Śiṣyalekha · Verses 62-81

mleccheṣu vā narakapālasamavrateṣu tiryakṣu vā kṛtaparasparabhakṣaṇeṣu |
jātiṃ labheta yadi tatra tadeva śīlamāsevate patati yena punaḥ prapātam

yatprāpya janmajaladherapi yānti pāramāropayanti śivamuttamabodhibījam |
cintāmaṇerapi samabhyadhikaṃ guṇaughairmānuṣyakaṃ ka iha tadviphalīkaroti

atyantadurlabhamupetya manuṣyabhāvaṃ yadvāñchitaṃ tadabhivāñchitameva kuryāt |
caṇḍānilākulitadīpaśikhācalasya na hyāyuṣaḥ kṣaṇamapi sthitiniścayo'sti

śvaḥ kāryametadidamadya paraṃ muhūrtādetatkṣaṇāditi janena vicintyamāne |
tiryagnirīkṣaṇapiśaṅgitakāladaṇḍaḥ śaṅke hasatyasahanaḥ kupitaḥ kṛtāntaḥ

āyāti phullakusumaḥ kusumāgamo 'yameṣā śaśāṅkatilakā śaradāgateti |
sarvaḥ prahṛṣyati jano na punarmamaitadāyuḥ prahīṇamiti yāti paraṃ viṣādam

āsannapīnaśaśimaṇḍalamaṇḍanāsu viśrāntavāriguruvāridamekhalāsu |
niḥsaṅgamāsu giriśṛṅgavanasthalīṣu dhanyā nayantyanilacañcalaśīlamāyuḥ

kiṃ sā ratirbhavati nandanabhūmikāsu divyāṅganājaghanapṛṣṭhaśilātalāsu |
yā mugdhamugdhaharaṇīgaṇasevitāsu niḥsaṅgacārusubhagāsu vanasthalīṣu

divyāṅganāparimalāvilaye nibhinnasaṃtānakastavakahāsavitaṇvanīṣu |
kiṃ sā ratiḥ surasaritsu viviktaramyatīrāsu yā śucijalāsu vane nadīṣu

viśālāḥ śailānāṃ viratajanasaṃpātasubhagā guhā gāḍhābhogā haritavanalekhāparikarāḥ |
sarittīrāsannā surajamadhurairnirjanaravairna gamyāḥ kleśāgnerayamiti vadantīva pathikān

māyāmarīcidakacandrataraṃgakalpāḥ kāmā jinena gaditā vibhavāḥ striyaśca |
svapnāntadurlabhitavibhramavipralabdhā bālāḥ patanti nirayeṣvapi yeṣu saktāḥ

āpātamātramadhurā viṣayā viṣaśca ghorā viṣākakaṭukā viṣayā viṣaśca |
mohāndhakāragahanā viṣayā viṣaśca durvāravegacapalā viṣayā viṣaśca

kāmā viṣaśca viṣayāśca nirūpyamānāḥ śreyo viṣaṃ na viṣayā viṣamasvabhāvāḥ |
ekatra janmani viṣaṃ viṣatāṃ prayāti janmāntare 'pi viṣayā viṣatāṃ prayānti

viṣasya viṣayāṇāṃ ca dūramatyantagocaram | upayuktaṃ viṣaṃ hanti viṣayāḥ smaraṇādapi

saṃsṛṣṭaṃ vrajati viṣaṃ viṣeṇa śāntiṃ sanmantrairagadadharaiśca sādhyamānam |
yuktaṃ vā bhavati viṣaṃ hitāya nṝṇāṃ na tvevaṃ viṣayamahāviṣaṃ kadācit

yadvadvṛṣo viṣamakūpataṭāntatrūḍho dūrvāpravālalavalālasamānasaḥ san |
śvabhre patatyatha ca nāstu ta eva lābhastadvatsukhānvitamatiḥ khalu jīvalokaḥ

mandākinījalarayākulitālakābhiḥ krīḍāvihāramanubhūya sahāpsarobhiḥ |
bhūyo bhramanti kharavaitaraṇe taraṃgasaṃparkajarjaritadāruṇaduḥkhabhājaḥ

āstīrṇakalpatarupallvasaṃstareṣu kāntāsakhāḥ suravaneṣu makhaṃ vihṛtya |
bhūyo bhramanti niśitākulaśastrapātavicchinnagātramasipattravanasthalīṣu

sparśe sukhāsu padapātanatonnatāsu merornitambapadavīṣu ciraṃ vihṛtya |
uttaptasaikatakukūlakṛśānurāśiṃ saṃsīryamāṇacaraṇorubhujo bhramanti

gatvā divaṃ mukharabhāsurakiṅkanīkahārāvalīnikaradanturitairvimānaiḥ |
ghoraṃ sthirāśrayamameyamanantapāramandhaṃ tamaḥ punaradhaḥśirasā patanti

śakro 'pi yatra surakiṃnaranāgayakṣamauliprabhāprakarapiñjarapādapīṭhaḥ |
karmānilākulagatiḥ kugatiḥ prayāti ko nāma tatra puruṣo na bhayaṃ bhajeta