Śiṣyalekha · Verses 1-20

om namo ratnatrayāya ||
pūrvāvadānacariteṣu suduṣkareṣu gīteṣu yasya surakiṃnarasundarībhiḥ |
adyāpi candrakiraṇairiva saṃkucanti mārāṅganāvadanapaṅkajakānanāni

saubhāgyahṛdyavapuṣaḥ paramādbhutasya yasyālpapuṇyajanadurlabhadarśanasya |
saṃpāditābhimatalokamanorathasya cintāmaṇeriva parārtharasaikavṛttiḥ

yaḥ sarvadā parasukhaikaraso babhūva duḥkhena duḥkhamagamatparamaṃ pareṣām |
atyarthamāhitamahākaruṇāguṇasya yasyātmaduḥkhasukhamantaritaṃ tadeva

vicchi x māvayasi yasya śiraḥ parārtha x x x sannayanapaṅkajatāmavāpa |
svārthaṃ puna x x x x x sitātapatrā pṛthvī babhūva niśiteva kṛpāṇadhārā

lokopakāranirataprakaṭodayena śulka x x x x x x guṇojjvalena |
doṣāndhakārabhidureṇa manorameṇa yenoditena śaśineva jagatprakāśam

cūḍāvibhūṣaṇamivottamaratnakalpamūḍhaṃ śirobhirurubhiḥ phaṇināṃ x x x |
yacchāsanaṃ śubhamakhaṇḍaviśuddhavṛttaṃ pātālamūrdhani layatimiraṃ pramārṣṭi

dharmāmbuvāha iva yo 'bhyudito hitāya dharmāmṛtaṃ jalamivaikarasaṃ vavarṣa |
tāpāpa x x x x x x x x x x x x yadanekarasa x x x x x x x x x x x x x x

vistīrṇanimnavimalaprakaṭāśrayeṣu pātreṣu sarvaparimardasaheṣu yeṣu |
tatsaṃsthitaṃ bhavati sarvajanopakāraṃ x x x x x x x x x x x x x x

tajjāgaraṃ maraṇajanmajarāpahāri ye nāpnuvanti na pibanti na dhārayanti |
te māhitā bahulamohamahāmadena x x x x x x x x x dhamādriyante

cakṣuryadekamamalaṃ jagato 'khilasya sādhāraṇaṃ tribhuvanasya yadekadīpaḥ |
tacchāsanaṃ samadhigamya yadutsṛjanti mohasya tadvilasitaṃ paramādbhutasya

śikṣā x x x viditeṣviva bodhisaudhasopānapaddhatipadeṣu padaṃ dadhānāḥ |
tuṅgāṃ prayānti padavīmanivartamānā bhūmiṃ nijāmavataranti vivartamānāḥ

janmārṇavaṃ paramadustaramuttitīrṣuḥ śīlaplavaṃ ka iha hastagataṃ jahāti |
kāntāramadhyapatitaḥ kathamāryasārthādbhraṣṭo na śocati ciraṃ supathānabhijñaḥ

saṃsārabhūdharadarījaṭharaprapātādutthātumudyataparāḥ paramāndhakārāt |
muñcanti ye jinaguṇāvalimantarāle vegena te viṣamapātamadhaḥ patanti

ekākino 'pi manasā niyamaṃ prakalpya ye karmaṇā samuditena samunnayanti |
te sādhavo bhuvanamaṇḍalamaulibhūtāstaireva yānti gurutāṃ guravaḥ suśiṣyaiḥ

labdhvā guṇaughajananīṃ jananīmivāryāmatyantaśuddahṛdayāmanuvartamānāḥ |
tejasvinaḥ sukhamasūnapi saṃtyajanti satyasthitivyasanino na punaḥ pratijñām

tiṣṭhantu tāvadiha sarvajanāpavādāḥ sarvāśca pāpagatayo nirayāśca ghorāḥ |
sadyo jahāti sahajāṃ prakṛtiṃ yadeṣa duḥkhaṃ tataḥ kimaparaṃ bhuvi sajjanasya

yaḥ prapya nāvamiva dharmamayīṃ viśālāṃ bhūyo jahāti padavīṃ munibhiḥ praklṛptām |
saṃsārasāgaravivartananartaneṣu cetaḥspṛhā taralitā niyamena tasya

saṃsāracakramaniśaṃ parivartamānamāruhya yaḥ sukhamavaiti vivartamānaḥ |
so 'vaśyameva tarivaśaṃ masaḥ krameṇa sarvāḥ samāśca visamāśca gatīḥ prayāti

atyugragandhamaśuciprakaroparuddhamatyantasaṃkaṭamupoḍhaghanāndhakāram |
āviśya garbhanilayaṃ nirayaṃ yathaiva duḥkhaṃ mahatsa sahate paripiṇḍatāṅgaḥ

kālakramena sa tato dṛḍhatailayantraniṣpīḍyamāna iva yāti bhuvaṃ kathaṃcit |
sadyastathāpi yadayaṃ na jahāti jīvaṃ duḥkhopabhogagatidurlabhi tattadeva