Skanda Purana · Chapter 1.2.3

// mārkaṃḍeya uvāca // //
bhagavanvaṃcanenālaṃ tvadekapravaṇe mayi //
kiṃ mādṛśo'sti te śiṣyastvatkṛpaivātra sākṣiṇī

sthāneṣu prāktvadukteṣu phalāni ca pṛthakpṛthak //
yatra sarvaphalaprāptiḥ sthānaṃ tadvada me vibho

carācarāṇāṃ bhūtānāṃ jānatāmapyajānatām //
yasya smaraṇamātreṇa muktistadvada deśika

paśyaitena mayaikena bhagavānnānurādhyase //
sarvairapyetadarthaṃ hi munibhiḥ parivāryase

pulahena pulastyena vaśiṣṭhena marīcinā //
agastyena dadhīcena nakruṇā bhṛguṇātriṇā

jābālinā jaimininā dhaumyena jamadagninā //
upayājena yājena bharatenārvarīvatā

pippalādena kaṇṭhena kumudenopamanyunā //
kumudākṣeṇa kutsena vatsena varataṃtunā

vibhāṃḍakena vyāsena kaṇvarīṣeṇa kaṃḍunā //
māṃḍavyena mataṃgena kukṣiṇā māṃḍakarṇinā

caṃḍakauśikaśāṃḍilyaśākaṭāyanakauśikaiḥ //
śātātapamadhucchandogargasaubhariromaśaiḥ

āpastaṃbapṛthustaṃbabhārgavodaṃkaparvataiḥ //
bhāradvājena dālbhyena dāṃtena śvetaketunā

kauṃḍinyapuṇḍarīkābhyāṃ raibhyeṇa tṛṇabindunā //
vālmīkinā nāradena vahninā dṛḍhamanyunā

bodhāyanasubodhābhyāṃ hārītena mṛkaṇḍunā //
durvāsasātitīkṣṇena jālapādena śaktinā

kāṃkvāryeṇa nadantena devadattena nyaṃkunā //
suśrutā cāgniveśyena gālavena marutvatā

lokākṣiṇā viśravasā saiṃdhavena sumaṃtunā //
śiśupāyanamaudgalyapathyacāvanamāturaiḥ

ṛṣyaśṛṅgaikapātkrauṃcadṛḍhagomukhadevalaiḥ //
aṃgirovāmadevaurvapataṃjalikapiṃjalaiḥ

sanatkumārasanakasanaṃdanasanātanaiḥ //
hiraṇyanābhasatyākhyavātāśanasuhotṛbhiḥ

maitreyapuṣpajitsatyatapaḥśālīṣyaśaiśiraiḥ //
nidāghotathyasaṃvarttaśaulkāyaniparāśaraiḥ

vaiśaṃpāyanakauśalyaśāradvatakapidhvajaiḥ //
kuśasvārcikakaivalyayājñavalkyāśvalāyanaiḥ

kṛṣṇātapottamānaṃtakaruṇāmalakapriyaiḥ //
carakeṇa pavitreṇa kapilena kaṇāśinā

naranārāyaṇābhyāṃ ca divyaiścānyairmaharṣibhiḥ //
matpraśnottaraśuśrūṣātatparaiḥ pratyavekṣyase

māheśvarāgragaṇyastvaṃ samastāgamapāragaḥ //
vyāptaśca sarvalokeṣu yasmāttadanusādhi naḥ

tvanmukhādeva bhagavanvayamete suśikṣitāḥ //
pūrvameva tvayā deva kiṃ vānyadupapadyate

divyāgamapurāṇāni draṣṭavyaḥ parameśvaraḥ //
kātyāyanī vā skando vā bhagavānvātha vā bhavān

tvayi yadyasti no bhaktirdayā cāsmāsu te yadi //
rahasyamidamudghāṭya prasādaṃ kartumarhasi

itthaṃ mṛkaṇḍutanayena sa naṃdikeśo vijñāpitaḥ savinayaṃ smayamānavaktram //
taṃ prāha connatataraṃ śivabhaktimastu prāgbhaktitoṣitaśivāptaśarīrasiddhim

// iti śrīskānde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe'ruṇācalamāhātmya uttarārdhe'ruṇācalākhyarahasyasthānapraśnavarṇanaṃnāma tṛtīyo'dhyāyaḥ