Shukla Yajurveda · Chapter 27

pañcacitikasyāgneḥ mantrāḥ

samās tvāgna ' ṛtavo vardhayantu saṃvatsarā ' ṛṣayo yāni satyā /
saṃ divyena dīdihi rocanena viśvā ' ā bhāhi pradiśaś catasraḥ

saṃ cedhyasvāgne pra ca bodhayainam uc ca tiṣṭha mahate saubhagāya /
mā ca riṣad upasattā te ' agne brahmāṇas te yaśasaḥ santu mā 'nye

tvām agne vṛṇate brāhmaṇā ' ime śivo ' agne saṃvaraṇe bhavā naḥ /
sapatnahā no ' abhimātijic ca sve gaye jāgṛhy aprayucchan

ihaivāgne ' adhi dhārayā rayiṃ mā tvā ni kran pūrvacito nikāriṇaḥ /
kṣatram agne suyamam astu tubhyam upasattā vardhatāṃ te ' aniṣṭṛtaḥ

kṣatreṇāgne svāyuḥ saꣳ rabhasva mitreṇāgne mitradheye yatasva /
sajātānāṃ madhyamasthā ' edhi rājñām agne vihavyo dīdihīha

ati niho ' ati sridho 'ty acittim aty arātim agne /
viśvā hy agne duritā sahasvāthāsmabhyaꣳ sahavīrāꣳ rayiṃ dāḥ

anādhṛṣyo jātavedā ' anādhṛṣṭo virāḍ agne kṣatrabhṛd dīdihīha /
viśvā ' āśāḥ pramuñcan mānuṣīr bhayaḥ śivebhir adya pari pāhi no vṛdhe

bṛhaspate savitar bodhayainaꣳ saꣳśitaṃ cit saṃtarāꣳ saꣳ śiśādhi /
vardhayainaṃ mahate saubhagāya viśva ' enam anu madantu devāḥ

amutrabhūyādadha yad yamasya bṛhaspate ' abhiśaster amuñcaḥ /
praty auhatām aśvinā mṛtyum asmād devānām agne bhiṣajā śacībhiḥ

ud vayaṃ tamasas pari svaḥ paśyanta ' uttaram /
devaṃ devatrā sūryam aganma jyotir uttamam

ūrdhvā ' asya samidho bhavanty ūrdhvā śukrā śocīꣳṣy agneḥ /
dyumattamā supratīkasya sūnoḥ

tanūnapād asuro viśvavedā devo deveṣu devaḥ /
patho anaktu madhvā ghṛtena

madhvā yajñaṃ nakṣase prīṇāno narāśaꣳso ' agne /
sukṛd devaḥ savitā viśvavāraḥ

acchāyam eti śavasā ghṛteneḍāno vahnir namasā /
agniꣳ sruco ' adhvareṣu prayatsu

sa yakṣad asya mahimānam agneḥ sa ' īṃ mandrā suprayasaḥ /
vasuścetiṣṭho vasudhātamaś ca

dvāro devīr anv asya viśve vratā dadante ' agneḥ /
uruvyacaso dhāmnā patyamānāḥ

te ' asya yoṣaṇe divye na yonā ' uṣāsānaktā /
imaṃ yajñam avatām adhvaraṃ naḥ

daivyā hotārā ' ūrdhvam adhvaraṃ no 'gner jihvām abhi gṛṇītam /
kṛṇutam naḥ sviṣṭam

tisro devīr barhir idaꣳ sadantv iḍā sarasvatī bhāratī /
mahī gṛṇānā

tan nas turīpam adbhutaṃ purukṣu tvaṣṭā suvīryam /
rāyaspoṣaṃ vi ṣyatu nābhim asme

vanaspate 'va sṛjā rarāṇas tmanā deveṣu /
agnir havyaꣳ śamitā sūdayāti

agne svāhā kṛṇuhi jātavedo ' indrāya havyam /
viśve devā havir idaṃ juṣantām

pīvo ' annā rayivṛdhaḥ sumedhāḥ śvetaḥ siṣakti niyutām abhiśrīḥ /
te vāyave samanaso vi tasthur viśven naraḥ svapatyāni cakruḥ

rāye nu yaṃ jajñatū rodasīme rāye devī dhiṣaṇā dhāti devam /
adha vāyuṃ niyutaḥ saścata svā ' uta śvetaṃ vasudhitiṃ nireke

āpo ha yad bṛhatīr viśvam āyan garbhaṃ dadhānā janayantīr agnim /
tato devānāꣳ sam avartatāsurekaḥ kasmai devāya haviṣā vidhema

yaś cid āpo mahinā paryapaśyad dakṣaṃ dadhānā janayantīr yajñam /
yo deveṣv adhi deva ' eka ' āsīt kasmai devāya haviṣā vidhema

pra yābhir yāsi dāśvāꣳsam acchā niyudbhir vāyaviṣṭaye duroṇe /
ni no rayiꣳ subhojasaṃ yuvasva ni vīraṃ gavyam aśvyaṃ ca rādhaḥ

ā no niyudbhiḥ śatinībhir adhvaraꣳ sahasriṇībhir upa yāhi yajñam /
vāyo ' asmin savane mādayasva yūyaṃ pāta svastibhiḥ sadā naḥ

niyutvān vāyavā gahy ayaꣳ śukro ayāmi te /
gantāsi sunvato gṛham

vāyo śukro ' ayāmi te madhvo ' agraṃ diviṣṭiṣu /
ā yāhi somapītaye spārho deva niyutvatā

vāyur agregā yajñaprīḥ sākaṃ gan manasā yajñam /
śivo niyudbhiḥ śivābhiḥ

vāyo ye te sahasriṇo rathāsas tebhir ā gahi /
niyutvānt somapītaye

ekayā ca daśabhiś ca svabhūte dvābhyām iṣṭaye viꣳśatī ca /
tisṛbhiś ca vahase triꣳśatā ca niyudbhir vāyav iha tā vi muñca

tava vāyavṛtaspate tvaṣṭur jāmātar adbhuta /
avāꣳsy ā vṛṇīmahe

abhi tvā śūra nonumo 'dugdhā iva dhenavaḥ /
īśānam asya jagataḥ svardṛśam īśānam indra tasthuṣaḥ

na tvāvāꣳ२' anyo divyo na pārthivo na jāto na janiṣyate /
aśvāyanto maghavann indra vājino gavyantas tvā havāmahe

tvām iddhi havāmahe sātā vājasya kāravaḥ /
tvāṃ vṛtreṣv indra satpatiṃ naras tvāṃ kāṣṭhāsv arvataḥ

sa tvaṃ naś citra vajrahasta dhṛṣṇuyā maha stavāno ' adrivaḥ /
gām aśvaꣳ rathyam indra saṃ kira satrā vājaṃ na jigyuṣe

kayā naś citra ' ā bhuvad ūtī sadāvṛdhaḥ sakhā /
kayā śaciṣṭhayā vṛtā

kas tvā satyo madānāṃ maꣳhiṣṭho matsad andhasaḥ /
dṛḍhā cid āruje vasu

abhī ṣu ṇaḥ sakhīnām avitā jaritṝṇām /
śataṃ bhavāsy ūtaye

yajñā-yajñā vo ' agnaye girā-girā ca dakṣase /
pra-pra vayam amṛtaṃ jātavedasaṃ priyaṃ mitraṃ na śaꣳsiṣam

pāhi no ' agna ' ekayā pāhy uta dvitīyayā /
pāhi gīrbhis tisṛbhir ūrjāṃ pate pāhi catasṛbhir vaso

ūrjo napātaꣳ sa hināyam asmayur dāśema havyadātaye /
bhuvad vājeṣv avitā bhuvad vṛdha ' uta trātā tanūnām

saṃvatsaro 'si parivatsaro'sīdāvatsaro 'sīdvatsaro 'si vatsaro 'si /
uṣasas te kalpantām ahorātrās te kalpantām ardhamāsās te kalpantāṃ māsās te kalpantām ṛtavas te kalpantāꣳ saṃvatsaras te kalpatām /
pretyā ' etyai saṃ cāñca pra ca sāraya /
suparṇacid asi tayā devatayāṅgirasvad dhruvaḥ sīda //