સ્કંદ પુરાણ · અધ્યાય 1.2.3

॥ માર્કંડેય ઉવાચ ॥ ॥
ભગવન્વંચનેનાલં ત્વદેકપ્રવણે મયિ ॥
કિં માદૃશોઽસ્તિ તે શિષ્યસ્ત્વત્કૃપૈવાત્ર સાક્ષિણી

સ્થાનેષુ પ્રાક્ત્વદુક્તેષુ ફલાનિ ચ પૃથક્પૃથક્ ॥
યત્ર સર્વફલપ્રાપ્તિઃ સ્થાનં તદ્વદ મે વિભો

ચરાચરાણાં ભૂતાનાં જાનતામપ્યજાનતામ્ ॥
યસ્ય સ્મરણમાત્રેણ મુક્તિસ્તદ્વદ દેશિક

પશ્યૈતેન મયૈકેન ભગવાન્નાનુરાધ્યસે ॥
સર્વૈરપ્યેતદર્થં હિ મુનિભિઃ પરિવાર્યસે

પુલહેન પુલસ્ત્યેન વશિષ્ઠેન મરીચિના ॥
અગસ્ત્યેન દધીચેન નક્રુણા ભૃગુણાત્રિણા

જાબાલિના જૈમિનિના ધૌમ્યેન જમદગ્નિના ॥
ઉપયાજેન યાજેન ભરતેનાર્વરીવતા

પિપ્પલાદેન કણ્ઠેન કુમુદેનોપમન્યુના ॥
કુમુદાક્ષેણ કુત્સેન વત્સેન વરતંતુના

વિભાંડકેન વ્યાસેન કણ્વરીષેણ કંડુના ॥
માંડવ્યેન મતંગેન કુક્ષિણા માંડકર્ણિના

ચંડકૌશિકશાંડિલ્યશાકટાયનકૌશિકૈઃ ॥
શાતાતપમધુચ્છન્દોગર્ગસૌભરિરોમશૈઃ

આપસ્તંબપૃથુસ્તંબભાર્ગવોદંકપર્વતૈઃ ॥
ભારદ્વાજેન દાલ્ભ્યેન દાંતેન શ્વેતકેતુના

કૌંડિન્યપુણ્ડરીકાભ્યાં રૈભ્યેણ તૃણબિન્દુના ॥
વાલ્મીકિના નારદેન વહ્નિના દૃઢમન્યુના

બોધાયનસુબોધાભ્યાં હારીતેન મૃકણ્ડુના ॥
દુર્વાસસાતિતીક્ષ્ણેન જાલપાદેન શક્તિના

કાંક્વાર્યેણ નદન્તેન દેવદત્તેન ન્યંકુના ॥
સુશ્રુતા ચાગ્નિવેશ્યેન ગાલવેન મરુત્વતા

લોકાક્ષિણા વિશ્રવસા સૈંધવેન સુમંતુના ॥
શિશુપાયનમૌદ્ગલ્યપથ્યચાવનમાતુરૈઃ

ઋષ્યશૃઙ્ગૈકપાત્ક્રૌંચદૃઢગોમુખદેવલૈઃ ॥
અંગિરોવામદેવૌર્વપતંજલિકપિંજલૈઃ

સનત્કુમારસનકસનંદનસનાતનૈઃ ॥
હિરણ્યનાભસત્યાખ્યવાતાશનસુહોતૃભિઃ

મૈત્રેયપુષ્પજિત્સત્યતપઃશાલીષ્યશૈશિરૈઃ ॥
નિદાઘોતથ્યસંવર્ત્તશૌલ્કાયનિપરાશરૈઃ

વૈશંપાયનકૌશલ્યશારદ્વતકપિધ્વજૈઃ ॥
કુશસ્વાર્ચિકકૈવલ્યયાજ્ઞવલ્ક્યાશ્વલાયનૈઃ

કૃષ્ણાતપોત્તમાનંતકરુણામલકપ્રિયૈઃ ॥
ચરકેણ પવિત્રેણ કપિલેન કણાશિના

નરનારાયણાભ્યાં ચ દિવ્યૈશ્ચાન્યૈર્મહર્ષિભિઃ ॥
મત્પ્રશ્નોત્તરશુશ્રૂષાતત્પરૈઃ પ્રત્યવેક્ષ્યસે

માહેશ્વરાગ્રગણ્યસ્ત્વં સમસ્તાગમપારગઃ ॥
વ્યાપ્તશ્ચ સર્વલોકેષુ યસ્માત્તદનુસાધિ નઃ

ત્વન્મુખાદેવ ભગવન્વયમેતે સુશિક્ષિતાઃ ॥
પૂર્વમેવ ત્વયા દેવ કિં વાન્યદુપપદ્યતે

દિવ્યાગમપુરાણાનિ દ્રષ્ટવ્યઃ પરમેશ્વરઃ ॥
કાત્યાયની વા સ્કન્દો વા ભગવાન્વાથ વા ભવાન્

ત્વયિ યદ્યસ્તિ નો ભક્તિર્દયા ચાસ્માસુ તે યદિ ॥
રહસ્યમિદમુદ્ઘાટ્ય પ્રસાદં કર્તુમર્હસિ

ઇત્થં મૃકણ્ડુતનયેન સ નંદિકેશો વિજ્ઞાપિતઃ સવિનયં સ્મયમાનવક્ત્રમ્ ॥
તં પ્રાહ ચોન્નતતરં શિવભક્તિમસ્તુ પ્રાગ્ભક્તિતોષિતશિવાપ્તશરીરસિદ્ધિમ્

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પ્રથમે માહેશ્વરખણ્ડેઽરુણાચલમાહાત્મ્ય ઉત્તરાર્ધેઽરુણાચલાખ્યરહસ્યસ્થાનપ્રશ્નવર્ણનંનામ તૃતીયોઽધ્યાયઃ