Shiva Purana · Chapter 5.49

munaya ūcuḥ //
umāyā bhuvaneśānyāssūta sarvārthavittama //
avatāraṃ samācakṣva yato jātā sarasvatī

yā gīyate parabrahmamūlaprakṛtirīśvarī //
nirākārāpi sākārā nityā nandamathī satī

sūta uvāca //
tāpasāḥ śṛṇuta premṇā caritraṃ paramaṃ mahat //
yasya vijñānamātreṇa naro yāti parāṃ gatim

devadānavayoryuddhamekadāsītparasparam //
mahāmāyāprabhāveṇāmarāṇāṃ vijayo'bhavat

tato'valiptā amarāssvapraśaṃsāṃ vitenire//
vayaṃ dhanyā vayaṃ dhanyā kiṃ kariṣyaṃti no'surāḥ

ye prabhāvaṃ samālokyāsmākaṃ paramaduḥsaham //
bhītā nāgālayaṃ yātā yātayāteti vādinaḥ

aho balamaho tejo daityavaṃśakṣayaṃkaram //
aho bhāgyaṃ sumanasāmevaṃ sarve'bhyavarṇayan

tata āvirabhūttejaḥ kūṭarūpantadaiva hi //
adṛṣṭapūrvaṃ taddṛṣṭvā vismitā abhavansurāḥ

kimidaṃ kimidaṃ ceti ruddhakaṇṭhāssamabruvana //
ajānantaḥ paraṃ śyāmānu bhāvaṃ mānabhañjanam

tata ājñāpayaddevāndevānāmadhināyakaḥ //
yāta yūyaṃ parīkṣadhvaṃ yāthātathyena kinviti

surendraprerito vāyurmahasaḥ sannidhiṃ gataḥ //
kastvaṃ bhoriti sambodhyāvocadenaṃ ca tanmahaḥ

iti pṛṣṭastadā vāyurmahasātigarīyasā //
vāyurasmi jagatprāṇassābhimāno'bravīdidam

jaṃgamājaṃgamaṃ sarvamotaprotamidaṃ jagat //
mayyeva nikhilādhāre cālayāmyakhilaṃ jagat //

tadovāca mahātejaḥ śakto'si yadi cālane //
dhṛtametattṛṇaṃ vāyo cālayasva nijecchayā

/
tataḥ sarvaprayatnenākarodyatnaṃ sadāgatiḥ //
na cacāla yadā sthānāttadāsau lajjito'bhavata

tūṣṇīṃ bhūtvā tato vāyurjagāmendraṃ sabhāṃ prati //
kathayāmāsa tad vṛttaṃ svakīyābhibhavānvitam

sarveśatvaṃ vayaṃ sarve mṛṣaivātmani manmahe //
na pārayāmahe kiṃcidvi dhātuṃ kṣudravastvapi

tataśca preṣayāmāsa marutvānsakalānsurān //
na śekuste yadā jñātuṃ tadendraḥ svayamabhyagāt

maghavantamathāyāntaṃ dṛṣṭvā tejotiduḥsaham//
babhūvāntarhitaṃ sadyo vismito'bhūcca vāsavaḥ

caritramīdṛśaṃ yasya tameva śaraṇaṃ śraye //
iti saṃcintayāmāsa sahasrākṣaḥ punaḥpunaḥ

etasminnaṃtare tatra nirvyājakaruṇātanuḥ //
teṣāmanugrahaṃ kartuṃ hartuṃ garvaṃ śivāṃganā/

caitraśuklanavamyāṃ tu madhyāhnasthe divākare //
prādurāsīdumā devī saccidānandarūpiṇī

mahomadhye virājantī bhāsayantī diśo rucā //
bodhayantī surānsarvānbrahmaivāhamiti sphuṭam

caturbhirdadhatī hastairvarapāśāṃkuśābhayān //
śrutibhissevitā ramyā navayauvanagarvitā

raktāmbaraparīdhānā raktamālyānulepanā //
koṭikaṃdarppasaṃkāśā candrakoṭisamaprabhā/

vyājahāra mahāmāyā sarvāntaryyāmirūpiṇī //
sākṣiṇī sarvabhūtānāṃ parabrahmasvarūpiṇī

umovāca //
na brahmā na surārātirna purārātirīśvaraḥ //
madagre garvituṃ kiṃcitkā kathānyasuparvaṇām

paraṃ brahma paraṃ jyotiḥ praṇavadvandvarūpiṇī //
ahamevāsmi sakalaṃ madanyo nāsti kaścana

nirākārāpi sākārā sarvatattvasvarūpiṇī //
apratarkyaguṇā nityā kāryakāraṇarūpiṇī

kadāciddayitākārā kadācitpuruṣākṛtiḥ //
kadācidubhayākārā sarvākārāhamīśvarī

virañciḥ sṛṣṭikartāhaṃ jagatpātāhamacyutaḥ //
rudraḥ saṃhārakartāhaṃ sarvaviśvavimohinī

kālikā kamalāvāṇī mukhāssarvā hi śaktayaḥ //
madaṃśādeva saṃjātāstathemāssakalāḥ kalāḥ

matprabhāvājjitāssarve yuṣmābhirdditinandanāḥ //
tāmavijñāya māṃ yūyaṃ vṛthā sarveśamāninaḥ

yathā dārumayīṃ yoṣāṃ nartayatyaindrajālikaḥ //
tathaiva sarvabhūtāni nartayāmyahamīśvarī

madbhayādvāti pavanaḥ sarvaṃ dahati havyabhuk//
lokapālāḥ prakurvaṃti svasvakarmāṇyanāratam

kadāciddevavargāṇāṃ kadācidditijanma nām //
karomi vijayaṃ samyaksvatantrā nijalīlayā

avināśi paraṃ dhāma māyātītaṃ parātparam //
śrutayo varṇayante yatta drūpantu mamaiva hi

saguṇaṃ nirguṇaṃ ceti madrūpaṃ dvividhaṃ matam //
māyāśabalitaṃ caikaṃ dvitīyantadanāśritam

evaṃ vijñāya māṃ devāssvaṃ svaṃ garvaṃ vihāya ca //
bhajata praṇayopetāḥ prakṛtiṃ māṃ sanātanīm

iti devyā vacaḥ śrutvā karuṇāgarbhitaṃ surāḥ //
tuṣṭuvuḥ parameśānīṃ bhaktisaṃnatakandharāḥ

kṣamasva jagadīśāni prasīda parameśvari //
maivaṃ bhūyātkadācinno garvo mātarddayāṃ kuru

tataḥprabhṛti te daivā hitvā garvaṃ samāhitāḥ//
umāmārādhayāmāsuryathāpūrvaṃ yathāvidhi

iti vaḥ kathito viprā umāprādurbhavo mayā //
yasya śravaṇamātreṇa paramaṃ padamaśnute

iti śrīśivamahāpurāṇe pañcamyāmumāsaṃhitāyāmumāprādurbhāvavarṇanaṃ nāmaikonapañcāśattamo'dhyāyaḥ