Shiva Purana · Chapter 6.20

subrahmaṇya uvāca //
kṣaurasnānavidhiṃ vakṣye vāmadeva mahāmune //
yasya sadyo vidhānena śuddhissyādyatinaḥ parā

yogapaṭṭaprakārasya vidhimprāpya munīśvara//
sa śiṣyassyādvratī pūrṇaḥ kṣaurakarmmodyato bhavet

guruṃ natvā viśeṣeṇa labdhānujñastato guroḥ//
śirassaṃkṣālya cācamya savāsāḥ kṣauramācaret

kṣālayedvasanaṃ paścānmṛdambhobhiḥ kṣurādikam//
taddhastau ca mṛdālipya kṣālayeti mṛdaṃ dadet

sthāpitamprokṣitantoyaiśśivaṃ śivamitīrayan //
svanetre pihite caivānāmāṃguṣṭhābhimaṃtrite

astreṇonmīlya saṃdṛśya kṣurā dikṣau rasādhanam //
abhimantrya dvādaśātha prokṣayedastramaṃtrataḥ

kṣuraṃ gṛhītvā tāreṇa dakṣabhāge nikṛntayet //
keśāṃśca kāṃści dagreṣu vaptvā sarvaṃ ca vāpayet

pṛthivyāṃ parṇamādāya vikṣipenna bhuvaḥ sthale //
śmaśrūṇi hastapādasthanakhāni ca nikṛṃtayet

bilvāśvatthatulasyādisthāne saṃgṛhya mṛtikām //
dviṣaṭvāraṃ nimajyāpsu tīraṃ gatvopaviśya ca

śuddhe deśe tu saṃsthāpya mṛdaṃ tredhā vibhajya ca //
evampunastridhā kṛtvā prokṣyāstreṇābhimantrayet

tatraikāṃ mṛdamādāya dāpayitvānyapāṇinā //
karau dvādaśadhā lipya pratyekaṃ kena kṣālayet

punarekāmpādayośca mukhe cānyāṃ kare kramāt //
saṃlipyākṣālya cāmbhobhiḥ punaśca jalamāviśet

anyāṃ mṛdambhāgayitvā śirasi dvādaśa kramāt //
ālipya mṛdamāsyāntanimajya ca punaḥ punaḥ

tīraṃ gatvā tu gaṃḍūṣānṣoḍaśācamanaṃ dvidhā //
prāṇānāyamya ca punaḥ praṇavaṃ dvyaṣṭasaṃkhyayā

/
mṛdamanyāṃ punastredhā vibhajya ca tadekayā //
kaṭiśaucaṃ pādaśaucaṃ vidhāyācamya ca dvidhā

praṇavenātha ṣoḍaśa prāṇānāyamya vāgyataḥ //
punaranyāṃ svorudeśe tridhā vinyasya comiti

prokṣyābhimaṃtrayetsapta svapāṇyostalamekadhā //
tridhālipyātha sampaśyetsūryyamūrtiṃ ca pāvanīm

svakakṣayoḥ samālipya vyatyastābhyāmathānyayā //
pāṇibhyāñca mṛdā śiṣyassumatirdṛḍhamānasaḥ

gṛhītvānyāṃ mṛdaṃ śuddhāṃ tathāsau gurubhaktimān //
śira ārabhya pādāntaṃ vilipyādityadṛṣṭayā

samutthāya tato'sau vai daṇḍamādāya bhūtale //
svaguruṃ mantradambhaktyā saṃsmarejjñānaniṣṭhayā

tatassāmbaṃ maheśānaṃ śaṃkaraṃ candraśekharam//
saṃsmaredbhaktitaśśiṣya sarveśvaryapatiṃ śivam

trivārampraṇametprītyā sāṣṭāṃgaṃ ca guru śivam //
pañcāṅgenaikavārañca samutthāya ca vandayet

tīrthaṃ praviśya tanmadhye nimajyonmajya tāmmṛdam //
skandhe saṃsthāpya pūrvoktaprakāreṇa vilepayet

tatrāvaśiṣṭaṃ saṃgṛhya jalamadhye praviśya ca //
viloḍya samyak tāṃ tatra sarvāṃgeṣu vilipya ca // २४ /
trivāramomiti procya śivapādāmbujaṃ smaran //
saṃsārāmbudhisaṃtāraṃ sadā yadvidhito hi saḥ

abhiṣicyomiti jalaṃ virajābhasmalolitam //
aṃgopamārjjanaṃ kṛtvā susnāyādbhasmanā tataḥ

tripuṃḍraṃ ca vidhāyātha yathoktavidhinā śubham //
yathoktāṃgeṣu sarveṣu sāvadhāna tayā mune

tataśśuddhamanā bhūtvā kuryyānmadhyaṃdinakriyāḥ //
maheśvaraṃ namaskṛtya gurūṃstīrthādikāni ca

sampūjayenmaheśānaṃ bhaktyā paramayā mune //
sāmbikaṃ jñānadātāraṃ pātāraṃ tribhavasya vai

tatosau dṛḍhacetasko yatiḥ svavṛṣasaṃsthitaḥ//
bhikṣārthampravrajecchuddho vipravargeṣu sādhuṣu

tatastatra ca śuddhātmā pañcadhā parikalpitam//
bhaikṣyaṃ yathocitaṃ kuryyāddūṣitānnaṃ vivarjjayet

śaucaṃ snānaṃ tathā bhikṣāṃ nityamekāntasevanam //
bhikṣauścatvāri karmmāṇi pañcamaṃ naiva vidyate

alābuṃ veṇupātraṃ ca dāravammṛṇmayantathā //
bhikṣoścattvāri pātrāṇi pañcamannaiva vidyate

tāmbūlaṃ taijasampātraṃ retassekaṃ sitāṃbaram //
divāsvāpo hi naktānnaṃ yatīnāṃ ṣaḍvivarjitāḥ

sākṣarā viparītāśca rākṣasāsta iti smṛtāḥ//
tasmādvai viparītaṃ ca karmma naivācaredyatiḥ

yatiḥ prayatnataḥ kuryyātkṣaurasnānaṃ ca śuddhaye //
saṃsmaranmanasā śuddhaṃ paraṃ brahma sadāśivam

ityaiva muniśārddūla tava snehānmayākhilaḥ //
kṣaurasnānavidhiḥ proktaḥ kimbhūyaḥ śrotumicchasi

iti śrīśivamahāpurāṇe ṣaṣṭhyāṃ kailāsasaṃhitāyāṃ kṣaurasnānavidhivarṇanaṃ nāma viṃśo'dhyāyaḥ