Shiva Purana · Chapter 6.5

īśvara uvāca //
parīkṣya vidhivadbhūmiṃ gaṃdhavarṇarasādibhiḥ //
manobhilaṣite tatra vitānavitatāmbare

supralipte mahīpṛṣṭhe darpaṇodarasannibhe //
aratniyugmamānena caturasraṃ prakalpayet

tālapatraṃ samādāya tatsamāyāmavistaram//
tasminbhāgānprakurvīta trayodaśasamāṃ kalām

tatpatraṃ tatra nikṣipya paścimābhimukhaḥ sthitaḥ //
tatpūrvabhāge sudṛḍhaṃ sūtramādāya raṃjitam

prākpratyagdakṣiṇodak ca caturdiśi nipātayet //
sūtrāṇi devadeveśi navaṣaṣṭyuttaraṃ śatam

koṣṭhāni syustatastasya madhyakoṣṭhaṃ tu karṇikā//
koṣṭhāṣṭakaṃ bahistasya dalāṣṭakamihocyate

dalāni śvetavarṇāni dalāṣṭakamihocyate // //
dalāni śvetavarṇātri samagrāṇi prakalpayet //
pītarūpāṃ karṇikāṃ ca kṛtvā raktaṃ ca vṛttakam

vanabhiddaladakṣaṃ tu samārabhya sureśvari //
raktakṛṣṇāḥ krameṇaiva dalasandhīnvicitrayet

karṇikāyāṃ likhedyaṃtraṃ praṇavārthaprakāśakam //
adhaḥ pīṭhaṃ samālikhya śrīkaṇṭhaṃ ca tadūrdhvataḥ

taduparyyamareśaṃ ca mahākālaṃ ca madhyataḥ //
tanmastakasthaṃ daṇḍaṃ ca tata īśvaramālikhet

śyāmena pīṭhaṃ pītena śrīkaṇṭhaṃ ca vicitrayet //
amareśaṃ mahākālaṃ raktaṃ kṛṣṇaṃ ca tau kramāt

kuryātsudhūmraṃ daṇḍaṃ ca dhavalaṃ ceśvaraṃ budhaḥ //
evaṃ yaṃtraṃ samālikhya raktaṃ sadyena veṣṭayet

tadutthenaiva nādena vidyādīśānamīśvari //
tadvāsapaṃktīrgṛhṇīyādāgneyādikrameṇa vai

koṣṭhāni koṇabhāgeṣu catvāryetāni sundari //
śuklenāpūryya varṇādi catuṣkaṃ raktadhātubhiḥ

āpūryya tāni catvāri dvārāṇi parikalpayet //
tatastatpārśvayordvaṃdvaṃ pītenaiva prapūrayet

āgneyakoṣṭhamadhye tu pītābhe caturasrake //
aṣṭapatraṃ likhetpadmaṃ raktābhaṃ pītakarṇikam

hakāraṃ vilikhenmadhye vinduyuktaṃ samāhitaḥ //
padmasya nairṛte koṣṭhe caturasrantadā likhet

padmamaṣṭadalaṃ raktaṃ pītakiṃjalkakarṇikam ///
śavargasya tṛtīyantu ṣaṣṭhasvarasamanvitam

caturdaśasvaropetaṃ bindunādavibhūṣitam //
etadbījavaraṃ bhadre padmamadhye samālikhet//

padmasyeśānakoṣṭhe tu tathā padmaṃ samālikhet //
kavargasya tṛtīyaṃ tu paṃcamasvarasaṃyutam

vilikhenmadhyatastasya bindukaṇṭhe svalaṃkṛtam //
tadbāhyapaṃktitritaye pūrvādiparitaḥ kramāt

koṣṭhāni paṃca gṛhrīyādgirirājasute śive //
madhye tu karṇikāṃ kuryātpītāṃ raktaṃ ca vṛttakam

dalāni raktavarṇāni kalpayetkalpavittamaḥ//
dalabāhye tu kṛṣṇena raṃdhrāṇi paripūrayet

āgneyādīni catvāri śuklenaiva prapūrayet//
pūrve ṣaḍbindusahitaṃ ṣaṭkoṇaṃ kṛṣṇamālikhet

raktavarṇaṃ dakṣiṇatastrikoṇaṃ cottare tataḥ//
śvetābhamarddhacandraṃ ca pītavarṇaṃ ca paścime

caturasraṃ kramātteṣu likhedbījacatuṣṭayam//
pūrve binduṃ samālikhya śubhraṃ kṛṣṇaṃ tu dakṣiṇe

ukāramuttare raktaṃ makāraṃ paścime tataḥ//
akāraṃ pītamevaṃ tu kṛtvā varṇacatuṣṭayam

sarvorddhvapaṃktyadhaḥ paṃktau samārabhya ca sundari//
pītaṃ śvetaṃ ca raktaṃ ca kṛṣṇaṃ ceti catuṣṭayam

tadadho dhavalaṃ śyāmaṃ pītaṃ raktaṃ catuṣṭayam //
adhastrikoṇake raktaṃ śuklaṃ pītaṃ varānane

evandakṣiṇamārabhya kuryātsomāntamīśvari//
tadbāhyapaṃktau pūrvādimadhyamāntaṃ vicitrayet

pītaṃ raktaṃ ca kṛṣṇaṃ ca śyāmaṃ śvetaṃ ca pītakam //
āgreyyādi samārabhya raktaṃ śyāmaṃ sitaṃ priye

raktaṃ kṛṣṇaṃ ca raktaṃ ca ṣaṭkameva prakīrtitam //
dakṣiṇādyaṃ maheśāni pūrvāvadhi samīritam

nairṛtādyantu vijñeyamāgneyāvadhi ceśvari //
vāruṇaṃ tu samārabhya dakṣiṇāvadhi ceritama

vāyavyādyaṃ mahādevi nairṛtāvadhi ceritam //
somārthaṃ parameśāni vāruṇāvadhi ceritam

īśānādyaṃ tu vijñeyaṃ vāyavyāvadhi cāmbike //
ityukto maṇḍalavidhirmayā tubhyaṃ ca pārvati

evaṃ maṇḍalamālikhya niyatātmā yatissvataḥ //
saurapūjāṃ prakurvīta sa hi tadvastutatparaḥ

iti śrīśivamahāpurāṇe ṣaṣṭhyāṃ kailāsasaṃhitāyāṃ saṃnyāsamaṇḍalavidhivarṇanaṃ nāma paṃcamo'dhyāyaḥ