Shiva Purana · Chapter 5.22

vyāsa uvāca //
vidhiṃ tāta vadedānīṃ jīva janmavidhānataḥ //
garbhe sthitiṃ ca tasyāpi vairāgyārthaṃ munīśvara

sanatkumāra uvāca//
śṛṇu vyāsa samāsena śāstrasāramaśeṣataḥ //
vadiṣyāmi suvairāgyaṃ mumukṣorbhavabaṃdhakṛt

pākapātrasya madhye tu pṛthagannaṃ pṛthagjalam//
agnerūrdhvaṃ jalaṃ sthāpyaṃ tadannaṃ ca jalopari

jalasyādhassa cāgnirhi sthito'gniṃ dhamate śanaiḥ //
vāyunādhamyamāno'gniratyuṣṇaṃ kurute jalam

tadannamuṣṇatoyena samantātpacyate punaḥ//
dvidhā bhavati tatpakvaṃ pṛthakkiṭṭaṃ pṛthagrasaḥ

malairdvādaśabhiḥ kiṭṭaṃ bhinnaṃ dehādbahirbhavet//
rasastu dehe sarati sa puṣṭastena jāyate

karṇākṣināsikā jihvā dantāḥ śiśno gudaṃ nakhāḥ //
malāśrayaḥ kaphaḥ svedo viṇmūtraṃ dvādaśa smṛtāḥ

hṛtpadme pratibaddhāśca sarvanāḍyassamaṃtataḥ //
jñeyā rasapravāhinyastatprakāraṃ bruve mune

tāsāṃ mukheṣu taṃ sūkṣmaṃ prāṇassthāpayet rasam //
rasena tena nāḍīstāḥ prāṇaṃ pūrayate punaḥ

punaḥ prayāṃti saṃpūrṇāstāśca dehaṃ samaṃtataḥ //
tatassa nāḍīmadhyasthaśśarīreṇātmanā rasaḥ

pacyate pacyamānācca bhavetpākadvayaṃ punaḥ //
tvak tayā veṣṭyate pūrvaṃ rudhiraṃ ca prajāyate

raktāllomāni māṃsaṃ ca keśāḥ snāyuśca māṃsataḥ//
snāyutaśca tathāsthīni nakhā majjāsthisaṃbhavāḥ

majjākāraṇavaikalyaṃ śukraṃ hi prasavātmakam//
iti dvādaśadhānnasya pariṇāmaḥ prakīrtitāḥ

śukro'nnājjāyate śukrāddivyadehasya saṃbhavaḥ//
ṛtukāle yadā śukraṃ nirdoṣaṃ yonisaṃsthitam

tadvā tadvāyusaṃspṛṣṭaṃ strīraktenaikatāṃ vrajet //
visargakāle śukrasya jīvaḥ kāraṇasaṃyutaḥ

saṃvṛtaḥ praviśedyoniṃ karmabhissvairniyojitaḥ //
tacchukraraktamekasthamekāhātkalilaṃ bhavet //३१/
paṃcarātreṇa kalilaṃ budbudākāratāṃ vrajet //
budbudassaptarātreṇa māṃsapeśī bhavetpunaḥ

grīvā śiraśca skaṃdhau ca pṛṣṭhavaṃśastathodaram//
pāṇipādantathā pārśve kaṭirgātraṃ tathaiva ca

dvimāsābhyantareṇaiva kramaśassaṃbhavediha//
tribhirmāsaiḥ prajāyaṃte sarve hyaṃkurasaṃdhayaḥ

māsaiścaturbhiraṃgulyaḥ prajāyaṃte yathākramam//
mukhaṃ nāsā ca karṇau māsaiḥ paṃcabhireva ca

dantapaṃktistathā guhyaṃ jāyaṃte ca nakhāḥ punaḥ//
karṇayostu bhavecchidraṃ ṣaṇmāsābhyaṃtareṇa tu

pāyurmehamupasthaṃ ca nābhiścābhyupajāyate//
saṃdhayo ye ca gātreṣu māsairjāyaṃti saptabhiḥ

aṃgapratyaṃgasaṃpūrṇaḥ paripakvassa tiṣṭhati //
udare māturācchanno jarāyau muni sattama

māturāhāracauryyeṇa ṣaḍvidhena rasena tu //
nābhinālanibaddhena varddhate sa dinedine

tatasmṛtiṃ labhejjīvassaṃpūrṇe'smiñśarīrake //
sukhaṃ duḥkhaṃ vijānāti nidrāsvapnaṃ purākṛtam

mṛtaścāhaṃ punarjāto jātaścāhaṃ punarmṛtaḥ //
nānāyonisahasrāṇi mayā dṛṣṭāni jāyatā

adhunā jātamātro'haṃ prāptasaṃskāra eva ca //
śreyo'munā kariṣyāmi yena garbhe na saṃbhavaḥ

garbhasthaściṃtayatyevamahaṃ garbhādvinissṛtaḥ //
anveṣyāmi śivajñānaṃ saṃsāravinivartakam

evaṃ sa garbhaduḥkhena mahatā paripīḍitaḥ //
jīvaḥ karmavaśādāste mokṣopāyaṃ viciṃtayan

yathā girivarākrāṃtaḥ kaścidduḥkhena tiṣṭhati //
tathā jarāyuṇā dehī duḥkhaṃ tiṣṭhati veṣṭitaḥ

patitassāgare yadvadduḥkhamāste samākulaḥ //
garbhodakena siktāṃgassarvadākulitastadā

lohakuṃbhe yathā nyastaḥ pacyate kaścidagninā //
garbhakuṃbhe tathā kṣiptaḥ pacyate jaṭharāgninā

sūcībhiragnivarṇābhinirbhinnasya niraṃtaram //
yadduḥkhaṃ jāyate tasya tatra saṃsthasya cādhikam

garbhāvāsātparaṃ duḥkhaṃ kaṣṭaṃ naivāsti kutracit //
dehināṃ duḥkhabahulaṃ sughoramatisaṃkaṭam

ityetatsumahadduḥkhaṃ pāpināṃ parikīrtitam //
kevalaṃ dharmabudīnāṃ saptamāsairbhavassadā

garbhātsudurlabhaṃ duḥkhaṃ yoniyaṃtranipīḍanāt //
bhavetpāpātmanāṃ vyāsa na hi dharmayutātmanām /

ikṣuvatpīḍyamānasya yaṃtreṇaiva samaṃtataḥ //
śirasā tāḍyamānasya pāpa mudgarakeṇa ca

yaṃtreṇa pīḍitā yadvannissārā ssyustilāḥ kṣaṇāt //
tathā śarīraṃ nissāraṃ yoniyaṃtranipīḍanāt

asthipādatulāstaṃbhaṃ snāyubandhena yaṃtritam//
raktamāṃsamṛdāliptaṃ viṇmūtradravyabhājanam

keśaromanakhacchannaṃ rogāyatanamāturam //
vadanaikamahādvāraṃ gavākṣāṣṭakabhūṣitam

oṣṭhadvayakapāṭaṃ ca tathā jihvārgalānvitam//
bhogatṛṣṇāturaṃ mūḍhaṃ rāgadveṣavaśānugam

saṃvartitāṃgapratyaṃgaṃ jarāyupariveṣṭitam//
saṃkaṭenāviviktena yonimārgeṇa nirgatam

viṇmūtraraktasiktāṃgaṃ vikośikasamudbhavam//
asthipañjaravikhyātamasmiñjñeyaṃ kalevaram

śatatrayaṃ ṣaṣṭyadhikaṃ paṃcapeśīśatāni ca//
sārddhābhistisṛbhiśchannaṃ samaṃtādromakoṭibhiḥ

śarīraṃ sthūlasūkṣmābhirdṛśyā'dṛśyā hi tāssmṛtāḥ //
etāvatībhirnāḍībhiḥ koṭibhistatsamaṃtataḥ

asvedamadhubhiryābhiraṃtasthaḥ sravate bahiḥ//
dvātriṃśaddaśanāḥ proktā viṃśatiśca nakhāḥ smṛtāḥ

pittasya kuḍavaṃ jñeyaṃ kaphasyāthāḍhakaṃ smṛtam //
vasāyāśca palaṃ viṃśattadardhaṃ kapilasya ca

paṃcārddhaṃ tu tulā jñeyā palāni daśa medasaḥ //
palatrayaṃ mahāraktaṃ majjāyāśca caturguṇam

śukrorddhaṃ kuḍavaṃ jñeyaṃ tadbījaṃ dehināṃ balam //
māṃsasya caikapiṃḍena palasāhasramucyate

raktaṃ palaśataṃ jñeyaṃ viṇmūtraṃ yatpramāṇata//
aṃjalayaśca catvāraścatvāro munisattama

iti dehagṛhaṃ hyetannityasyānityamātmanaḥ //
aviśuddhaṃ viśuddhasya karmabaṃdhādvinirmitam

iti śrīśivamahāpurāṇe pañcamyāmumāsaṃhitāyāṃ dehotpattivarṇanaṃ nāma dvāviṃśo'dhyāyaḥ