Shiva Purana · Chapter 6.4

īśvara uvāca //
ataḥ paraṃ pravakṣyāmi saṃnyāsāhnikakarma ca //
tava snehānmahādevi saṃpradāyānurodhataḥ

brāhme muhūrtta utthāya śirasi śvetapaṃkaje //
sahasrāre samāsīnaṃ guruṃ saṃcitayedyatiḥ

śuddhasphaṭikasaṃkāśaṃ dvinetraṃ varadābhaye //
dadhānaṃ śivasadbhāvamevātmani manoharam

bhāvopanītaiḥ saṃpūjya gandhādibhiranukramāt //
baddhāṃjalipuṭo bhūtvā namaskuryādguruṃ tataḥ

prātaḥprabhṛti sāyānte sāyādiprātaraṃ tataḥ //
yatkaromi mahādeva tadastu tava pūjanam

prativijñāpya gurave labdhānujñastato guroḥ //
niruddhaprāṇa āsīno vijitātmā jitendriyaḥ

mūlādibrahmaraṃdhrāṃtaṃ ṣaṭcakraṃ pariciṃtayet //
vidyutkoṭisamaprakhyaṃ sarvatejomayaṃ param

tanmadhye ciṃtayenmāṃ ca saccidānandavigraham //
nirguṇaṃ paramaṃ brahma sadāśivamanāmayam

sohamasmīti matimānma daikyamanubhūya ca //
bahirnirgatya ca tato dūraṃ gacchedyathāsukham

vastreṇācchādya matimāñchiro nāsikayā saha//
viśodhya dehaṃ vi dhivattṛṇamādhāya bhūtale

gṛhītaśiśna utthāya tato gacchejjalāśayam //
uddhṛtya vāryathānyāyaṃ śaucaṃ kuryādatandritaḥ

hastau pādau ca saṃśodhya dvirācamyomiti smaran //
uttarābhimukho maunī dantadhāvanamācaret

tṛṇaparṇaiḥ sadā kuryādamāmekādaśī vinā //
apāṃ dvādaśagaṇḍūṣairmukhaṃ saṃśodhayettataḥ

dvirācamya mṛdā toyaiḥ kaṭiśaucaṃ vidhāya ca //
aruṇodayakāle tu snānaṃ kuryānmṛdā saha

guruṃ saṃsmṛtya māṃ caiva snānasaṃdhyādyamācaret //
vistārabhayato noktamatra draṣṭavyamanyataḥ

ābadhya śaṃkhamudrāṃ ca praṇavenābhiṣecayet //
śirasi dvādaśāvṛttyā tadardhaṃ vā tadardhakam

tīramāgatya kaupīnaṃ prakṣālyācamya ca dvidhā //
prokṣayetpraṇavenaiva vastramaṃgopamārjanam

mukhamprathamato mṛjya śira ārabhya sarvataḥ //
tenaiva mārjayeddehaṃ sthitvā ca gurusannidhau

ābadhyādvāmataḥ śuddhaṃ kaupīnaṃ ca saḍorakam //
tataḥ saṃdhārayedbhasma tadvidhiḥ procyate'drije

dvirācamya samādāya bhasma sadyādimaṃtrataḥ //
agnirityādibhirmaṃtrairabhimaṃtrya spṛśettanum

āpovetyabhimaṃtryātha jalaṃ tenaiva secayet //
omāpojyotirityuktvā mānastoketi maṃtrataḥ

samadya kamaladvandvaṃ kuryā kekaṃ tu paṃcadhā//
śirovadanahṛdguhyapādeṣu parameśvari

īśānādisamārabhya sadyāntaṃ paṃcabhiḥ kramāt//
uddhūlya kavalaṃ paścātpraṇavenābhiṣecayet/२३/
sarvāṃgaṃ ca tato hastau prakṣālyānyatsamāharet
samarcya pūrvattattu tripuṇḍrāṃstena dhārayet

triyāyuṣaistryambakaiśca praṇavena śivena ca//
śirasyatha lalāṭe ca vakṣasi skandha eva ca

nābhau bāhvauḥ saṃdhiṣu ca pṛṣṭha caiva yathākramam //
prakṣālya hastau ca tato dvirācamya yathāvidhi

paṃcīkaraṇamuccārya bhāvayetsvaguruṃ budhaḥ //
vakṣyamāṇaprakāreṇa prāṇāyāmānṣaḍācaret

dakṣahastena saṃgṛhya jalaṃ vāmena pāṇinā //
samācchādya dviṣaḍvāraṃ praṇave nābhimaṃtrayet

evaṃ trivāraṃ saṃprokṣya śirasi triḥ pibettataḥ //
samāhitena manasā dhyāyannoṃkāramīśvaram

sauramaṇḍalamadhyasthaṃ sarvatejomayaṃ param //
aṣṭabāhuṃ caturvaktramarddhanārīkamadbhutam

sarvāścaryyaguṇopetaṃ sarvālaṃkāraśobhitam //
evaṃ dhyātvātha vidhivaddadyādarghyatrayaṃ tataḥ

aṣṭottaraśataṃ japtvā dviṣaḍvāraṃ tu tarpayet //
punarācamya vidhivatprāṇāyāmatrayaṃ caret

pūjāsadanamāgacchenmanasā saṃsmarañcchivam//
dvāramāsādya prakṣālya pādau maunī dvirācamet

praviśedvidhinā tatra dakṣapādapurassa ram//
maṇḍapāntassudhīstatra maṇḍalaṃ racayetkramāt

iti śrīśivamahāpurāṇe ṣaṣṭhyāṃ kailāsasaṃhitāyāṃ saṃnyāsācāravarṇanaṃnāma caturtho'dhyāyaḥ