Shiva Purana · Chapter 6.19

subrahmaṇya uvāca //
atha mahāvākyāni
(१) prajñānaṃ brahma
( २) ahaṃ brahmāsmi
(३) tattvamasi
( ४) ayātmā brahma
(५) īśāvāsyamidaṃ sarvam
(६) prāṇo'smi
(७) prajñānātmā
(८) yadeveha tadamutra yadamutra tadanviha
( ९) anyadeva tadviditādatho aviditādapi
( १०) eṣa na ātmāntaryāmyamṛtaḥ
(११) sa yaścāyampuruṣo yaścāsāvā ditye sa ekaḥ
(१२) ahamasmi paraṃ brahma paraṃ paraparātparam
(१३) vedaśāstragurutvāttu svayamānaṃdalakṣaṇam (१४)
sarvabhūtasthitaṃ brahma tadevāhaṃ na saṃśayaḥ
(१५) tattvatasya prāṇohamasmi pṛthivyāḥ prāṇohamasmi (१६)
apāṃ ca prāṇohamasmi tejasaśca prāṇohamasmi (१७)
vāyośca prāṇohamasmi ākāśasya prāṇohamasmi ( १८)
triguṇasya prāṇohamasmi (१९)
sarvo'haṃ sarvātmako'haṃ saṃsārī yadbhūtaṃ yacca bhavyaṃ yadvartamānaṃ sarvātmakatvādadvitīyoham (२०)
sarvaṃ khalvidaṃ brahma ( २१)
sarvo'haṃ vimukto'ham ( २२)
yo'sau sohaṃ haṃsassohamasmi //
ityevaṃ sarvatra sadā dhyāyediti
//
atha mahāvākyānāmarthamāha //
prajñānaṃ brahmavākyārthaḥ pūrvameva prabodhitaḥ //
ahaṃpadasyārthabhūtaḥ śaktyātmā parameśvaraḥ

akāraḥ sarvavarṇāgryaḥ prakāśaḥ paramaḥ śivaḥ //
hakāro vyomarūpaḥ syācchaktyātmā saṃprakīrtitaḥ

śivaśaktyostu saṃyogādānandaḥ satatoditaḥ //
brahmeti śivaśaktyostu sarvātmatvamiti sphuṭam

pūrvamevopadiṣṭaṃ tatsohamasmīti bhāvayet //
tattvamityatra taditi saśabdārthaḥ prabodhitaḥ

anyathā so'hamityatra viparītārthabhāvanā //
ahaṃśabdastu puruṣastaditi syānnapuṃsakam//
evamanyonyavairudhyādanvayo nabhavettayoḥ

strīpuṃrūpasya jagataḥ kāraṇaṃ cānyathā bhavet //
sa tattvamasi ityevamupadeśārthabhāvanā

ayamātmeti vākye ca puṃrūpaṃ padayugmakam //
īśena rakṣaṇīyatvādīśāvasyamidaṃ jagat

prajñānātmā yadeveha tadamutreti cintayet //
yaḥ sa eveti vidvadbhissiddhāntibhirihocyate

uparisthitavākye ca yo'mutra sa iha sthitaḥ //
iti pūrvavadevārthaḥ puruṣo viduṣāṃ mataḥ

anyadeva tadviditādatho // aviditādapi //
asminvākye phalasyāpi vaiparītyavibhāvanā

yathāsyāttadvadevātra vakṣyāmi śrūyatāṃ mune //
ayathāviditāchabdo pūrvavadviditāditi

pravṛttissyāttadviditāttathaivāviditātparam //
anyadeva hi saṃsiddhyai na bhavediti niścitam

eṣa ta ātmāṃtaryāmī yo'mṛtaśca śivassvayam //
yaścāyampuruṣe śaṃbhuryaścāditye vyavasthitaḥ

sa cā'sau seti pārthakyaṃ naikaṃ sarvaṃ sa īritaḥ //
sopādhidvayamasyārtha upacārāttathocyate

taṃ śambhunāthaṃ śrutayo vadanti hi hiraṇmayam //
hiraṇya bāhava iti sarvāṃgasyo palakṣalam

anyathā tatpatitvaṃ tu na bhavediti yatnataḥ //
ya eṣontariti śaṃbhuśchāndogye śrūyate śivaḥ

hiraṇyaśmaśruvāṃstadvaddhiraṇyamayakeśavān //
nakhamārabhya keśāgrā sarvatrāpi hiraṇmayaḥ

ahamasmi paraṃ brahma parāparaparātparam //
iti vākyasya tātparyaṃ vadāmi śrūyatāmidam

ahaṃpadasyārthabhūtaḥ śaktyātmā śivaīritaḥ //
sa evāsmīti vākyārtha yojanā bhavati dhruvam

sarvotkṛṣṭaśca sarvātmā parabrahma sa īritaḥ //
paraścāthāparaśceti parātparamiti tridhā

rudro brahmā ca viṣṇuśca proktāḥ śrutyaiva nānyathā //
tebhyaśca paramo devaḥ paraśabdena bodhitaḥ

vedaśāstra gurūṇāṃ ca vākyābhyā savaśācchiśoḥ //
pūrṇānandamayaśśaṃbhuḥ prādurbhūto bhaveddhṛdi

sarvabhūtasthitaśśambhussa evāhaṃ na saṃśayaḥ //
tattvajātasya sarvasya prāṇosmyahamahaṃ śivaḥ

ityuktvā punarapyāha śivastattvatrayasya ca //
prāṇosmītyatra pṛthvyādiguṇāntagrahaṇānmune

ātmatattvāni sarvāṇi gṛhītānīti bhāvaya //
punaśca sarvagrahaṇaṃ vidyātattvaśivātmanoḥ

tattvayoścāsmyahaṃ prāṇāssarvasssarvātmako hyaham //
jīvasya cāntaryāmitvājjīvo'haṃ tasya sarvadā

yadbhūtaṃ yacca bhavyaṃ yadbhavipyatsarvameva ca //
manmayatvādahaṃ sarvaḥ sarvo vai rudra ityapi

śrutirāha mune sā hi sākṣācchivamukhodgatā //
sarvātmā paramairebhirguṇairnityasamanvayāt

svasmātparātmavirahādadvitīyo'hameva hi //
sarvaṃ khalvidaṃ brahmeti vākyārthaḥ pūrvvamīritaḥ

pūrṇo'haṃ bhāvarūpatvānnityamukto'hameva hi //
paśavo matprasādena muktā madbhāvamāśritāḥ

yo'sau sarvātmakaśśambhusso'haṃ sa śivo'smyaham //
iti vai sarvavākyārtho vāmadeva śivoditaḥ

itīśaśrutivākyābhyāmupadiṣṭārthamādarāt //
sākṣācchivaikyadaṃ puṃsāṃ śiśogururupādiśet

ādāya śaṃkhaṃ sādhāramastramantreṇa bhasmanā //
śodhya tatpuratassthāpya caturasre samarcite

omityabhyarcya gandhādyairastraṃ vastropaśobhitam //
vāsitaṃ jalamāpūrya sampūjyomiti mantrataḥ

saptadhaivābhimaṃtryātha praṇavena punaśca tam //
yastvantaraṃ kiṃcidasti kurute tyatibhītibhāk

ityāha śrutisattattvaṃ dṛḍhātmā gatabhīrbhava //
ityābhāṣya svayaṃ śiṣyaṃ devaṃ dhyāyansamarcayet

śiṣyāsanaṃ samprapūjya ṣaḍutthāpanamārgataḥ //
śivāsanaṃ ca saṃkalpya śivamūrtiṃ prakalpayet

pañca brahmāṇi vinyasya śiraḥ pādāvasānakam //
muṇḍavatkrakalābhedaiḥ praṇavasya kalā api

aṣṭatriṃśanmaṃtrarūpā śśiṣyadehe'tha mastake //
samāvāhya śivaṃ mudrāḥ sthāpanīyāḥ pradarśayet

tataścāṅgāni vinyasya sarvajñānītyanukramāt//
kalpayedupacārāṃśca ṣoḍaśāsanapūrvakān

pāyasānnañca naivedyaṃ samarpyo magnijāyayā //
gaṇḍūṣācamanārghyādi dhūpadīpādikaṃ kramāt

nāmāṣṭakena sampūjya brāhmaṇairvedapāragaiḥ //
japedbrahmavidāpnoti bhṛgurvai vāruṇistataḥ

yo devānāmupakramyaḥ yaḥ paraḥ sa maheśvaraḥ //
ityaṃtaṃ tasya purataḥ kahlārādivirnitām

ādāya mālāmutthāya śrīvirūpākṣa nirmite //
śāstre paṃcāśike rūpe siddhiskandhaṃ japecchanaiḥ

khyātiḥ pūrṇohamityaṃtaṃ sānukūlena cetasā //
deśikastasya śiṣyasya kaṇṭhadeśe samarpayet

tilakaṃ vandanenātha sarvāṅgālepanaṃ punaḥ //
svasampradāyānuguṇaṃ kārayecca yathāvidhi

tataśca deśikaḥ prītyā nāmaśrīpādasaṃjñitam //
chatrañca pādukāṃ dadyāddūrvākalpavikalpanam // ४/
vyākhyātatvañca karmmādigurvāsanaparigraham //
anugṛhya gurustasmai śiṣyāya śivarūpiṇe

śivohamasmīti sadā samādhistho bhaveti tam //
samprocyātha svayaṃ tasmai namaskāraṃ samācaret

sampradāyānuguṇyena namaskuryustathāpare //
śiṣyastadā samutthāya namaskuryādguruntathā //
gurorapi guruṃ tasya śiṣyāṃśca svagurorapi

evaṃ kṛtanamaskāraṃ śiṣyandadyādguruḥ svayam //
suśīlaṃ yatavācaṃ taṃ vinayāvanataṃ sthitam

adyaprabhṛti lokānāmanugrahaparo bhava //
parīkṣya vatsaraṃ śiṣyamaṃgīkuru vidhānataḥ

rāgādidoṣānsaṃtyajya śivadhyānaparo bhava //
satsampradāyasaṃsiddhaissaṃgaṃ kuru na cetaraiḥ

anabhyarcya śivaṃ jātumā bhuṃkṣvāprāṇa saṃkṣayam //
gurubhaktiṃ samāsthāya sukhī bhava sukhī bhava

iti kramādguruvaro dayālurjñānasāgaraḥ //
sānukūlena cittena samaṃ śiṣyaṃ samācaret

tava snehānmayāyaṃ vai vāmadeva munīśvara//
yogapaṭṭaprakāraste prokto guhyataro'pi hi

ityuktvā ṣaṇmukhastasmai kṣaurasnānavidhikramam//
vaktumārabhata prītyā yatīnāṃ kṛpayā śubham

iti śrīśivamahāpurāṇe ṣaṣṭhyāṃ kailāsasaṃhitāyāṃ yogapaṭṭavidhivarṇanaṃnāmaikonaviṃśo'dhyāyaḥ