Shiva Purana · Chapter 6.21

vāmadeva uvāca //
ye muktā yatayasteṣāṃ dāhakarmma na vidyate //
mṛte śarīre khananaṃ taddehasya śrutaṃ mayā

tatkarmācakṣva suprītyā kārtikeya guro mama//
tvattonyo na hi saṃvaktā triṣu lokeṣu vidyate

pūrṇāhaṃ bhāvamāśritya ye muktā dehapaṃjarāt //
ye tūpāsanamārgeṇa dehamuktāḥ paraṃgataḥ

teṣāṃ gativiśeṣañca bhagavañchaṃkarātmaja //
vaktumarhasi suprītyā māṃ vicāryya svaśiṣyataḥ

//sūta uvāca //
munivijñaptimākarṇya śaktiputrassurārihā //
prāhātyantarahasyaṃ tadbhṛguṇā śrutamīśvarāt

// subrahmaṇya uvāca //
idameva mune guhyaṃ bhṛgave śivayogine //
uktaṃ bhagavatā sākṣātsarvajñena pinākinā

vakṣye tadadya te brahmanna deyaṃ yasya kasyacit //
deyaṃ śiṣyāya śāntāya śivabhaktiyutāya vai

samādhistho yatiḥ kaścicchivabhāvena dehabhuk //
asti cetsa mahādhīraḥ paripūrṇaśśivo bhavet

adhairyyacitto yaḥ kaścitsamādhiṃ na ca viṃdati //
tadupāyampravakṣyāmi sāvadhānatayā śṛṇu

tripadārthaparijñānaṃ vedāntāgamavākyajam //
śrutvā gurormukhādyogamabhyasetsa yamādikam

tatkurvansa yatissamyakchivadhyānaparo bhavet //
niyamena mune nityaṃ praṇavāsaktamānasaḥ

dehadaurbalyavaśato yadyadhairyyadharo yatiḥ //
akāmaśca śivaṃ smṛtvā sa jīrṇāṃ svāṃ tanuṃ tyajet

sadāśivānugrahato naṃdinā preritā mune//
ātivāhikarūpiṇyo(?) devatāḥ pañca viśrutāḥ

ātmahantākṛtiḥ kācijjyottiḥpuṃjavapuṣmatī //
ahno'bhimāninī kācicchuklapakṣābhimāninī

uttarāyaṇarūpā ca paṃcānugrahatatparā //
dhūmrā tamasvinī rātriḥ kṛṣṇapakṣābhimāninī

dakṣiṇāyanarūpeti viśrutāḥ pañca devatāḥ //
tāsāṃ vṛttiṃ śṛṇuṣvādya vāmadeva mahāmune

tāḥ paṃcadevatā jīvānkarmānuṣṭhāna tatparān //
gṛhītvā tridivaṃ yāṃti tatpuṇyavaśato mune

bhuktvā bhogānyathoktāṃśca te tatpuṇyakṣaye punaḥ //
mānuṣaṃ lokamāsādya bhajate janmapūrvavat

tāḥ punaḥ paṃcadhā mārgaṃ vibhajyārabhya bhūtalam //
agnyādikramatāṃ gṛhyaṃ sadāśivapadaṃ yatiḥ

ninīya vandyacaraṇau devadevasya pṛṣṭhataḥ //
tiṣṭhaṃtyanugrahākārāḥ karmmaṇyeva prayojitāḥ

samāgatamabhiprekṣya devadevassadā śivaḥ //
viraktaścenmahāmaṃtratātparyamupadiśya ca

svasāmyaṃ ca vapurdatte gāṇapatyebhiṣicya ca //
anugṛhṇāti sarveśaśśaṃkaraḥ sarvanāyakaḥ

mṛgaṭaṃkatriśūlāgryavaradānavibhūṣitam //
trinetraṃ candraśakalaṃ gaṃgollāsijaṭādharam

adhiṣṭhitavimānāgryaṃ sarvadaṃ sarvakāmadam //
iti śākhāviraktaścedrudrakanyāsamāvṛtam

nṛtyagītamṛdaṃgādivādyaghoṣamanoharam //
divyāmbarasragālepa bhūṣaṇairapi bhūṣitam

divyāmṛtaghaṭaiḥ pūrṇaṃ divyāṃbhaḥparipūritam //
sūryakoṭipratīkāśaṃ caṃdrakoṭisuśītalam

manovegaṃ sarvagaṃ ca vimānamanugṛhya ca //
bhuktabhogasya tasyāpi bhogakautūhalakṣaye

nipātya śaktiṃ tīvratarāṃ prakṛtyā hyati durgamām //
kāntāraṃ dagdhukāmāntānmalayānalasuprabhām

anugṛhya mahāmaṃtratātparyamparameśvaraḥ //
pūrṇohaṃ bhāvanārūpaḥ śaṃbhura smīti niścalam

anugṛhya samādhiśca svadāsyaspandarūpiṇīḥ //
ravyādikarmmasāmarthyarūpāḥ siddhīranargalāḥ

āyuḥ kṣaye padmayoneḥ punarāvṛttivarjitām //
muktiṃ ca paramāṃ tasmai prayacchati jagadguruḥ

etadeva padaṃ tasmātsarvaiśvaryyaṃ samaṣṭimat//
muktighaṃṭāpathaṃ ceti vedāṃtānāṃ viniścayaḥ

mumūrṣostasya mandasya yatessatsampradāyinaḥ //
yatayaḥ sānukūlatvāttiṣṭheyuḥ parita stadā

tatassarve ca te tatra praṇavādīnyanukramāt //
upadiśya ca vākyāni tātparyaṃ ca samāhitāḥ

varṇayeyuḥ sphuṭaṃ prītyā śivaṃ saṃsmārayansadā //
nirguṇaṃ paramajyotiḥ praṇamya vilayāvadhi

eteṣāṃ samamevātra saṃskārakrama ucyate //
asaṃskṛtaśarīrāṇāṃ daurgatyaṃ naiva jāyate

saṃnyasya sarvakarmmāṇi śivāśrayaparā yataḥ //
dehaṃ dūṣayatasteṣāṃ rājño rāṣṭraṃ ca naśyati

tadgrāmavāsinaste'pi bhaveyurbhṛśaduḥkhinaḥ //
taddoṣaparihārāya vidhānaṃ caivamucyate

sa tu nama hariṇyāya cetyārabhya vinamradhīḥ //
nama āmīvatkebhyāntaṃ tatkāle prajapenmanum

ॐmityante japandevayajanampūrayettataḥ //
tataśśāntirbhavettasya doṣasya hi munīśvara

putrādayo yathā nyāyaṃ kuryyussaṃskāramuttamam //
vacmi tatkṛpayā vipra sāvadhānatayā śṛṇu

abhyarcya snāpya śuddhodairabhyarcya kusumādibhiḥ //
śrīrudracamakābhyāṃ ca rudrasūktena ca kramāt

śaṃkhaṃ ca purataḥ sthāpya tajjalenābhiṣicya ca //
puṣpaṃ nidhāya śirasi praṇavena pramārjayet

kaupīnādīni saṃtyajya punaranyāni dhārayet //
bhasmanoddhūlayettasya sarvāṃgaṃ vidhinā tataḥ

tripuṇḍraṃ ca vidhānena tilakaṃ candanena ca //
viracya puṣpairmālābhiralaṃkuryyātkalevaram

uraḥ kaṇḍaśirobāhuprakoṣṭhaśrutiṣu kramāt //
rudrākṣamālābharaṇairalaṃkuryyācca maṃtrataḥ

sudhūpitaṃ samutthāpya śikyopari nidhāya ca //
paṃcabrahmamaye ramye rathe saṃsthāpayettanum

ॐmādyaiḥ paṃcabhirbrahmamaṃtraissadyādibhiḥ krmāt //
sugaṃdhakusumairmālyairalaṃkuryyādrathaṃ ca tam

nṛtyavādyairbrāhmaṇānāṃ vedaghoṣaiśca sarvataḥ //
grāmampradakṣiṇīkṛtya gacche tpretaṃ tamudvahan

tataste yatinaḥ sarve tathā prācyāmathāpi vā //
udīcyampuṇyadeśe tu puṇyavṛkṣasamīpataḥ

khanitvā devayajanaṃ daṇḍamātrapramāṇataḥ //
praṇavavyāhṛtibhyāṃ ca prokṣya cāstīryya ca kramāt

śamīpatraśca kusumairuttarāgraṃ tadūrdhvataḥ//
āstīrya darbhāṃstatpīṭhaṃ cailājinakuśottaram

praṇavena brahmabhiśca pañcagavyena tāṃ tanum //
prokṣyābhiṣicya raudreṇa sūktena praṇavena ca

śaṃkhatoyenābhiṣicya mūrdhni puṣpaṃ viniḥkṣipet //
tadgatasyānukūlo'sau śivasmaraṇatatparaḥ

ॐmityatha samuddhṛtya svastivācanapūrvakam //
garte yogāsane sthāpya prāṅmukhaṃ syādyathā tathā

gaṃdhapuṣpairalaṃkṛtvā dhūpaguggulunā tataḥ//
viṣṇo havyamiti procya rakṣasveti vadandadet

daṇḍaṃ dakṣiṇahaste tu vāme dadyātkamaṇḍalum //
prajāpate na tvadetānyanyo maṃtreṇa sodakam

brahmajajñānamprathamamitimaṃtreṇa mastake //
spṛśañjaptvā rudrasūktaṃ bhuvormadhye spṛśañjapet

māno mahāntamityādicaturbhirmastakantataḥ //
nālikereṇa nirbhidyādavaṭaṃ pūrayettataḥ

paṃcabhirbrahmabhisspṛṣṭvā japetsthalamananyadhīḥ //
yo devānāmupakramya yaḥ paraḥ sa maheśvaraḥ

iti japtvā mahādevaṃ sāṃbaṃ saṃsārabheṣajam //
sarvajñamaparādhīnaṃ sarvānugrahakārakam

ekāratnisamutsedhamaratnidvayavistṛtam //
mṛdā pīṭhaṃ prakalpyātha gopaye nopalepayet

caturasraṃ ca tanmadhye gaṃdhākṣatasamanviteḥ //
sugaṃdhakusumairbilvaistulasyā ca samarcayet

praṇavena tato dayāddhūpadīpau payohaviḥ //
dattvā pradakṣiṇīkṛtya namaskuryyācca paṃcadhā

praṇavaṃ dvādaśāvṛttvā saṃjapya praṇamettataḥ //
digvidikkramato dadyādbrahmādyampraṇavena ca

evaṃ daśāhaparyyaṃtaṃ vidhiste samudāhṛtaḥ //
yatīnāṃ munivaryyāthaikādaśāhavidhiṃ śṛṇu

iti śrīśivamahāpurāṇe ṣaṣṭhyāṃ kailāsasaṃhitāyāṃ yatīnānmaraṇānantaradaśāhaparyyaṃtakṛtyavarṇanannāmaikaviṃśo'dhyāyaḥ