Śiṣyalekha · Verses 21-41

tatra sthitaṃ tamaśucau parivartamānamārdrolbaveṣṭitatanuṃ bahalogragandham |
pūrvasmṛtivraṇamivolbaṇadoṣapākaṃ bhinnaṃ jahāti ghṛṇayeva nipīḍyamānaḥ

sarvopacāravivaśaṃ śithilākulāṅgamutsṛjya bālyamupajātakaṇairabhāvaḥ |
tuṅgeṣu yauvanagirīndradarītaṭeṣu mohāyate viṣayadṛṣṭiviṣālayeṣu

sa tato'pi patatyacetanaḥ patito naiva jahāti vikriyām |
ajarāmaramātmavigrahaṃ lalitaṃ manyata evaṃ bāliśaḥ

sa vihāya munīndrasevitaṃ supathaṃ yātyapathena mohitaḥ |
rabhasena parāṃ vicūrṇayan gajavajjātamado niraṅkuśaḥ

atha tasya balādanicchataḥ śirasi nyastapadā sunirdayam |
niśitaṃ palitāṅkuśaṃ jarā kariṇo hastipakīva yacchati

sa tathāpi vijihyaceṣṭitaḥ kuśalenāpi bhayādivojjhitaḥ |
sukṛtāni karoti mohitaḥ śaravatsvātmavadhāya puṣpitaḥ

atha taṃ prahasannivāntakaḥ palitaughairdarśanairivolbaṇaiḥ |
śirasi grasituṃ pravartate nirupāyapraśamo jarārujaḥ

vidalanti tato 'sya sanvayo matirutkrāmati hīyate gatiḥ |
kṣayameti vapuḥ pariślaṣaṃ niyataṃ vardhata eva jīvitāśā

kramaśaśca nimīlitendriyo hataśaktirviṣayeṣu lālasaḥ |
upagacchati yāmayaṃ daśāṃ narake sā yadi bhīma eva saḥ

kathamevamidaṃ mayā kṛtaṃ kathamevaṃ na kṛtaṃ hatā gatiḥ |
kathamevamayaṃ mayāstakaḥ śirasi nyastapado na lakṣitaḥ

iti x x x cittamādhibhiḥ kukṛtaiḥ śokamayairupadrutaḥ |
vyadhitena savāṣpavāriṇā karuṇaṃ bandhujanena vīkṣitaḥ

vinipīḍitamarmabandhanastimiraṃ ghorataraṃ viśanniva |
vijahāti nijaṃ kaḍevaraṃ dayitaṃ yatnapareṇa rakṣitam

sa virauti gṛhītamūrdhajo yamadūtairdṛḍhapāśasaṃyataḥ |
na śṛṇoti jano 'sya bhāṣitaṃ svakṛtākrandaravādivākulaḥ

prastāraśailasaridantaradurgameṣu mārgeṣu tīkṣṇatarakaṇṭakasaṃkaṭeṣu |
ghoraiḥ kṛtāntapuruṣairyamadaṇḍaghātamākṛṣyate galaniṣevitakālapāśaḥ

dūrānnirīkṣya vimalaṃ salilaṃ pipāsurabhyeti gāḍhatṛṣito yadayaṃ tadeva |
keśaughaśaivalavimiśritapūtipūyapaṅkāpaṅkitaṃ kṣatajavaṃ jalatā prayāti

velānilākulitaśīkaraśītasānumānīlacandanataruṃ malayaṃ prayāti |
so 'pyasya caṇḍavanadāvaśikhāvalīḍhaśīrṇolmukaprakaradanturatāṃ prayāti

yadyeti vārinidhimudvatabhīmalolakallolabhedajanitolvaṇaphenahāsam |
so 'pyasya taptaviṣadāruṇasaikatābhravibhrāntakarkaśamarunmarutāṃ prayāti

tatra sthitasya jaladāgamaśaṃsino 'sya sāṅgāradhūmakuliśopalavisphuliṅgam |
vidyullatākanakarājipiśaṅgamaṅge nārācavarṣamabhivarṣati vārivahaḥ

tāpārditasya dahanaṃ tu hitānilo 'pi śītārditasya dahano 'pi karoti śītam |
atyugrakarmapariṇāmavimohitasya viśvaṃ tadāsya viparītamidaṃ vibhāti

śūcīmukhasya bahuyojanabhīmakukṣerārtasya vāripibato 'pi mahāsamudre |
aprāpta eva pṛthukaṇṭhadarīprapātaśleṣmoṣmaṇā jalalavaḥ pariśoṣameti || Śl_40
cañcacchaṭānika x pīvarasārameyadaṃṣṭrāṅkurāgrakuliśakṣatacūrṇitāṅgaḥ |
kṣārāmbupūrṇataravaitaraṇītaṭeṣu niṣkṛṣyate viṣamakoṭiśitopaleṣu