Shukla Yajurveda · Chapter 32

adhyāya 32 yama sūktam
sarvamedha sambaddhā mantrāḥ

tad evāgnis tad ādityas tad vāyus tad u candramāḥ /
tad eva śukraṃ tad brahma tā ' āpaḥ sa prajāpatiḥ

sarve nimeṣā jajñire vidyutaḥ puruṣād adhi /
nainamūrdhvaṃ na tiryañcaṃ na madhye pari jagrabhat

na tasya pratimā ' asti yasya nāma mahad yaśaḥ /
hiraṇyagarbha ' ity eṣaḥ /
mā mā hiꣳsīd ity eṣā /
yasmān na jāta ' ity eṣa

eṣo ha devaḥ pradiśo 'nu sarvāḥ pūrvo ha jātaḥ sa ' u garbhe ' antaḥ /
sa ' eva jātaḥ sa janiṣyamāṇaḥ pratyaṅ janās tiṣṭhati sarvatomukhaḥ

yasmāj jātaṃ na purā kiṃ canaiva ya ābabhūva bhuvanāni viśvā /
prajāpatiḥ prajayā saꣳrarāṇas trīṇi jyotīꣳṣi sacate sa ṣoḍaśī

yena dyaur ugrā pṛthivī ca dṛḍhā yena sva stabhitaṃ yena nākaḥ /
yo ' antarikṣe rajaso vimānaḥ kasmai devāya haviṣā vidhema

yaṃ krandasī ' avasā tastabhāne ' abhyaikṣetāṃ manasā rejamāne /
yatrādhi sūra ' udito vibhāti kasmai devāya haviṣā vidhema /
āpo ha yad bṛhatīḥ /
yaś cid āpaḥ

venas tat paśyan nihitaṃ guhā sad yatra viśvaṃ bhavaty ekanīḍam /
tasminn idaꣳ saṃ ca vi caiti sarvaꣳ sa ' otaḥ protaś ca vibhūḥ prajāsu

pra tad voced amṛtaṃ nu vidvān gandharvo dhāma vibhṛtaṃ guhā sat /
trīṇi padāni nihitā guhāsya yas tāni veda sa pituḥ pitāsat

sa no bandhur janitā sa vidhātā dhāmāni veda bhuvanāni viśvā /
yatra devā ' amṛtam ānaśānās tṛtīye dhāmann adhy airayanta

parītya bhūtāni parītya lokān parītya sarvāḥ pradiśo diśaś ca /
upasthāya prathamajām ṛtasyātmanātmānam abhi saṃ viveśa

pari dyāvāpṛthivī sadya ' itvā pari lokān pari diśaḥ pari svaḥ /
ṛtasya tantuṃ vitataṃ vicṛtya tad apaśyat tad abhavat tad āsīt

sadasas patim adbhutaṃ priyam indrasya kāmyam /
saniṃ medhām ayāsiṣaꣳm svāhā

yāṃ medhāṃ devagaṇāḥ pitaraś copāsate /
tayā mām adya medhayāgne medhāvinaṃ kuru svāhā

medhāṃ me varuṇo dadātu medhām agniḥ prajāpatiḥ /
medhām indras ca vāyuś ca medhāṃ dhātā dadātu me svāhā

idaṃ me brahma ca kṣatraṃ cobhe śriyam aśnutām /
mayi devā dadhatu[ dadhavu ] śriyam uttamāṃ tasyai te svāhā //