Shiva Purana · Chapter 6.23

subrahmaṇya uvāca //
dvādaśāhe samutthāya prātaḥ snātvā kṛtāhnikaḥ //
śivabhaktānyatīnvāpi brāhmaṇānvā śivapriyān

vimantrya tānsamāhūya madhyāhna cāplutāñchucīn //
vidhivadbhojayedbhaktyā svādvannairvividhaiśśubhaiḥ

sannidhau parameśasya paṃcāvaraṇamārgataḥ //
pūjayettasya saṃsthāpya prāṇānāyamya vāgyataḥ

mahāsaṃkalpamārgeṇa saṃkalpyāsmadguroriha//
pūjāṃ kariṣya ityuktvā tato darbhānuspapṛśet

pādau prakṣālya cācamya svayaṃ kartā ca vāgyataḥ //
sthāpayedāsane tānvai prāṅmukhānbhasmabhūṣitān

sadāśivādikramato dhyāyedaṣṭau ca tatra tān //
parayā sambhāvanayetarānapi mune dvijān //
parameṣṭhiguruṃ dhyāyetsāṃbabuddhyā svanāmataḥ //
guruśca paramantasmātparāparaguruṃ tataḥ

idamāsanamityuktvā cāsanāni prakalpayet //
praṇavādidvitīyāṃte svasya nāma samuccaran //

āvāhayāmi nama ityāvāhyārghodakena tu //
pādyamācamanaṃ cārghyaṃ vastragandhākṣatānapi

dattvā puṣpairalaṃkṛtya praṇavādyaṣṭanāmabhiḥ //
sacaturthauṃnamo'ntaiśca sugandhakusumaistataḥ // ९ /
dhūpadīpau hi dattvā ca sakalārādhanaṃ kṛtam //
sampūrṇamastviti procya namaskuryātsamutthitaḥ

pātrāṇi kadalīpatrāṇyāstīryādbhiviśodhya ca //
śuddhānnapāyasāpūpasūpavyañjanapūrvakam

dattvā padārthānkadalīnālikeraguḍānvitān //
pātrāsanāni ca pṛthagdadyātsamprocya ca kramāt

pariṣicya ca samprokṣya viṣṇorhavyamiti bruvan //
rakṣasveti karasparśaṃ kārayitvā samutthitaḥ

āpośanaṃ samarpyātha prārthayettānidamprati //
sadāśivādayaḥ prītā varadāśca bhavantu me

ye devā iti ca tato japtvedaṃ sākṣataṃ tyajet //
namaskṛtya samutthāya sarvatrāmṛtamastviti

uktvā prasādya ca japangaṇānāṃtvetyupa kramāt //
vedādīn rudracamakau rudrasūktaṃ ca paṃca ca

brahmāṇi bhojanānte tu yāvanmantrāṃśca sākṣatān //
dattvottarāpośanaṃ ca hastāṃghrimukhaśodhanam

kṛtvā cāntānsvāsaneṣu sthāpayitvā yathāsukham//
śuddhodakampradāyātha karppūrādi yathoditam

mukhavāsaṃ dakṣiṇāṃ ca pādukāsanapatrakam //
vyajanaṃ phalakāndaṇḍaṃ vaiṇavaṃ ca pradāya tān

pradakṣiṇanamaskāraissaṃtoṣyāśiṣamā vaheta //
punaḥ praṇamya samprārthya gurubhaktimacaṃcalām

sadāśivādayaḥ prītā gacchantu ca yathāsukham //
ityudvāsya dvāradeśāvadhi samyaganuvrajan

niruddhastaḥ parāvṛtya dvāsthairvipraiśca bandhubhiḥ //
dīnānāthaiśca sahito bhuktvā tiṣṭhedyathāsukham

vikṛtaṃ na bhavetkvāpi satyaṃ satyaṃ punaḥ punaḥ //
pratyabdameva kurvāṇo gurvārādhanamuttamam //
iha bhuktvā mahābhogāñchivalokamavāpnuyāt

// sūta uvāca ////
evaṃ kṛtānugrahamātmaśiṣyaṃ śrīvāmadevaṃ munivaryyamuktvā //
prasannadhīrjñānivaro mahātmā kṛtvā parānugrahamāśu devaḥ

yannaimiṣāraṇyamunīśvarāṇāṃ proktaṃ purā vyāsamunīśvareṇa //
tasmādasāvādigururbhavāṃstu dvitīya āryyo bhuvane prasiddhaḥ

śrutvā munīndro bhavato mukhājjātsanatkumāraḥ śivabhaktipūrṇaḥ //
vyāsāya vaktā sa ca śaivavaryyaśśukāya vaktā bhavitā ca pūrṇaḥ

pratyekaṃ muniśārdūlaṃ śiṣyavargacatuṣṭayam //
vedādhyayanasaṃvṛttaṃ dharmasthāpanapūrvakam

vaiśampāyana eva syātpailo jaiminireva ca //
sumantuśceti catvāro vyāsaśiṣyā mahaujasaḥ

agastyaśca pulastyaśca pulahaḥ kratureva ca //
tava śiṣyā mahātmāno vāmadeva mahāmune

sanakaśca sanandaśca sanātanamunistataḥ //
sanatsujāta ityete yogivaryāḥ śivapriyāḥ

sanatkumāraśiṣyāste sarvavedārthavittamāḥ //
guruśca paramaścaiva parātparagurustataḥ //
parameṣṭhiguruścaite pūjyāssyuśśukayoginaḥ

idaṃ praṇavavijñānaṃ sthitaṃ vargacatuṣṭaye //
sarvotkṛṣṭanidānaṃ ca kāśyāṃ sanmuktikāraṇam

etanmaṇḍalamadbhutaṃ paraśivādhiṣṭhāna rūpaṃ sadāvedāntārthavicārapūrṇamatibhiḥ pūjyaṃ yatīndraiḥ param //
vedādipravibhāgakalpitamahākāśādināpyāvṛtantvatsaṃtoṣakaraṃ tathāstu jagatāṃ śreyaskaraṃ śrīpradam

idaṃ rahasyamparamaṃ śivoditaṃ vedāntasiddhātaviniścitamparam//
mattaśśrutaṃ yadbhavatā tato mune bhavanmatamprājñatamā vadaṃti

tasmādanenaiva pathā gataśśivaṃ śivohamasmīti śivo bhavedyatiḥ //
pitāmahādipravibhāgamuktaye nadyo yathāsindhumimāḥ prayānti

śrīsūta uvāca //
evammunīśvarāyaitadupadiśya sureśvaraḥ //
saṃsmṛtya caraṇāmbhoje pitro ssarvvasurārcite

kailāsaśikharamprāpa kumāraśśikharāvṛtam //
rājitamparamāścaryyadivyajñānaprado guruḥ

vāmadevo'pi sacchiṣyaissaṃvṛtaśśikhivāhanam //
sampraṇamya jagāmāśu kailāsamparamādbhutam

gatvā kailāsaśikharamprāpyeśanikaṭammuniḥ//
dadarśa mokṣadammāyānāśañcaraṇamīśayoḥ

bhaktyā cārpitasarvāṃgo vismṛtya svakalevaram //
papāta sannidhau bhūyo bhūyo natvā samu tthitaḥ

tato bahuvidhaiḥ stotrairvedāgamarasotkaṭaiḥ //
tuṣṭāva parameśānaṃ sāṃbikaṃ sasutaṃ muniḥ

nidhāya caraṇatmbhojandeva devyossvamūrddhani //
pūrṇānugrahamāsādya tatraiva nyavasatsukham

/
bhavanto'pi viditvaivampraṇavārthammaheśvaram//
vedaguhyaṃ ca sarvasvantāra kambrahma muktidam

atraiva sukhamāsīnāḥ śrīviśveśvarapādayoḥ //
sāyujyarūpāmatulāmbhajadhvammuktimuttamām

ahaṃ gurupadāmbhojasevāyai bādarāśramam //
gamiṣye bhavatāmbhūyassatsambhāṣaṇamastu me

iti śrīśivamahāpurāṇe ṣaṣṭhyāṃ kailāsasaṃhitāyāṃ dvādaśāhakṛtyavarṇanapūrvvakavyāsādiśiṣyavargakathanannāma trayoviṃśo'dhyāyaḥ

iti kailāsasaṃhitā ṣaṣṭhī samāptimagamat //
// ॐ namaśśivāya //