શિષ્યલેખ · શ્લોક 62-81

મ્લેચ્છેષુ વા નરકપાલસમવ્રતેષુ તિર્યક્ષુ વા કૃતપરસ્પરભક્ષણેષુ ।
જાતિં લભેત યદિ તત્ર તદેવ શીલમાસેવતે પતતિ યેન પુનઃ પ્રપાતમ્

યત્પ્રાપ્ય જન્મજલધેરપિ યાન્તિ પારમારોપયન્તિ શિવમુત્તમબોધિબીજમ્ ।
ચિન્તામણેરપિ સમભ્યધિકં ગુણૌઘૈર્માનુષ્યકં ક ઇહ તદ્વિફલીકરોતિ

અત્યન્તદુર્લભમુપેત્ય મનુષ્યભાવં યદ્વાઞ્છિતં તદભિવાઞ્છિતમેવ કુર્યાત્ ।
ચણ્ડાનિલાકુલિતદીપશિખાચલસ્ય ન હ્યાયુષઃ ક્ષણમપિ સ્થિતિનિશ્ચયોઽસ્તિ

શ્વઃ કાર્યમેતદિદમદ્ય પરં મુહૂર્તાદેતત્ક્ષણાદિતિ જનેન વિચિન્ત્યમાને ।
તિર્યગ્નિરીક્ષણપિશઙ્ગિતકાલદણ્ડઃ શઙ્કે હસત્યસહનઃ કુપિતઃ કૃતાન્તઃ

આયાતિ ફુલ્લકુસુમઃ કુસુમાગમો ઽયમેષા શશાઙ્કતિલકા શરદાગતેતિ ।
સર્વઃ પ્રહૃષ્યતિ જનો ન પુનર્મમૈતદાયુઃ પ્રહીણમિતિ યાતિ પરં વિષાદમ્

આસન્નપીનશશિમણ્ડલમણ્ડનાસુ વિશ્રાન્તવારિગુરુવારિદમેખલાસુ ।
નિઃસઙ્ગમાસુ ગિરિશૃઙ્ગવનસ્થલીષુ ધન્યા નયન્ત્યનિલચઞ્ચલશીલમાયુઃ

કિં સા રતિર્ભવતિ નન્દનભૂમિકાસુ દિવ્યાઙ્ગનાજઘનપૃષ્ઠશિલાતલાસુ ।
યા મુગ્ધમુગ્ધહરણીગણસેવિતાસુ નિઃસઙ્ગચારુસુભગાસુ વનસ્થલીષુ

દિવ્યાઙ્ગનાપરિમલાવિલયે નિભિન્નસંતાનકસ્તવકહાસવિતણ્વનીષુ ।
કિં સા રતિઃ સુરસરિત્સુ વિવિક્તરમ્યતીરાસુ યા શુચિજલાસુ વને નદીષુ

વિશાલાઃ શૈલાનાં વિરતજનસંપાતસુભગા ગુહા ગાઢાભોગા હરિતવનલેખાપરિકરાઃ ।
સરિત્તીરાસન્ના સુરજમધુરૈર્નિર્જનરવૈર્ન ગમ્યાઃ ક્લેશાગ્નેરયમિતિ વદન્તીવ પથિકાન્

માયામરીચિદકચન્દ્રતરંગકલ્પાઃ કામા જિનેન ગદિતા વિભવાઃ સ્ત્રિયશ્ચ ।
સ્વપ્નાન્તદુર્લભિતવિભ્રમવિપ્રલબ્ધા બાલાઃ પતન્તિ નિરયેષ્વપિ યેષુ સક્તાઃ

આપાતમાત્રમધુરા વિષયા વિષશ્ચ ઘોરા વિષાકકટુકા વિષયા વિષશ્ચ ।
મોહાન્ધકારગહના વિષયા વિષશ્ચ દુર્વારવેગચપલા વિષયા વિષશ્ચ

કામા વિષશ્ચ વિષયાશ્ચ નિરૂપ્યમાનાઃ શ્રેયો વિષં ન વિષયા વિષમસ્વભાવાઃ ।
એકત્ર જન્મનિ વિષં વિષતાં પ્રયાતિ જન્માન્તરે ઽપિ વિષયા વિષતાં પ્રયાન્તિ

વિષસ્ય વિષયાણાં ચ દૂરમત્યન્તગોચરમ્ । ઉપયુક્તં વિષં હન્તિ વિષયાઃ સ્મરણાદપિ

સંસૃષ્ટં વ્રજતિ વિષં વિષેણ શાન્તિં સન્મન્ત્રૈરગદધરૈશ્ચ સાધ્યમાનમ્ ।
યુક્તં વા ભવતિ વિષં હિતાય નૄણાં ન ત્વેવં વિષયમહાવિષં કદાચિત્

યદ્વદ્વૃષો વિષમકૂપતટાન્તત્રૂઢો દૂર્વાપ્રવાલલવલાલસમાનસઃ સન્ ।
શ્વભ્રે પતત્યથ ચ નાસ્તુ ત એવ લાભસ્તદ્વત્સુખાન્વિતમતિઃ ખલુ જીવલોકઃ

મન્દાકિનીજલરયાકુલિતાલકાભિઃ ક્રીડાવિહારમનુભૂય સહાપ્સરોભિઃ ।
ભૂયો ભ્રમન્તિ ખરવૈતરણે તરંગસંપર્કજર્જરિતદારુણદુઃખભાજઃ

આસ્તીર્ણકલ્પતરુપલ્લ્વસંસ્તરેષુ કાન્તાસખાઃ સુરવનેષુ મખં વિહૃત્ય ।
ભૂયો ભ્રમન્તિ નિશિતાકુલશસ્ત્રપાતવિચ્છિન્નગાત્રમસિપત્ત્રવનસ્થલીષુ

સ્પર્શે સુખાસુ પદપાતનતોન્નતાસુ મેરોર્નિતમ્બપદવીષુ ચિરં વિહૃત્ય ।
ઉત્તપ્તસૈકતકુકૂલકૃશાનુરાશિં સંસીર્યમાણચરણોરુભુજો ભ્રમન્તિ

ગત્વા દિવં મુખરભાસુરકિઙ્કનીકહારાવલીનિકરદન્તુરિતૈર્વિમાનૈઃ ।
ઘોરં સ્થિરાશ્રયમમેયમનન્તપારમન્ધં તમઃ પુનરધઃશિરસા પતન્તિ

શક્રો ઽપિ યત્ર સુરકિંનરનાગયક્ષમૌલિપ્રભાપ્રકરપિઞ્જરપાદપીઠઃ ।
કર્માનિલાકુલગતિઃ કુગતિઃ પ્રયાતિ કો નામ તત્ર પુરુષો ન ભયં ભજેત