Shiva Purana · Chapter 5.50

munaya ūcuḥ //
śrotukāmā vayaṃ sarve durgācaritamanvaham //
aparaṃ ca mahāprājña tattvaṃ varṇaya no'dbhutam

śṛṇvatāntvanmukhāmbhojātkathā nānā sudhopamāḥ //
na tṛpyati mano'smākaṃ sūta sarvārthavittama

// sūta uvāca //
durgamaḥ prathito nāmnā ruruputro mahābalaḥ //
brahmaṇo varadānena catasro'labhata śrutīḥ

devājeyabalaṃ cāpi saṃprāpya jagatītale //
karoti sma bahūtpātāndivi devāścakampire

sarvā naṣṭeṣu vedeṣu kriyā naṣṭā babhūva ha //
brāhmaṇāśca durācārā babhūbussasurāstadā

na dānaṃ na tapo'tyugraṃ na yāgo havanaṃ na hi //
anāvṛṣṭistato jātā pṛthivyāṃ śatavārṣikī

hāhākāro mahānāsīttriṣu lokeṣu duḥkhitāḥ //
abhavaṃśca janāssarve kṣuttṛḍbhyāṃ pīḍitā bhṛśam

saritaḥ sāgarāścaiva vāpīkūpasarāṃsi ca //
nirjalā abhavansarve saṃśuṣkā vṛkṣavīrudhaḥ

tato dṛṣṭvā madādduḥkhaṃ prajānāṃ dīnacetasām //
tridaśāśśaraṇaṃ yātā yogamāyāṃ maheśvarīm

devā ūcuḥ //
rakṣarakṣa mahāmāye svakīyāssakalāḥ prajāḥ //
kopaṃ saṃhara nūnantvaṃ lokā naṃkṣyaṃti vānyathā

kathā śuṃbhohato daityo niśuṃbhaśca mahābalaḥ //
dhūmrākṣaścaṇḍamuṇḍau ca raktabījo mahābalaḥ

sa madhuḥ kaiṭabho daityo mahiṣāsura eva ca //
tathaivāmuṃ kṛpāsindho dīnabandho jahi drutam

aparādho bhavatyeva bālakānāṃ pade pade //
sahate ko jano loke kevalaṃ mātaraṃ vinā

yadāyadābhavadduḥkha devānāṃ brahmaṇāntathā //
tadātadāvatīryāśu kuruṣe sukhino janān

iti viklavitanteṣāṃ samākarṇya kṛpāmayī //
anantākṣamayaṃ rūpandarśayāmāsa sāmpratam

dhanurbāṇau tathā padma nānāmūlaphalāni ca //
caturbhirdadhatī hastaiḥ prasannamukhapaṅkajā

tato dṛṣṭvā prajāstaptāḥ karuṇāpūritekṣaṇā//
ruroda nava ghasrāṇi nava rātrīssamākulā

mocayāmāsa dṛṣṭibhyo vāridhārāḥ sahasraśaḥ //
tābhiḥ pratarppitā lokā auṣadhyaḥ sakalā api

agādhatoyāssarito babhūvuḥ sāgarā api //
ruruhurdharaṇīpṛṣṭhe śākamūlaphalāni ca

vitatāra karasthāni sumanobhyaḥ phalāni ca //
gobhyastṛṇāni ramyāṇi tathānyebhyo yathārhataḥ

santuṣṭā abhavansarve sadaiva dvijamānuṣāḥ //
tato jagāda sā devī kimanyatkaravāṇi vaḥ

sametyocustadā devā bhavatyā toṣitā janāḥ //
vedāndehi kṛpāṃ kṛtvā durgameṇa samāhṛtām

tathāstviti prabhāṣyāha yātayāta nijālayam //
vitariṣyāmi vo vedānacireṇaiva kālataḥ

tataḥ pramuditā devāssvaṃ svaṃ dhāma samāyayuḥ //
supraṇamya jagadyoniṃ phullendīvaralocanām

tataḥ kolāhalo jāto divi bhūmyantarikṣake //
tacchrutvā rauravaḥ sadyo nyaruṇatsarvataḥ purīm

tatastejomayaṃ cakraṃ vidhāya paritaḥ śivā //
rakṣaṇārthaṃ devatānāṃ svayaṃ tasmādbahirgatā

tataḥ samabhavayuddhaṃ devyā daityasya cobhayoḥ //
vavṛṣuḥ samare bāṇānniśitānkaṃkaṭacchidaḥ

etasminnaṃtare tasyāḥ śarīrādramyamūrttayaḥ //
kālī tārā cchinnamastā śrīvidyā bhuvaneśvarī

bhairavī bagalā dhūmra śrīmattripurasudarī //
mātaṃgī ca mahāvidyā nirgatā daśa sāyudhāḥ

asaṃkhyātāstato jātā mātaro divyamūrttayaḥ //
candralekhādharāssarvāssarvā vidyutatsamaprabhāḥ

tato mātṛgaṇairyuddhaṃ prāvartata bhayaṃkaram //
rauravīyaṃ hatantābhirdalamakṣauhiṇīśatam

jaghāna sā tadā daityaṃ durgamaṃ śūladhārayā //
papāta dharaṇīpṛṣṭhe khātamūladrumo yathā

itthaṃ hatvā tadā daityaṃ durgamāsuranāma kam //
ādāya caturo vedāndadau devebhya īśvarī

devā ūcuḥ //
asmadarthaṃ tvayā rūpamanantākṣimayaṃ dhṛtam //
munayaḥ kīrtayiṣyanti śatākṣīntvāmato'mbike

ātmadehasamudbhūtaiḥ śākairlokā mṛtā yataḥ //
śākaṃbharīti vikhyātantatte nāma bhaviṣyati

durgamākhyo mahādaityo hato yasmāttataḥ śive //
durgāṃ bhagavatīṃ bhadrāṃ vyāhariṣyaṃti mānavāḥ

yoganidre namastubhyaṃ namaste'stu mahābale //
namo jñānaprade tubhyaṃ viśvamātre namo namaḥ

tattvamasyādivākyairyā bodhyate parameśvarī //
anantakoṭibrahmāṇḍanāyikāyai namo namaḥ

vāṅmanaḥkāyaduṣprāpāṃ sūryacandrāgnilocanām //
stotuṃ na śaknumo mātastva tprabhāvābudhā vayam

mādṛśānamarāndṛṣṭvā kaḥ kuryādīdṛśīndayām //
varjayitvā sureśānīṃ śatākṣī mātaraṃ vinā

trilokī nābhibhūyeta bādhābhiśca nirantaram //
evaṃ kāryastvayā yatno'smākaṃ vairivināśanam

devyuvāca // //
vatsāndṛṣṭvā yathā gāvo vyagrā dhāvanti satvaram //
tathaiva bhavato dṛṣṭvā dhāvāmi vyākulā satī

mama yuṣmānapaśyantyā paśyantyā bālakāniva //
api prāṇānprayacchantyāḥ kṣaṇa eko yugāyate

kāpi cintā na karttavyā yuṣmābhirbha ktiśālibhiḥ //
bhavatyāṃ mayi tiṣṭhantyāṃ saṃharantyāṃ nijāpadaḥ

yathā pūrvaṃ hatā daityā haniṣyāmi tathā'surān//
saṃśayo nātra karttavyassatyaṃsatyaṃ bravīmyaham

yadā śuṃbho niśuṃbhaścāparau daityau bhaviṣyataḥ //
tadāhaṃ nandabhāryāyāṃ yaśodāyāṃ yaśomayī

yonijaṃ rūpamāsthāya janiṣye gopagokule //
haniṣyāmyasurau tanmāṃ vyāhariṣyanti nandajām

bhrāmaraṃ rūpamāsthāya vadhiṣyāmyaruṇaṃ yataḥ //
bhrāmarīti ca māṃ loke kīrtayiṣyanti mānavāḥ

kṛtvā bhīmaṃ punā rūpaṃ rakṣāṃsyatsyāmyahaṃ yadā //
bhīmā devīti vikhyātaṃ tanme nāma bhaviṣyati

yadāyadā'surotthaiva bādhā bhuvi bhaviṣyati //
tadātadāvatīryāhaṃ śaṃ kariṣyāmyasaṃśayam

yā śatākṣī smṛtā devī saiva śākaṃbharī matā //
saiva prakīrtitā durgā vyaktirekaiva triṣvapi

na śatākṣīsamā kāciddayālurbhuvi devatā //
dṛṣṭvā'rudatprajāstaptā yā navāhaṃ maheśvarī

iti śrīśivamahāpurāṇe pañcamyāmumāsaṃhitāyāṃ śatākṣyādyavatāravarṇanaṃ nāma paṃcāśattamo'dhyāyaḥ