Shiva Purana · Chapter 5.23

sanatkumāra uvāca //
śṛṇu vyāsa mahābuddhe dehasyāśucitāṃ mune //
mahattvaṃ ca svabhāvasya samāsātkathayāmyaham

śukraśoṇitasaṃyogāddehassaṃjāyate yataḥ//
nityaṃ viṇmūtrasaṃpūrṇastenāyamaśucissmṛtaḥ

yathāṃtarviṣṭhayā pūrṇaśśucimānna bahirghaṭaḥ //
śodhyamāno hi deho'yaṃ tenāyamaśucistataḥ

saṃprāpyātipavitrāṇi paṃcagavyahavīṃṣi cā/
aśucitvaṃ kṣaṇādyāṃti kimanyadaśucistataḥ

hṛdyānyapyannapānāni yaṃ prāpya surabhīṇi ca //
aśucitvaṃ prayāṃtyāśu kimanyadaśucistataḥ

he janāḥ kinna paśyaṃti yanniryāti dinedine //
svadehātkaśmalaṃ pūtistadādhāraḥ kathaṃ śuciḥ

dehassaṃśodhyamāno'pi paṃcagavyakuśāṃbubhiḥ //
ghṛṣyamāṇa ivāṃgāro nirmalatvaṃ na gacchati

srotāṃsi yasya satataṃ prabhavaṃti gireriva //
kaphamūtrapurīṣādyaissa dehaśśudhyate katham

sarvāśucinidhānasya śarīrasya na vidyate //
śucirekaḥ pradeśo'pi viṇmūtrasya dṛteriva

sṛṣṭvātmadehasrotāṃsi mṛttoyaiḥ śodhyate karaḥ //
tathāpyaśucibhāṃḍasya na vibhraśyati kiṃ karaḥ

kāyassugaṃdhadhūpādyairya nnenāpi susaṃskṛtaḥ //
na jahāti svabhāvaṃ sa śvapucchamiva nāmitam

yathā jātyaiva kṛṣṇorthaḥ śuklassyānna hyupāyataḥ//
saṃśoddhyamānāpi tathā bhavenmūrtirna nirmalā

jighrannapi svadurgaṃdhaṃ paśyannapi svakaṃ malam //
na virajyeta loko'yaṃ pīḍayannapi nāsikām

aho mohasya māhātmyaṃ yenedaṃ chāditaṃ jagat //
śīghraṃ paśyansvakaṃ doṣaṃ kāyasya na virajyate

svadehasya vigaṃdhena na virajyeta yo naraḥ //
virāgakāraṇaṃ tasya kimetadupadiśyate

sarvasyaiva jaganmadhye deha evāśucirbhavet //
tanmalāvayavasparśācchucirapyaśucirbhavet

gaṃdhalepāpanodārtha śaucaṃ dehasya kīrtitam //
dvayasyāpagamācchuddhiśśuddhasparśādviśudhyati

gaṃgātoyena sarveṇa mṛdbhāraiḥ parvatopamaiḥ //
āmṛtyorācarecchaucaṃ bhāvaduṣṭo na śudhyati

tīrthasnānaistapobhirvā duṣṭātmā naiva śudhyati //
śvadṛtiḥ kṣālitā tīrthe kiṃ śuddhimadhigacchati

aṃtarbhāvapraduṣṭasya viśato'pi hutāśanam //
na svargo nāpavargaśca dehanirdahanaṃ param

sarveṇa gāṃgena jalena samyaṅ mṛtparvatenāpyatha bhāvaduṣṭaḥ //
ājanmanaḥ snānaparo manuṣyo na śudhyatītyeva vayaṃ vadāmaḥ

prajvālya vahniṃ ghṛtatailasiktaṃ pradakṣiṇāvartaśikhaṃ mahāṃtam //
praviśya dagdhastvapi bhāvaduṣṭo na dharmamāpnoti phalaṃ na cānyata

gaṃgāditīrtheṣu vasaṃti matsyā devālaye pakṣigaṇāśca nityam //
bhāvojjhitāste na phalaṃ labhaṃte tīrthāvagāhācca tathaiva dānāt

bhāvaśuddhiḥ paraṃ śaucaṃ pramāṇe sarvakarmasu //
anyathā''liṃgyate kāṃtā bhāvena duhitānyathā

manaso bhidyate vṛttirabhinneṣvapi vastuṣu //
anyathaiva sutaṃ nārī cintayatyanyathā patim

paśyadhvamasya bhāvasya mahābhāgyamaśeṣataḥ //
pariṣvaktopi yannāryyā bhāvahīnaṃ na kāmayet

nādyādvividhamannādyaṃ bhakṣyāṇi surabhīṇi ca //
yadi ciṃtāṃ samādhatte citte kāmādiṣu triṣu

gṛhyate tena bhāvena naro bhāvādvimucyate //
bhāvataśśuci śuddhātmā svargaṃ mokṣaṃ ca viṃdati

bhāvenaikātmaśuddhātmā dahañjuhvanstuvanmṛtaḥ //
jñānāvāpteravāpyāśu lokānsubahuyājinām

jñānāmalāṃbhasā puṃsāṃ sadvairāgyamṛdā punaḥ //
avidyārāgaviṇmūtralepagaṃdhaviśodhanam

evametaccharīraṃ hi nisargādaśuci smṛtam //
tvaṅmātrasāraṃ niḥsāraṃ kadalīsārasannibham

jñātvaivaṃ doṣavaddehaṃ yaḥ prājñaśśithilo bhavet //
deha bhogodbhavādbhāvācchamacittaḥ prasannadhīḥ

so'tikrāmati saṃsāraṃ jīvanmuktaḥ prajāyate //
saṃsāraṃ kadalīsāradṛḍhagrāhyavatiṣṭhate //

evametanmahākaṣṭaṃ janma duḥkhaṃ prakīrtitam //
puṃsāmajñānadoṣeṇa nānākārmavaśena ca

ślokārdhena tu vakṣyāmi yaduktaṃ granthakoṭibhiḥ //
mameti paramaṃ duḥkhaṃ na mameti paraṃ sukham

bahavopīha rājānaḥ paraṃ loka mito gatāḥ //
nirmamatvasametāstu baddhāśśatasahasraśaḥ

garbhasthasya smṛtiryāsītsā ca tasya praṇaśyati //
saṃmūrchitena duḥkhena yoniyantranipīḍanāt

bāhyena vāyunā vāsya mohasaṅgena dehinaḥ //
spṛṣṭamātreṇa ghoreṇa jvarassamupajāyate

tena jvāreṇa mahatā sammohaśca prajāyate //
sammūḍhasya smṛtibhraṃśaśśīghraṃ saṃjāyate punaḥ

smṛtibhraṃśāttatastasya smṛtirnno'pūrvakarmaṇaḥ//
ratiḥ saṃjāyate tūrṇaṃ jantostatraiva janmani

rakto mūḍhaśca loko'yaṃ na kāryye sampravartate //
na cātmānaṃ vijānāti na paraṃ na ca daivatam

na śṛṇoti paraṃ śreyassati karṇe'pi sanmune //
na paśyati paraṃ śreyassati cakṣuṣi tatkṣame

same pathi śanairgacchan skhalatīva padepade //
satyāṃ buddhau na jānāti bodhyamāno budhairapi

saṃsāre kliśyate tena garbhalobhavaśānugaḥ //
garbhasmṛtena pāpena samujjhitamatiḥ pumān

itthaṃ mahatparaṃ divyaṃ śāstramuktaṃ śivena tu //
tapasaḥ kathanārthāya svargamokṣaprasādhanam

ye satyasmicchive jñāne sarvakāmārtha sādhane //
na kurvantyātmanaḥ śreyastadatra mahadadbhutam

avyaktendriyavṛttitvādbālye duḥkhaṃ mahatpunaḥ //
icchannapi na śaknoti vaktuṃ karttuṃ pratikriyām

daṃtotthāne mahadduḥkhamalpena vyādhinā tathā ///
bālarogaiśca vividhai pīḍā bālagrahairapi

kvacitkṣuttṛṭparītāṃgaḥ kvacittiṣṭhati saṃraṭan //
viṇmūtrabhakṣaṇādyaṃ ca mohādbālassamācaret

kaumāre karṇapīḍāyāṃ mātāpitrośca sādhanaḥ //
akṣarādhyayanādyaiśca nānāduḥkhaṃ pravartate

bālye duḥkhamatītyaiva paśyannapi vimūḍhadhīḥ//
na kurvītātmanaḥ śreyastadatra mahadadbhutam

pravṛttendriyavṛttitvātkāmarogaprapīḍanāt//
tadaprāpte tu satataṃ kutassaukhyaṃ tu yauvane

īrṣyayā ca mahadduḥkhaṃ mohādraktasya tasya ca //
netrasya kupitasyeva tyāgī duḥkhāya kevalam

na rātrau viṃdate nidrāṃ kāmāgnipariveditaḥ //
divāpi ca kutassaukhyamarthopārjanaciṃtayā

strīṣvadhyāsitacittasya ye puṃsaḥ śukrabindavaḥ //
te sukhāya na manyante svedajā iva te tathā

kṛmibhistudyamānasya kuṣṭhino vānarasya ca //
kaṃḍūyanābhitāpena yadbhavetstriṣu tadvidaḥ

yādṛśaṃ manyate saukhyaṃ gaṃḍe pūtivinirgamāt //
tādṛśaṃ strīṣu mantavyaṃ nādhikaṃ tāsu vidyate

viṇmūtrasya samutsargātsukhaṃ bhavati yādṛśam//
tādṛśaṃ strīṣu vijñeyaṃ mūḍhaiḥ kalpitamanyathā

nārīṣvavastubhūtāsu sarvadoṣāśrayāsu vā/
nāṇumātraṃ sukhaṃ tāsu kathitaṃ paṃcacūḍayā

sammānanāvamānābhyāṃ viyogeneṣṭasaṃgamāt //
yauvanaṃ jarayā grastaṃ kva saukhyamanupadravam

valīpalitakhālityaiśśithilikṛtavigraham//
sarvakriyāsvaśaktiṃ ca jarayā jarjarīkṛtam

strīpuṃsayauvanaṃ hṛdyamanyo'nyasya priyaṃ purā//
tadeva jarayāgrastamanayorapi na priyam

apūrvavatsvamātmānaṃ jarayā parivartitam//
yaḥ paśyannapi rajyeta ko'nyastasmādacetanaḥ

jarābhibhūtaḥ puruṣaḥ putrīputrādibāṃdhavaiḥ//
āsaktatvāddurādharṣairbhṛtyaiśca paribhūyate

dharmamarthaṃ ca kāmaṃ vā mokṣaṃ vātijarāturaḥ//
aśaktassādhituṃ tasmādyuvā dharmaṃ samācaret

iti śrīśivamahāpurāṇe pañcamyāmumāsaṃhitāyāṃ saṃsāracikitsāyāṃ dehā śucitvabālyādyavasthāduḥkhavarṇanaṃ nāma trayoviṃśo'dhyāyaḥ