālaṃkāramālyaiśca sugandhairanulepanaiḥ

toṣayāmāsa tānviprānbhagavadbuddhi bhāvitān //
veśyābhyo māgadhebhyaśca dīnānāthebhya eva ca

rājānumatyā sacivo yathārhaṃ pradadau dhanam //
śvetānpārāvatānhaṃsāñchvetāśvaṃ śvetakuṃjaram

sacūtapallavaṃ śvetamālāphalavibhūṣitam //
kadalīkāṃḍasannaddhatoraṇādhaḥ sthitaṃ nṛpaḥ //
pūrṇakuṃbhaṃ sa paśyanvai maṃgalāni bahūnyapi//
sitātapatreṇa śiraḥpradeśe vāritātapaḥ

yugapatpūryamāṇaistu kaṃbubhiḥ śatasaṃkhyakeḥ//
saṃmiśritāni śuśrāva vāditrāṇi bahūni saḥ

tathā maṃgalagītāni jayaśabdāṃśca bhūpatiḥ //
tato viveśa prāsādaṃ nṛsiṃhamavalokitum

yaṃ smṛtvā jāyate martyaḥ sarvakalyāṇabhājanam //
dṛṣṭvā sa dūrānnṛhariṃ divyasiṃhāsanasthitam

praṇamya sāṣṭāvayavaṃ santoṣyopaniṣadgirā //
dakṣapārśvasthitāṃ durgāṃ sarvadurgatimocinīm

vavaṃde caraṇābhyāśe paśyatīṃ kṛpayā nṛpaḥ //
tataḥ purodhā devāṃgādavaropya śubhā srajam

āsañjayāmāma gale sugaṃdhenānvalepayat //
nīrājayāmāsa rājñaḥ śiraścāveṣṭayanmudā

punaḥ pradakṣiṇīkṛtya tau devau nṛpasattamaḥ //
śibikāyāṃ samāropya pratasthe ca puraskṛtau

prādurbhūya bahirdvāre rathaṃ dṛṣṭvā susajjitam //
turaṃgamairvātajavairdaśabhiḥ parayojitam

pradakṣiṇīkṛtya nṛpo nāradena samāviśat //
ḍhakkāmṛdaṃganiḥsāṇabherīpaṇava gomukhāḥ

madhurīcarcarīśaṃkhā avādyaṃta sahasraśaḥ //
syandanāḥ koṭiśastatra nṛpāṇāmanujīvinām

cakāśire śreṇikṛtā indradyumnarathābhitaḥ //
nānāpraharaṇopetāḥ patākābhiralaṃkṛtāḥ

dhvajocchritāḥ svarṇaraupyaiḥ kiṃkiṇījāladarpaṇaiḥ //
yantrairnānāvidhairyuktā gaṃbhīra snigdhaniḥsvanāḥ

padātīnāṃ kuñjarāṇāṃ hayānāṃ vātaraṃhasām //
pattisaṃsphoṭanairhastibṛṃhitairhayaheṣitaiḥ

bahulai rathanirghoṣairmiśritā vādyaniḥsvanāḥ //
yugāṃtārṇavanisvānatulyāḥ śuśruvire janaiḥ

tasminkṣaṇe paurajanāḥ svasvasaṃbhārasajjitāḥ //
aśvakai rāsabhairuṣṭrairvāhakaiḥ pratitasthire

āṃdolikāśca palyaṃkāḥ koṭiśaśca turaṃgakāḥ //
śreṇībhūtāśca dṛśyaṃte rāṣṭraprasthānasaṃkule

rājāvarodhāḥ śataśo vṛtā varṣavaraistataḥ //
nānāyānasamārūḍhāḥ pālitāścādhikāribhiḥ

mahāsainyaiśca saṃruddhā rājāgārādviniryayuḥ //
yajvānaścāgnihotrāṇi śamyārūḍhāni vṛndaśaḥ

śakaṭeṣu samāropya sapatnīkāḥ pratasthire //
tathā pustakabhārāṃśca devatārcākaraṃḍakān

idhmabarhikuśānpātrīḥ saṃbhārānhomasaṃbhṛtān //
vāhayāmāsuranyaiśca śakaṭāvāhakadvijaiḥ

sāmantāmātyabhṛtyāśca purodhā ṛtvijaśca ye //
rājñaḥ prakṛtada(?)sāśca upacāraniyoginaḥ

sarvopacārasaṃbhārānāsate'nye prayāyinaḥ //
koṣāgāraniyuktāśca koṣajātamaśeṣataḥ

samādāya yayustūrṇaṃ rājño'vasarasevakāḥ //
mālākārādayaḥ sarve paṇyajīvādayastathā

svaṃ svaṃ paṇyaṃ samādāya yayū rājaniyoginaḥ //
śreṣṭhaśreṇyādayaḥ sarve purakharvaṭavāsibhiḥ

samaṃ viniryayuḥ svasvavyavahāravilāsakāḥ //
indradyumnasya nṛpateryātrāsamayavāditān

bherīmṛdaṃgapaṭahānvyaśnuvānāndigaṃtaram //
śrutvā janapadāvāsijanāḥ sarve sasaṃbhramāḥ

rājājñāṃ mūrdhni saṃmānya nirgatā nīlaparvatam //
yasya yaśca ṛjuḥ paṃthāḥ sa ca tenaiva jagmivān

na rājamārgaṃ prajavādvyamṛgyaṃta nṛpājñayā //
nīlādriprāptimārgeṇa durgameṇāpi te yayuḥ

indradyumno'pi rājendraḥ samastapuravāsibhiḥ //
caturaṃgānīkinībhiḥ saharṣābhiśca veṣṭitaḥ

śreṇībhūtakṣitipatisyandanāvalimadhyage //
rathe rarāja rājarṣiḥ śakratulya paricchadaḥ

purastrīmaṅgalācāragītalājaprasūnakaiḥ //
maṅgalācāraśobhābhiḥ prasannaśubhacetanaḥ

vātaraṃhairhayairyuktarathena prayayau mudā //
anukūlānilaprodyadghanacchāyasuśītale

nīrajaske mahīpṛṣṭhe samīkṛtacatuṣpathe //
deśādhvanīnaiḥ puruṣaiḥ kānanāṃtaravedibhiḥ

ādiṣṭavartmā nṛpatirmārgasyobhayapārśvagān //
deśānaraṇyāni muhuḥpaśyannānandalocanaḥ

sīmāmutkaladeśasya vibhajaṃtīṃ vanāṃtare //
mārgasthāṃ carcikāṃ prāpa carcitāṃ muṃḍamālayā

avatīrya rathādrājā vinato nāradājñayā //
sāṣṭāṃgapātaṃ tāṃ natvā tuṣṭāvānaṃdacetanaḥ

// indradyumna uvāca // //
namaste tridaśeśāni sarvāpadvinivāriṇi //
brahmaviṣṇuśivādyābhiḥ kalpanābhirudīrite

kāraṇaṃ jagatāmādye prasīda parameśvari //
tvayā vinā jagannaitatkṣaṇamutsahate śive

siddhayaḥ sarvakāryāṇāṃ maṃgalāni ca śāśvate //
tvatpādārādhanaphalaṃ martyaloke hi nānyathā

carācarapaterviṣṇoḥ śaktistvaṃ parameśvari //
yayā sṛjatyavati ca jagatsaṃharate vibhuḥ

carācaraguruṃ devaṃ nīlācalanivāsinam //
anugṛhṇīṣva māṃ devi yathā paśye svacakṣuṣā

// jaiminiruvāca // //
nāradasyopadeśena stutvā devīṃ narādhipaḥ //
āruroha rathaṃ tūrṇaṃ vivasvānudayaṃ yathā

tataḥ pratasthe tarasā sa rājā śrāṃtavāhanaḥ //
citrotpalamahānadyāstīre viralakānane

dhātukandaravikhyāte nyaveśayadanīkinīm //
aparāhṇakriyāṃ kartuṃ yāvadāhnikamādṛtaḥ //2.2.11.१ ००//
jalāvataraṇe nadyāṃ viveśa svapurodhasā //
pūrvaṃ saṃśodhite prājñairviṣakaṇṭakavarjite

snātvā saṃtarpya devāṃśca pitṝnatha viśāṃpatiḥ //
saṃpūjya vidhivadviṣṇuṃ nṛpatīnprakṛtīstataḥ

saṃmānayāmāsa nṛpaḥ saṃniveśāsanādibhiḥ//
nāradena saha śrīmānpraviśyāṃtaḥpuraṃ tataḥ

sudhārasāni bhojyāni bubhuje prītamānasaḥ //
paścimādriṃ tato yāte vivasvati viśāṃpatiḥ

sāyaṃ vidhiṃ samāpyāśu śītabhānau samudyate//
anujīviviśāṃ nāthaḥ sabhāmadhya upāviśat

tatra tasminnarapatirbabhau sātrājyalakṣaṇaḥ //
saṃpūrṇamaṃḍalaścandro jyotiṣāmiva śāradaḥ

kavayaḥ kavayāṃcakuḥ kīrtiṃ tasya sudhāmalām //
jagurgāthāṃ sugrathitāṃ gāyakāḥ kalasusvarāḥ

rūpayauvanalāvaṇyagarvitā gaṇikāstataḥ //
layatānāṃgahāraiśca suśuddhairnanṛtuḥ puraḥ

māgadhāstuṣṭuvuścainaṃ lokottaraśubhākṛtim //
gadyapadyaprabandhādyaiścitraiḥ padakadambakaiḥ

tataḥ sa rājā prānarca vaiṣṇavāgryānsabhāsadaḥ //
susaṃmatairgaṃdhamālyatāṃbūlairatiśobhanaiḥ

nṛpāṃśca śataśastatra sukhāsīnānnṛpājñayā //
saṃbhāvayāmāsa yathāyogyaṃ nṛpatibhājanaiḥ

athāpṛcchanmunivaraṃ nāradaṃ bhagavatpriyam //
siṃhāsanārhe svāsīnaṃ bahumānapuraḥsaram //
bhagavaccaritaṃ śrotuṃ sarvapāpāpanodanam

// indradyumna uvāca // //
bhagavanvedavedāṃganidhāna bhagavatpriya //
tvameva caritaṃ viṣṇorjānāsi jñānacakṣuṣā

hareścāritrasudhayā dṛḍhapaṃkamalīmasam //
kṣālayāṃtarmama mune yadyanukrośako mayi

itthamālāpasaṃmiśre munirājñoḥ kathāṃtare //
praviveśa nṛpaṃ dvāḥstha utkaleśaprasevakaḥ

uvāca devadvārāṃte tiṣṭhatyutkalabhūmipaḥ //
sopāyano devapādapadmaṃ draṣṭuṃ samaulikaḥ

vijñāpitaḥ sa rājarṣi dvāsthenaivaṃ sasaṃbhramaḥ //
uvāca taṃ hi bho viprāḥ śrutvā taddeśamaṇḍanam

kṣetraṃ śrīpuruṣeśasya tadvārttākarṇanotsukaḥ //
praveśayāvilaṃbaṃ taṃ śrīmadoḍhramahīpatim

sa hi nīlagirau viṣṇuṃ samārādhya sunirmalaḥ //
yasya saṃdarśanātsarve bhaviṣyāmo hatāṃhasaḥ

śrutvā tadvacanaṃ sadyo dvārapālo mahīpatim //
praveśayāmāsa sabhāmiṃdradyumnasya bhūpateḥ

viveśoḍhrapatistūrṇaṃ sacivaivairṣṇavaiḥ saha //
nanāmāṃghriyugaṃ vandyamindradyumnasya sādaram

yugaṃ vandyamindradyumnasya sādaram

tamutthāpya ca rājeṃdraḥ puraskṛtya sa vaiṣṇavam //
svāsanāṃte niveśyātha proce sapraśrayaṃ vacaḥ

rājansarvatra kuśalī bhavānoḍhrapate kila //
api devo vijayate nīlādriśikharālayaḥ

kaccitte nirmalā buddhirbhagavatpādapadmayoḥ //
upaiti samacittasya sarvabhūteṣu te harau

oḍhrādhīśastadā tasya vacaḥ śrutvā kṛtāṃjaliḥ //
uvāca praśritaṃ vākyaṃ harṣavismayacaṃcukaḥ

svāminsarvatra kuśalaṃ tvatpādānugrahānmama //
sūrye tapatyaṃdhakāraḥ kathaṃ vā prabhaviṣyati

nisargaguṇasaṃsargavaśīkṛtamahībhujā //
tvayā sanāthā pṛthivī jiṣṇunevāmarāvatī

sadā dharmaścatuṣpādastvayi śāsati medinīm //
niṣedhācaraṇa rājankevalaṃ śrūyate śrutau

rājanītiṣu ye rājñāṃ guṇāḥ samuditāstvayi //
ta ekaikaṃ kṣitibhujāṃ gatā dārṣṭāṃtikaṃ vibho

etāvadapi sāmrājyaṃ durlabhaṃ te nṛpottama //
aṣṭādaśadvīpavatī kṣitirekagṛhopamā

yadi tvāṃ nāsṛjadbrahmā vatsalaṃ sarvajaṃtuṣu //
kathaṃ śokavihīnāḥ syurmṛteṣvātmajabaṃdhuṣu

sādhāraṇā nṛpatayo viṣṇoraṃśā iti śrutiḥ //
bhavānsākṣāttu bhagavānko'nya īdṛgguṇākaraḥ

dakṣiṇodadhi tīre'sti nīlādriḥ kānanāvṛtaḥ //
na tatra lokasaṃcārastatrāste sā'pi devatā

vātyayā vālukākīrṇaḥ sāṃprataṃ śrūyate tu saḥ //
tadvaśānmama rājye'pi durbhikṣamarakādikam

tvayyāgate tu sarvasminkuśalaṃ me bhaviṣyati //
ityuktavaṃtaṃ nṛpatirutkaleśaṃ dvijottamāḥ

visarjayāmāsa tadā saṃniveśāya mānayan //
nāradaṃ prekṣya nirviṇṇaḥ kimetaditi bho mune

yadarthaṃ me śramastaṃ ca viphalaṃ hi vitarkaye //
ityuktavaṃtaṃ taṃ prāha nāradastu trikālavit

na kāryo vismayaste'tra bhāgyavānvaiṣṇavottamaḥ //
vaiṣṇavānāṃ na vāṃchā hi viphalā jāyate kvacit

avaśyaṃ prekṣase rājanbibhrataṃ pārthivaṃ vapuḥ //
kāraṇaṃ jagatāmādiṃ nārāyaṇamanāmayam

tvadanugrahahetorvai kṣitāvavatariṣyati //
jagaccarācaraṃ sarvaṃ viṣṇorvaśamupāgatam

na kasyāpi vaśe so'pi paramātmā sanātanaḥ //
kevalaṃ bhaktivaśago bhagavānbhaktavatsalaḥ

brahmādikīṭaparyaṃtaṃ suguptaṃ yasya māyayā //
sa kathaṃ parataṃtraḥ syādṛte bhaktajanānnṛpa

dharmārthakāmamokṣāṇāṃ mūlaṃ bhaktirmuradviṣaḥ //
saiva tadgrahaṇopāyastāmṛte nāsti kiṃcana

eka eva yadā viṣṇurbahudhā svasya māyayā //
tamṛte paramātmānaṃ sukhaheturna vidyate

ye'pyanye śivadurgādyāstaistaiḥ karmabhirāvṛtāḥ //
yacchaṃti pūjitāḥ kāmaṃ te'pi viṣṇuparāyaṇāḥ

antaryāmī sa bhagavāndevānāmapi hṛtsthitaḥ //
yāvatphalaṃ prerayati tāvadeva dadatyamī

vaiṣṇavastvaṃ ca rājeṃdra padmayoneśca paṃcamaḥ //
aṣṭādaśānāṃ vidyānāṃ pārago vṛttasaṃsthitaḥ

nyāyena rakṣitā pṛthvīṃ viśeṣādbrāhmaṇārcakaḥ //
avaśyaṃ drakṣyasi kṣetre vaikuṇṭhaṃ carmacakṣuṣā

pitāmaho'pyatra kārye bhavato māṃ niyuktavān //
sarvaṃ te kathayiṣyāmi prāpte kṣetrottame nṛpa

sāṃprataṃ rātriśeṣo hi tṛtīyaṃ yāmamṛcchati //
svāntānniveśānnirgaṃtuṃ rājña ājñāpayādhunā

tvamapyaṃtargṛhaṃ yāhi nidrāyā vaśamāgataḥ

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetramāhātmye jaiminiṛṣi saṃvāda ekādaśo'dhyāyaḥ