શિષ્યલેખ · શ્લોક 21-41

તત્ર સ્થિતં તમશુચૌ પરિવર્તમાનમાર્દ્રોલ્બવેષ્ટિતતનું બહલોગ્રગન્ધમ્ ।
પૂર્વસ્મૃતિવ્રણમિવોલ્બણદોષપાકં ભિન્નં જહાતિ ઘૃણયેવ નિપીડ્યમાનઃ

સર્વોપચારવિવશં શિથિલાકુલાઙ્ગમુત્સૃજ્ય બાલ્યમુપજાતકણૈરભાવઃ ।
તુઙ્ગેષુ યૌવનગિરીન્દ્રદરીતટેષુ મોહાયતે વિષયદૃષ્ટિવિષાલયેષુ

સ તતોઽપિ પતત્યચેતનઃ પતિતો નૈવ જહાતિ વિક્રિયામ્ ।
અજરામરમાત્મવિગ્રહં લલિતં મન્યત એવં બાલિશઃ

સ વિહાય મુનીન્દ્રસેવિતં સુપથં યાત્યપથેન મોહિતઃ ।
રભસેન પરાં વિચૂર્ણયન્ ગજવજ્જાતમદો નિરઙ્કુશઃ

અથ તસ્ય બલાદનિચ્છતઃ શિરસિ ન્યસ્તપદા સુનિર્દયમ્ ।
નિશિતં પલિતાઙ્કુશં જરા કરિણો હસ્તિપકીવ યચ્છતિ

સ તથાપિ વિજિહ્યચેષ્ટિતઃ કુશલેનાપિ ભયાદિવોજ્ઝિતઃ ।
સુકૃતાનિ કરોતિ મોહિતઃ શરવત્સ્વાત્મવધાય પુષ્પિતઃ

અથ તં પ્રહસન્નિવાન્તકઃ પલિતૌઘૈર્દર્શનૈરિવોલ્બણૈઃ ।
શિરસિ ગ્રસિતું પ્રવર્તતે નિરુપાયપ્રશમો જરારુજઃ

વિદલન્તિ તતો ઽસ્ય સન્વયો મતિરુત્ક્રામતિ હીયતે ગતિઃ ।
ક્ષયમેતિ વપુઃ પરિશ્લષં નિયતં વર્ધત એવ જીવિતાશા

ક્રમશશ્ચ નિમીલિતેન્દ્રિયો હતશક્તિર્વિષયેષુ લાલસઃ ।
ઉપગચ્છતિ યામયં દશાં નરકે સા યદિ ભીમ એવ સઃ

કથમેવમિદં મયા કૃતં કથમેવં ન કૃતં હતા ગતિઃ ।
કથમેવમયં મયાસ્તકઃ શિરસિ ન્યસ્તપદો ન લક્ષિતઃ

ઇતિ x x x ચિત્તમાધિભિઃ કુકૃતૈઃ શોકમયૈરુપદ્રુતઃ ।
વ્યધિતેન સવાષ્પવારિણા કરુણં બન્ધુજનેન વીક્ષિતઃ

વિનિપીડિતમર્મબન્ધનસ્તિમિરં ઘોરતરં વિશન્નિવ ।
વિજહાતિ નિજં કડેવરં દયિતં યત્નપરેણ રક્ષિતમ્

સ વિરૌતિ ગૃહીતમૂર્ધજો યમદૂતૈર્દૃઢપાશસંયતઃ ।
ન શૃણોતિ જનો ઽસ્ય ભાષિતં સ્વકૃતાક્રન્દરવાદિવાકુલઃ

પ્રસ્તારશૈલસરિદન્તરદુર્ગમેષુ માર્ગેષુ તીક્ષ્ણતરકણ્ટકસંકટેષુ ।
ઘોરૈઃ કૃતાન્તપુરુષૈર્યમદણ્ડઘાતમાકૃષ્યતે ગલનિષેવિતકાલપાશઃ

દૂરાન્નિરીક્ષ્ય વિમલં સલિલં પિપાસુરભ્યેતિ ગાઢતૃષિતો યદયં તદેવ ।
કેશૌઘશૈવલવિમિશ્રિતપૂતિપૂયપઙ્કાપઙ્કિતં ક્ષતજવં જલતા પ્રયાતિ

વેલાનિલાકુલિતશીકરશીતસાનુમાનીલચન્દનતરું મલયં પ્રયાતિ ।
સો ઽપ્યસ્ય ચણ્ડવનદાવશિખાવલીઢશીર્ણોલ્મુકપ્રકરદન્તુરતાં પ્રયાતિ

યદ્યેતિ વારિનિધિમુદ્વતભીમલોલકલ્લોલભેદજનિતોલ્વણફેનહાસમ્ ।
સો ઽપ્યસ્ય તપ્તવિષદારુણસૈકતાભ્રવિભ્રાન્તકર્કશમરુન્મરુતાં પ્રયાતિ

તત્ર સ્થિતસ્ય જલદાગમશંસિનો ઽસ્ય સાઙ્ગારધૂમકુલિશોપલવિસ્ફુલિઙ્ગમ્ ।
વિદ્યુલ્લતાકનકરાજિપિશઙ્ગમઙ્ગે નારાચવર્ષમભિવર્ષતિ વારિવહઃ

તાપાર્દિતસ્ય દહનં તુ હિતાનિલો ઽપિ શીતાર્દિતસ્ય દહનો ઽપિ કરોતિ શીતમ્ ।
અત્યુગ્રકર્મપરિણામવિમોહિતસ્ય વિશ્વં તદાસ્ય વિપરીતમિદં વિભાતિ

શૂચીમુખસ્ય બહુયોજનભીમકુક્ષેરાર્તસ્ય વારિપિબતો ઽપિ મહાસમુદ્રે ।
અપ્રાપ્ત એવ પૃથુકણ્ઠદરીપ્રપાતશ્લેષ્મોષ્મણા જલલવઃ પરિશોષમેતિ ॥ શ્લ્_40
ચઞ્ચચ્છટાનિક x પીવરસારમેયદંષ્ટ્રાઙ્કુરાગ્રકુલિશક્ષતચૂર્ણિતાઙ્ગઃ ।
ક્ષારામ્બુપૂર્ણતરવૈતરણીતટેષુ નિષ્કૃષ્યતે વિષમકોટિશિતોપલેષુ