Shukla Yajurveda · Chapter 26

khilasaṃjñakāḥ mantrāḥ

agniś ca pṛthivī ca saṃnate te me saṃ namatām adaḥ /
vāyuś cā'ntarikṣaṃ ca saṃnate te me saṃ namatām adaḥ /
' ādityaś ca dyauś ca saṃnate te me saṃ namatām adaḥ /
' āpaś ca varuṇaś ca saṃnate te me saṃ namatām adaḥ /
sapta saꣳsado ' aṣṭamī bhūtasādhanī /
sakāmāꣳ२' adhvanas kuru saṃjñānam astu me 'munā

yathemāṃ vācaṃ kalyāṇīm āvadāni janebhyaḥ /
brahmarājanyābhyāꣳ śūdrāya cāryāya ca svāya cāraṇāya /
priyo devānāṃ dakṣiṇāyai dātur iha bhūyāsam ayaṃ me kāmaḥ sam ṛdhyatām upa mādo namatu

bṛhaspate ' ati yad aryo ' arhād dyumad vibhāti kratumaj janeṣu /
yad dīdayacchavasa ' ṛtaprajāta tad asmāsu draviṇaṃ dhehi citram /
upayāmagṛhīto 'si bṛhaspataye tvā /
eṣa te yonir bṛhaspataye tvā

indra gomann ihā yāhi pibā somaꣳ śatakrato /
vidyadbhir grāvabhiḥ sutam /
upayāmagṛhīto 'sīndrāya tvā gomate /
' eṣa te yonir indrāya tvā gomate

indrā yāhi vṛtrahan pibā somaꣳ śatakrato /
gomadbhir grāvabhiḥ sutam /
upayāmagṛhīto 'sīndrāya tvā gomate /
' eṣa te yonir indrāya tvā gomate

ṛtāvānaṃ vaiśvānaram ṛtasya jyotiṣas patim /
ajasraṃ gharmam īmahe /
upayāmagṛhīto 'si vaiśvānarāya tvā /
eṣa te yonir vaiśvānarāya tvā

vaiśvānarasya sumatau syāma rājā hi kaṃ bhuvanānām abhiśrīḥ /
ito jāto viśvam idaṃ vi caṣṭe vaiśvānaro yatate sūryeṇa /
upayāmagṛhīto 'si vaiśvānarāya tvā /
eṣa te yonir vaiśvānarāya tvā

vaiśvānaro na ' ūtaya ' ā pra yātu parāvataḥ /
agnir ukthena vāhasā /
upayāmagṛhīto 'si vaiśvānarāya tvā /
eṣa te yonir vaiśvānarāya tvā

agnir ṛṣiḥ pavamānaḥ pāñcajanyaḥ purohitaḥ /
tam īmahe mahāgayam /
upayāmagṛhīto 'sy agnaye tvā varcase /
' eṣa te yonir agnaye tvā varcase

mahāꣳ२' indro vajrahastaḥ ṣoḍaśī śarma yacchatu /
hantu pāpmānaṃ yo 'smān dveṣṭi /
upayāmagṛhīto 'si mahendrāya tvā /
eṣa te yonir mahendrāya tvā

taṃ vo dasmam ṛtīṣahaṃ vasor mandānam andhasaḥ /
abhi vatsaṃ na svasareṣu dhenava ' indraṃ gīrbhir navāmahe

yad vāhiṣṭhaṃ tad agnaye bṛhad arca vibhāvaso /
mahiṣīva tvad rayis tvad vājā ' ud īrate

ehy ū ṣu bravāṇi te 'gna ' itthetarā giraḥ /
ebhir vardhāsa ' indubhiḥ

ṛtavas te yajñaṃ vi tanvantu māsā rakṣantu te haviḥ /
saṃvatsaras te yajñaṃ dadhātu naḥ prajāṃ ca pari pātu naḥ

upahvare girīṇāꣳ saṃgame ca nadīnām /
dhiyā vipro ' ajāyata

uccā te jātam andhaso divi sad bhūmy ā dade /
ugraꣳ śarma mahi śravaḥ

sa na ' indrāya yajyave varuṇāya marudbhyaḥ /
varivovit pari srava

enā viśvāny arya ' ā dyumnāni mānuṣāṇām /
siṣāsanto vanāmahe

anu vīrair anu puṣyāsma gobhir anv aśvair anu sarveṇa puṣṭaiḥ /
anu dvipadānu catuṣpadā vayaṃ devā no yajñam ṛtuthā nayantu

agne patnīr ihā vaha devānām uśatīr upa /
tvaṣṭāraꣳ somapītaye

abhi yajñaṃ gṛṇīhi no gnāvo neṣṭaḥ piba ' ṛtunā /
tvaꣳ hi ratnadhā ' asi

draviṇodāḥ pipīṣati juhota pra ca tiṣṭhata /
neṣṭrād ṛtubhir iṣyata

tavāyaꣳ somas tvam ehy arvāṅchaśvattamaꣳ sumanā ' asya pāhi /
asmin yajñe barhiṣy ā niṣadyā dadhiṣvemaṃ jaṭhara ' indum indra

ameva naḥ suhavā ' ā hi gantana ni barhiṣi sadatanā raṇiṣṭana /
athā mandasva jujuṣāṇo ' andhasas tvaṣṭar devebhir janibhiḥ sumadgaṇaḥ

svādiṣṭhayā madiṣṭhayā pavasva soma dhārayā /
indrāya pātave sutaḥ

rakṣohā viśvacarṣaṇir abhi yonim ayohatam /
druṇā(droṇe) sadhastham āsadat //