Śiṣyalekha · Verses 42-61

dhāvañjavena niśitakṣurasaṃstareṣu vicchinnamūrtirasipattralatāvaneṣu |
kūpe patatyaśaraṇaḥ śitaśūlaśaktiprāsāsihāsanijitāntakavaktrarandhe

tīvrātapakvaṣitaduḥsahākhinnadeho vṛkṣānnirīkṣya ghananīladalānupaiti |
tatpattraśastraśatapātavibhinnamūrtistatraiva tiṣṭhati ciraṃ virutaikabandhuḥ

paryantanirgataśikhāśatavisphuliṅgamālākulajvalitamaṇḍanamaṇḍitābhiḥ |
premāntarapraṇayanirdayamaṅganābhirāliṅgyate krakacakarkaśavigrahābhiḥ

śailābhabhīṣaṇavisaṃkaṭameṣayūthasaṃghaṭṭacūrṇitaviśīrṇasamastagātraḥ |
āpātavātalavaśaityasamarpitāsuḥ saṃcūrṇyate punarasau śataśastathaiva

uttrāsito mukharakhaḍgaśivāsahasrairārohati drutapadaṃ punareva raudrān |
tāṃ kūṭaśālmalimadhomukhakaṇṭhakaughanirbhidyamānavapurarpitagāḍhaśalyaḥ

mṛtyoḥ karāntagalitairiva kālapāśairāśīviṣairdhṛtaphaṇairdṛḍhasaṃyatasya |
utpāṭayanti nayane sphurataḥ prasahya tatra sthitasya bakavāyasakaṅkagṛdhrāḥ

teṣāṃ mukhaiḥ kuliśakoṭinibhaiḥ prasahya nidrāyamānavapureṣa kṛtārtanādaḥ |
lohonmukhapracurapīvaratīkṣṇaśaṅkunirbhinnamūrtiravarohati naṣṭacetāḥ

ādīptaśūlaśitaśalyavibhinnadehāstatraiva kecidavaroḍhumaśaknuvantaḥ |
ghorairyadā niśitaśastramukhairayobhirākṛṣyamāṇavisaradgalitāntrasūtrāḥ

kecitpatanti viṣameṣū girestaṭeṣu kecitparikvaṣitatailakaṭāhakukṣau |
uttaptavālukabhuvaṃ visṛtasphuliṅgāmenya viśanti padasaṅgamanāpnuvantaḥ

eke punaḥ simisimāyitamūkṣmajantusaṃghātajarjaritasūnavipūtikāyāḥ |
saṃcālamātramapi hartumaśaknuvanto jīvanti karmamayapāśanibaddhajīvāḥ

asthīnyapi praṇayatā rahitopamena śītena jarjaritavepitapiṇḍitāṅgāḥ |
utpannabhinnapiṭakā śatajātajantujagdhakṣataśrutasamajjavaśālaśīkāḥ

saṃdaṣṭalagnadaśanāstanulomakeśāḥ saṃghaṭṭitavyadhitalocanakarṇakaṇṭhāḥ |
ā cetaso jaḍataratvamupetakāyāstiṣṭhanti śītanarakeṣu bhṛśaṃ nadantaḥ

vikīrṇabahalogragandhakaṭudhūmadhūmrāntaraṃ vijṛmbhitaśikhākaraprakararudradigmaṇḍalam |
sitāsthisakalāṭalīracitabhūṣaṇaṃ bhīṣaṇaṃ pravṛttamiva bhairavaṃ sasujacarma hāhāravam

caṭacchaḍhaditi kvacitsphuradurusphuliṅgākulaṃ chamacchamaditi kṣaṇasthagitajṛmbhitaṃ medasi |
kaṭatkaṭaditi kvaṇantamuraso 'sthirandhrāntare patanti narakānalaṃ vijitakalpakālānalam

purāṇatṛṇajarjarajvalitaparśukā x x x x x x x x latālavo dhagiti vāntadīptārciṣaḥ |
sphuṭajjaṭharaniḥsṛtaprasaradantrasaṃtrāsitāḥ vimuktagurughargharadhvanitamātraśeṣakriyāḥ

nirīkṣya vivarāntaraṃ muhurapāvṛtaṃ dūrataḥ prayānti kathamapyamī pramataduḥkhamokṣāśrayāḥ |
yadā tadapi ghaṭṭitaṃ bhavati karmapaṭṭairdṛḍhaistadā viphalavāñchitāḥ kimapi yānti duḥkhāntaram

jvalanniśitatomaraprakaravarṣaṇānantaraṃ dravīkṛtamayorasaṃ dahanaraśmimālākulam |
pibanti galadasravo narakapāladaṇḍāhatā mukhaśravaṇanāsikāvivaralabdhadhūmodgamāḥ

ādagdhavisphuṭitanetraśiraḥ kapālamastiṣkadīpitapiśaṅgaśikhākalāpaḥ |
śuṣkendhanaprakaranirdayatāmupaiti śokāgnikoṣa iva gātracayeṣu teṣām

te jantavo girinadījalalolajīvā auṣṭhyaṃ tadeva narakeṣu ta eva cāgniḥ |
karmāṇi tatkhalu tathā pariṇāmayanti sarvaṃ yathā paramadāruṇamāvibhāti

ātmīyakarmavivaśākulaveṣṭitasya muktasya pāpanilayānnirayāṃ kathaṃcit |
lokeṣvanantagatibhedabhayākuleṣu mānuṣyakaṃ paramadurlabhameva jantoḥ