Shiva Purana · Chapter 5.42

// bhīṣma uvāca//
mārkaṇḍeya mahāprājña pitṛbhaktibhṛtāṃ vara //
kiṃ jātaṃ tu tato brūhi kṛpayā munisattama

mārkaṇḍeya uvāca //
te dharmayoganiratāssapta mānasacāriṇaḥ //
vāyvaṃbubhakṣāssatataṃ śarīramupaśoṣayan

sa rājāṃtaḥpuravṛto nandane maghavā iva //
krīḍitvā suciraṃ tatra sabhāryyassvapuraṃ yayau

anūho nāma tasyāsītputraḥ paramadhārmikaḥ//
taṃ vaibhrājaḥ sutaṃ rājye sthāpayitvā vanaṃ yayau

tapaḥ kartuṃ samārebhe yatra te sahacāriṇaḥ//
sa vai tatra nirāhāro vāyubhakṣo mahātapāḥ

tato vibhrājitaṃ tena vibhrājaṃ nāma tadvanam//
babhūva suprasiddhaṃ hi yogasiddhipradāyakam

tatraiva te hi śakunāścatvāro yogadharmiṇaḥ //
yogabhraṣṭāstrayaścaiva dehatyāgakṛto'bhavan

kāṃpilye nagare te tu brahmadattapurogamāḥ //
jātāssaptamahātmānassarve vigatakalmaṣāḥ /

smṛtimaṃto'tra catvārastrayastu parimohitāḥ //
svatantrasyāhvayo jāto brahmadatto mahaujasaḥ

chidradarśī sunetrastu vedavedāṃgapāragau //
jātau śrotriyadāyādau pūrvajātisahāṣitau

paṃcālo bahvṛcastvāsīdācāryatvaṃ cakāra ha//
dvivedaḥ puṃḍarīkaśca chaṃdogo'dhvaryureva ca

tato rājā sutaṃ dṛṣṭvā brahmadattamakalmaṣam //
abhiṣicya svarājye tu parāṃ gatimavāptavān

paṃcālaḥ puṇḍarīkastu putrau saṃsthāpya mandire //
viviśaturvanaṃ tatra gatau paramikāṃ gatim

brahmadattasya bhāryyā tu sannitirmāma bhārata //
sā tvekabhāvasaṃyuktā reme bhartrā sahaiva tu

śeṣāstu cakravākā vai kāṃpilye sahacāriṇaḥ //
jātāḥ śrotriyadāyādā daridrasya kule nṛpa

dhṛtimānsumahātmā ca tattvadarśīṃ nirutsukaḥ //
vedādhyayana sampannāścatvāraśchidradarśinaḥ

te yoganiratāssiddhāḥ prasthitāssarva eva hi//
āmaṃtrya ca mithaḥ śaṃbhoḥ padāmbhojaṃ praṇamya tu

śūrā ye samprapadyante apunarbhavakāṃkṣiṇaḥ //
pāpampraṇāśayantvadya tacchambhoḥ paramampadam

śārīre mānase caiva pāpe vāgje mahāmune //
kṛte samyagidambhaktyā paṭhecchraddhāsamanvitaḥ

mucyate sarvapāpebhyaśśivanāmānukīrtanāt //
uccāryamāṇa etasmindevadevasya tasya vai

vilayaṃ pāpamāyāti hyāmabhāṇḍamivāmbhasi //
tasmāttatsaṃcite pāpe samanaṃtarameva ca

japtavyametatpāpasya praśamāya mahāmune //
naraiḥ śraddhālubhibhūryassarvakāmaphalāptaye

puṣṭyarthamimamadhyāyaṃ paṭhedenaṃ śṛṇoti vā //
mucyate sarvapāpebhyo mokṣaṃ yāti na saṃśayaḥ

iti śrīśivamahāpurāṇe pañcamyāmumāsaṃhitāyāṃ pitṛkalpe pitṛbhāvavarṇanaṃ nāma dvicatvāriṃśo'dhyāyaḥ