Shiva Purana · Chapter 5.39

śaunaka uvāca //
sagarasyātmajā vīrāḥ kathaṃ jātā mahābalāḥ //
vikrāṃtāḥ ṣaṣṭisāhasrā vidhanā kena vā vada

sūta uvāca//
dve patnyo sagarasyāstāṃ tapasā dagdhakilviṣe//
aurvastayorvaraṃ prādāttoṣito munisattamaḥ

ṣaṣṭiputrasahasrāṇi ekā vavre tarasvinām//
ekaṃ vaṃśakaraṃ tvekā yatheṣṭaṃ varaśālinī

tatraivāgatya tāṃ labdhvā putrāñśūrānbahūṃstadā //
sā caiva suṣuve tumbaṃ bījapūrvaṃ pṛthakkṛtam

te sarve hi svadhātrībhirvavṛdhuśca yathākramam //
ghṛtapūrṇeṣu kumbheṣu kumārāḥ prītivarddhanāḥ

kapilāgnipradagdhānāṃ teṣāṃ tatra mahātmanām //
ekaḥ paṃcajano nāma putro rājā babhūva ha

tataḥ paṃcajanasyāsīdaṃśumānnāma vīryavān //
dilīpastanayastasya putro yasya bhagīrathaḥ

yastu gaṃgā saricchreṣṭhāmavātārayataḥ prabhu //
samudramānayaccemāṃ duhitṛtvamakalpayat

bhagīrathasuto rājā śrutasenaḥ iti śrutaḥ//
nābhāgastu sutastasya putraḥ paramadhārmikaḥ

aṃbarīṣastu nābhāgissiṃdhudvīpastato'bhavat//
ayutājittu dāyādassiṃdhudvīpasya vīryavān

āyutājitsutastvāsīdṛtuparṇo mahāyaśāḥ //
divyākṣahṛdayajño'sau rājā nalasakho'bhavat

ṛtuparṇasutastvāsīdanuparṇo mahādyutiḥ //
tasya kalmāṣapādo vai nāmnā mitrasahastathā

kalmāṣapādasya sutassarvakarmeti viśrutaḥ //
anaraṇyastu putro'bhūdviśrutassarvaśarmaṇaḥ

anaraṇyasuto rājā vidvānmuṃḍidruho'bhavat//
niṣadhastasya tanayo ratiḥ khaṭvāṅga ityapi

yena svargādihāgatya muhūrtaṃ prāpya jīvitam //
trayo'pi saṃcitā lokā buddhyā satyena cānagha

dīrghabāhussutastasya raghustasyābhavatsutaḥ //
ajastasya tu putro'bhūttasmāddaśaratho'bhavat

rāmo daśarathājjajñe dharmātmā yo mahāyaśāḥ //
sa viṣṇvaṃśo mahāśaivaḥ paulastyo yena ghātitaḥ

taccaritaṃ ca bahudhā purāṇeṣu pravarṇitam //
rāmāyaṇe prasiddhaṃ hi nātaḥ proktaṃ tu vistarāt

rāmasya tanayo jajñe kuśa ityapi viśrutaḥ //
atithistu kuśājjajñe niṣadhastasya cātmajaḥ

niṣadhasya nalaḥ putro nabhāḥ putro nalasya tu //
nabhasaḥ puṃḍarīkaśca kṣemadhanvā tatasmṛtaḥ

kṣemadhanvasutastvāsīddevānīkaḥ pratāpavān //
āsīdahīnagurnāma devānīkātmajaḥ prabhuḥ

ahīnagostu dāyādassahasvānnāma vīryavān //
vīrasenātmajastasya yaścaikṣvākukulodbhavaḥ

vīrasenasya dāyādaḥ pāriyātro babhūva ha//
tato balākhyastanayassthalastasmādabhūtsutaḥ

arkāṃśasaṃbhavastasmātputro yakṣaḥ pratāpavān//
tatsutastvaguṇastvāsīttasmādvidhṛtirātmajaḥ

hiraṇyanābhastatputro yogācāryyo babhūva ha//
sa śiṣyo jaiminimunerhyātmavidyāviśāradaḥ

kauśilyo yājñavalkyotha yogamadhyātmyasaṃjñakam//
yato'dhyagānnṛpavarāddhṛdayagraṃthibhedanam

tatsuto puṣpanāmā hi dhruvasaṃjñastadātmajaḥ//
agnivarṇassutastasya śīghranāmā sutastataḥ

marunnāmā sutastasya yogasiddho babhūva ha//
asāvāste'dyāpi prabhuḥ kalāpagrāmasaṃjñake

tadvāsibhiśca munibhiḥ kaleraṃte sa eva hi //
punarbhāvayitā naṣṭaṃ sūryavaṃśaṃ viśeṣataḥ

pṛthuśrutaśca tatputrassaṃdhistasya sutaḥ smṛtaḥ //
amarṣaṇassutastasya marutvāṃstatsuto'bhavat

viśvasāhvassutastasya tatsuto' bhūtprasenajit //
takṣakastasya tanayastatsuto hi bṛhadbalaḥ

eta ikṣvākuvaṃśīyā atītāḥ saṃprakīrtitāḥ //
śṛṇu tānāgatānbhūtāṃstadvaṃśyāndharmavittamān

bṛhadbalasya tanayo bhavitā hi bṛhadraṇaḥ //
bṛhadraṇasutastasyorukriyo hi bhaviṣyati

vatsavṛddhassutastasya prativyomasutastataḥ //
bhānustattanayo bhāvī divāko vāhinīpatiḥ

sahadevassutastasya mahāvīro bhavi ṣyati //
tatsuto bṛhadaśvo hi bhānumāṃstatsuto balī

suto bhānumato bhāvī pratīkāśvaśca vīryavān //
supratīkassutastasya bhaviṣyati nṛpottamaḥ

marudevassutastasya sunakṣatro bhaviṣyati //
tatsutaḥ puṣkarastasyāṃtarikṣastatsuto dvijāḥ

sutapāstatsuto vīro mitracittasya cātmajaḥ //
bṛhadbhājassutastasya barhināmā tadātmajaḥ

kṛtaṃjayassutastasya tatsuto hi raṇaṃjayaḥ //
saṃjayastu mayastasya tasya śākyo hi cātmajaḥ

śuddhodastanayastasya lāṃgalastu tadātmajaḥ //
tasya prasenajitputrastatsutaḥ śūdrakāhvayaḥ

ruṇako bhavitā tasya surathastatsutaḥ smṛtaḥ //
sumitrastatsuto bhāvī vaṃśaniṣṭhāṃta eva hi

sumitrāṃtonvayo'yaṃ vai ikṣvākūṇāṃ bhaviṣyati //
rājñāṃ vaicitravīryyāṇāṃ dharmmiṣṭhānāṃ sukarmmaṇām

sumitraṃ prāpya rājānaṃ tadvaṃśaśśubhaḥ kalau //
saṃsthāṃ prāpsyati tadbrāhme varddhiṣyati punaḥ kṛte

etadvaivasvate vaṃśe rājāno bhūridakṣiṇāḥ //
ikṣvākuvaṃśaprabhavāḥ prādhānyena prakīrtitāḥ

puṇyeyaṃ paramā sṛṣṭirādityasya vivasvataḥ//
śrāddhadevasya devasya prajānāṃ puṣṭidasya ca

paṭhañchṛṇvannimāṃ sṛṣṭimādityasya ca mānavaḥ //
prajāvāneti sāyujyamiha bhuktvā sukhaṃ param

iti śrīśivamahāpurāṇe pañcamyāmumāsaṃhitāyāṃ vaivasvatavaṃśodbhavarājavarṇanaṃ nāmaikonacatvāriṃśo'dhyāyaḥ