શિવ પુરાણ · અધ્યાય 5.42

॥ ભીષ્મ ઉવાચ॥
માર્કણ્ડેય મહાપ્રાજ્ઞ પિતૃભક્તિભૃતાં વર ॥
કિં જાતં તુ તતો બ્રૂહિ કૃપયા મુનિસત્તમ

માર્કણ્ડેય ઉવાચ ॥
તે ધર્મયોગનિરતાસ્સપ્ત માનસચારિણઃ ॥
વાય્વંબુભક્ષાસ્સતતં શરીરમુપશોષયન્

સ રાજાંતઃપુરવૃતો નન્દને મઘવા ઇવ ॥
ક્રીડિત્વા સુચિરં તત્ર સભાર્ય્યસ્સ્વપુરં યયૌ

અનૂહો નામ તસ્યાસીત્પુત્રઃ પરમધાર્મિકઃ॥
તં વૈભ્રાજઃ સુતં રાજ્યે સ્થાપયિત્વા વનં યયૌ

તપઃ કર્તું સમારેભે યત્ર તે સહચારિણઃ॥
સ વૈ તત્ર નિરાહારો વાયુભક્ષો મહાતપાઃ

તતો વિભ્રાજિતં તેન વિભ્રાજં નામ તદ્વનમ્॥
બભૂવ સુપ્રસિદ્ધં હિ યોગસિદ્ધિપ્રદાયકમ્

તત્રૈવ તે હિ શકુનાશ્ચત્વારો યોગધર્મિણઃ ॥
યોગભ્રષ્ટાસ્ત્રયશ્ચૈવ દેહત્યાગકૃતોઽભવન્

કાંપિલ્યે નગરે તે તુ બ્રહ્મદત્તપુરોગમાઃ ॥
જાતાસ્સપ્તમહાત્માનસ્સર્વે વિગતકલ્મષાઃ ।

સ્મૃતિમંતોઽત્ર ચત્વારસ્ત્રયસ્તુ પરિમોહિતાઃ ॥
સ્વતન્ત્રસ્યાહ્વયો જાતો બ્રહ્મદત્તો મહૌજસઃ

છિદ્રદર્શી સુનેત્રસ્તુ વેદવેદાંગપારગૌ ॥
જાતૌ શ્રોત્રિયદાયાદૌ પૂર્વજાતિસહાષિતૌ

પંચાલો બહ્વૃચસ્ત્વાસીદાચાર્યત્વં ચકાર હ॥
દ્વિવેદઃ પુંડરીકશ્ચ છંદોગોઽધ્વર્યુરેવ ચ

તતો રાજા સુતં દૃષ્ટ્વા બ્રહ્મદત્તમકલ્મષમ્ ॥
અભિષિચ્ય સ્વરાજ્યે તુ પરાં ગતિમવાપ્તવાન્

પંચાલઃ પુણ્ડરીકસ્તુ પુત્રૌ સંસ્થાપ્ય મન્દિરે ॥
વિવિશતુર્વનં તત્ર ગતૌ પરમિકાં ગતિમ્

બ્રહ્મદત્તસ્ય ભાર્ય્યા તુ સન્નિતિર્મામ ભારત ॥
સા ત્વેકભાવસંયુક્તા રેમે ભર્ત્રા સહૈવ તુ

શેષાસ્તુ ચક્રવાકા વૈ કાંપિલ્યે સહચારિણઃ ॥
જાતાઃ શ્રોત્રિયદાયાદા દરિદ્રસ્ય કુલે નૃપ

ધૃતિમાન્સુમહાત્મા ચ તત્ત્વદર્શીં નિરુત્સુકઃ ॥
વેદાધ્યયન સમ્પન્નાશ્ચત્વારશ્છિદ્રદર્શિનઃ

તે યોગનિરતાસ્સિદ્ધાઃ પ્રસ્થિતાસ્સર્વ એવ હિ॥
આમંત્ર્ય ચ મિથઃ શંભોઃ પદામ્ભોજં પ્રણમ્ય તુ

શૂરા યે સમ્પ્રપદ્યન્તે અપુનર્ભવકાંક્ષિણઃ ॥
પાપમ્પ્રણાશયન્ત્વદ્ય તચ્છમ્ભોઃ પરમમ્પદમ્

શારીરે માનસે ચૈવ પાપે વાગ્જે મહામુને ॥
કૃતે સમ્યગિદમ્ભક્ત્યા પઠેચ્છ્રદ્ધાસમન્વિતઃ

મુચ્યતે સર્વપાપેભ્યશ્શિવનામાનુકીર્તનાત્ ॥
ઉચ્ચાર્યમાણ એતસ્મિન્દેવદેવસ્ય તસ્ય વૈ

વિલયં પાપમાયાતિ હ્યામભાણ્ડમિવામ્ભસિ ॥
તસ્માત્તત્સંચિતે પાપે સમનંતરમેવ ચ

જપ્તવ્યમેતત્પાપસ્ય પ્રશમાય મહામુને ॥
નરૈઃ શ્રદ્ધાલુભિભૂર્યસ્સર્વકામફલાપ્તયે

પુષ્ટ્યર્થમિમમધ્યાયં પઠેદેનં શૃણોતિ વા ॥
મુચ્યતે સર્વપાપેભ્યો મોક્ષં યાતિ ન સંશયઃ

ઇતિ શ્રીશિવમહાપુરાણે પઞ્ચમ્યામુમાસંહિતાયાં પિતૃકલ્પે પિતૃભાવવર્ણનં નામ દ્વિચત્વારિંશોઽધ્યાયઃ