Shiva Purana · Chapter 6.22

// subrahmaṇya uvāca //
ekādaśehni samprāpte yo vidhissamudāhṛtaḥ //
taṃ vakṣye muniśārdūla yatīnāṃ snehatastava

sammārjya vedīmālipya kṛtvā puṇyāhavācanam //
prokṣya paścimamārabhya pūrvāntampañca ca kramāt

maṇḍalānyuttarāśāsyaḥ kuryātsvayamavasthitaḥ//
prādeśamātraṃ saṃkalpya caturasraṃ ca madhyataḥ

bindutrikoṇaṣaṭkoṇavṛttākārāṇi ca kramāt //
śaṃkhaṃ ca puratasthāpya pūjoktakramamārgataḥ

prāṇānāyamya saṃkalpya pūjayitvā sureśvarī //
devatāḥ pañca pūrvoktā ativāhikarūpiṇīḥ

saṃtyajyottarato darbhān yaśca saṃspṛśate tataḥ //
paścimādi samārabhya ṣaḍutthāsanamārgataḥ

maṇḍalāni ca teṣvantaḥ puṣpāṇyādhāya pīṭhavat //
ॐ hrī mityuktvāgnirūpāntāmativāhikadevatām

āvāhayāmi nama ityantaṃ sarvatra bhāvayet //
darśayetsthāpanādyāstu mudrāḥ pratyekamādarāt

hrāṃhrīmityādinā kuryyādāsāmaṃgāni ca kramāt //
pāśāṃkuśābhayābhīṣṭapāṇicandropalaprabhāḥ

raktāṃgulīyakacchāyarañjitākhiladiṅmukhā //
raktāmbaradharāḥ kārapadapaṃkajaśobhitāḥ

trinetrollāsivadanapūrṇacandramanoharāḥ //
māṇikya mukuṭodbhāsicandralekhāvataṃsitāḥ

kuṇḍalāmṛṣṭagaṇḍāśca pīnonnatapayodharāḥ //
hārakeyūrakaṭakakāṃcīdāmamanoharāḥ

tanumadhyāḥ pṛthuśroṇyo raktadivyāmbarāvṛtāḥ //
māṇikyamayamaṃjīrasiṃjatpadasaroruhāḥ//
pādāṃgulīyakaśroṇīrmaṃjulātimanoharāḥ

anugraheṇa mūrtena śivavatkiṃ nu sādhyate//
tasmācchaktyātmamūrtena sarvaṃ sādhyaṃ maheśavat

sarvānugrahakartraiva svīkṛtāḥ paṃcamūrtaya//
sarvakāryyakarā divyāḥ parānugrahatatparāḥ

evaṃ dhyātvā tu tāḥ sarvā anugrahaparāśśivāḥ //
pādayoḥ pādyametāsāṃ dadyācchaṃkhodabindubhiḥ

hasteṣvācamanīyaṃ ca mauliṣvarghyaṃ pradāpayet//
śaṃkhoda bindubhistāsāṃ snānakarma ca bhāvayet

raktāmbarāṇi divyāni sottarīyāṇi dāpayet //
mukuṭādīnyanarghyāṇi dadyādābharaṇāni ca

suvāsitaṃ ca śrīkhaṇḍamakṣatāṃścātiśobhanān//
surabhīṇi manojñāni kusumāni ca dāpayet

dhūpaṃ ca paramāmodaṃ sājyavarti ca dīpakam//
sarvaṃ samarpayāmīti praṇavaṃ hrīmupakramāt

namo'ntaṃcatatodadyātpāyastamadhunāplutam//
sājyaśarkarayāpūpakadalīguḍapūritam

pratyekaṃ kadalīpatre bharitaṃ ca suvāsitam //
bhūrbhuvassvariti procya prokṣṇādīni kārayeta

ॐ hrīmiti samuccāryya naivedyaṃ vahnijāyayā //
pānīyaṃ nama ityuktvā parampremṇā samarpayet

tata udvāsayetprītyā pūrvato munisattama //
sthalaṃ viśodhya gaṃḍūṣācamanārghyāṇi dāpayet

tāṃbūlaṃ dhūpa dīpau ca pradakṣiṇanamaskṛtī //
vidhāya prārthayedetāśśirasyaṃjalimādadhat

śrīmātarassuprasannā yatiṃ śivapadaiṣiṇam//
rakṣaṇīya mprabruvantu parameśapadābjayoḥ

iti saṃprārthya tāssarvā visṛjya ca yathāgatam//
tāsāmprasādamuddhṛtya kanyakābhyaḥ pradāpayeta

gobhyo vā jalamadhye vā nikṣipennānyathā kvacit //
atraiva pārvaṇaṃ kuryyānnaikoddiṣṭaṃ yateḥ kvacit

atrāyaṃ pārvaṇaśrāddhe niyamaḥ procyate mayā //
taṃ śṛṇuṣva muniśreṣṭha yena śreyo bhavettataḥ

kartā snātvā dhṛtaprāṇa upavītī samāhitaḥ//
sapavitrakarastvasyāṃ puṇyatithyāmiti bruvan

kariṣye pārvaṇaṃ śrāddhamiti saṃkalpya cottare //
dadyāddarbhānuttamāṃśca hyāsanārthaṃ jalaṃ spṛśet

tatropaveśayedbhaktyā sābhyaṃgaṃ kṛtamajjanān //
āhūya caturo viprāñchivabhaktāndṛḍhavratān

viśvedevārthaṃ bhavatā prasādaḥ kriyatāmiti //
ātmane bhavatā paścādantarātmana ityapi

paramātmana ityevaṃ procya prārthyaṃ ca tānyatiḥ //
śraddhayā caraṇanteṣāṃ kuryyādyāthārthyamādarāt

pādau prakṣālya teṣāntu prāṅmukhānupaveśya ca //
gandhādibhiralaṃkṛtya bhojayecca śivā grataḥ

gomayenopalipyātra darbhānprāgagrakalpitān //
āstīryya saṃyataprāṇaḥ piṇḍānāṃ ca pradānakam

kariṣya iti saṃkalpya maṇḍalatrayamarcya ca //
ātmānamantarātmānaṃ paramātmanamapyataḥ

caturthyantaṃ vadanpaścādimaṃ piṇḍamitīrayan //
dadāmīti ca samprocya dadyātpiṇḍānsvabhaktitaḥ

kuśodakaṃ tato dadyādyathāvidhividhānataḥ //
tata utthāpya vai kuryyātpradakṣiṇanamaskṛtī

tato dattvā brāhmaṇebhyo dakṣiṇāṃ ca yathāvidhi //
nārāyaṇabaliṃ kuryyāttasminneva sthale dine

rakṣārthameva sarvatra viṣṇoḥ pūjāvidhiḥ smṛtaḥ //
kuryyādviṣṇormahāpūjāṃ pāyasānnaṃ nivedayet

dvādaśātha samāhūya brāhmaṇānvedapāragān //
keśavādibhirabhyarcya gandhapuṣpākṣatādibhiḥ

upānacchatravastrādi dattvā tebhyo yathāvidhi //
santoṣayenmahābhaktyā vividhairvaca naiśśubhaiḥ

āstīryya darbhānpūrvāgrānbhūssvāhā ca bhuvassuvaḥ //
praṇavādi procya bhūmau pāyasānnaṃ baliṃ haret

ekādaśāha suvidhirmayā prokto munīśvara //
dvādaśāhavidhiṃ vakṣye śṛṇuṣvādarato dvija

iti śrīśivamahāpurāṇe ṣaṣṭhyāṃ kailāsasaṃhitāyāṃ yatīnāmekādaśāhakṛtyavarṇanannāma dvāviṃśo'dhyāyaḥ