Shiva Purana · Chapter 5.21

// vyāsa uvāca //
brāhmaṇatvaṃ hi duṣprāpyaṃ nisargādbrāhmaṇo bhavet //
īśvarasya mukhātkṣatraṃ bāhubhyāmūruto viśaḥ

padbhyāṃ śūdrassamutpanna iti tasya mukhācchrutiḥ //
kimu sthitimadhaḥsthānādāpnuvanti hyato vada

sanatkumāra uvāca //
duṣkṛtena tu kāleya sthānādbhraśyanti mānavāḥ //
śreṣṭhaṃ sthānaṃ samāsādya tasmādrakṣeta paṇḍitaḥ

yastu vipratvamutsṛjya kṣatrayonyāṃ prasūyate //
brāhmaṇyātsa paribhraṣṭaḥ kṣatriyatvaṃ niṣevate

adharmasevanānmūḍhastathaiva parivartate //
janmāntarasahasrāṇi tamasyāviśate yataḥ

tasmātprāpya paraṃ sthānaṃ pramādyanna tu nāśayet //
svasthānaṃ sarvadā rakṣetprāpyāpi vipado naraḥ

brāhmaṇatvaṃ śubhaṃ prāpya brāhmaṇyaṃ yo'vamanyate //
bhojyābhojyaṃ na jānāti sa pumānkṣatriyo bhavet

karmaṇā yena medhāvī śūdro vaiśyo hi jāyate //
tatte vakṣyāmi nikhilaṃ yena varṇottamo bhavet

śūdrakarma yathoddiṣṭaṃ śūdro bhūtvā samācaret //
yathāvatparicaryyāṃ tu triṣu varṇeṣu nityadā

kurute kāmayānastu śūdro'pi vaiśyatāṃ vrajet //
yo yojayeddhanairvaiśyo juhvānaśca yathāvidhi

agnihotramupādāya śeṣānna kṛtabhojanaḥ //
sa vaiśyaḥ kṣatriyakule jāyate nātra saṃśayaḥ

/
kṣattriyo jāyate yajñaisaṃskṛtairāttadakṣiṇaiḥ //
adhīte svargamanvicchaṃstretāgniśaraṇaṃ sadā

ārdrahastapado nityaṃ kṣitiṃ dharmeṇa pālayet //
ṛtukālābhigāmī ca svabhāryyādharmatatparaḥ

sarvātithyaṃ trivargasya bhūtebhyo dīyatāmiti //
gobrāhmaṇātmano'rthaṃ hi saṃgrāmābhihato bhavet

tenāgnimantrapūtātmā kṣattriyo brāhmaṇo bhavet //
vidhito brāhmaṇo bhūtvā yājakastu prajāyate // १५ /
svakarmanirato nityaṃ satyavādī jitendriyaḥ//
prāpyate vipulassvargo devānāmapi vallabhaḥ

brahmaṇatvaṃ hi duṣprāpyaṃ kṛcchreṇa sādhyate naraiḥ //
brāhmaṇyātsakalaṃ prāpya mokṣaścāpi munīśvara

tasmātsarvaprayatnena brāhmaṇo dharmatatparaḥ //
sādhanaṃ sarvavargasya rakṣedbrāhmaṇyamuttamam

vyāsa uvāca //
saṃgrāmasyeha māhātmyaṃ tvayoktaṃ munisattama //
etadicchāmyahaṃ śrotuṃ brūhi tvaṃ vadatāṃ vara

sanatkumāra uvāca //
agniṣṭomādibhiryajñairiṣṭvā vipuladakṣiṇaiḥ //
na tatphalamavāpnoti saṃgrāme yadavāpnuyāt

iti tattvavidaḥ prāhuryajñakarmavidassadā //
tasmāttatte pravakṣyāmi yatphalaṃ śastrajīvinām

dharmalābho'rthalābhaśca yaśolābhastathaiva ca //
yaśśūro vāṃchate yuddhaṃ vimṛndanparavāhinīm

tasya dharmārtha kāmāśca yajñaścaiva sadakṣiṇaḥ //
paraṃ hyabhimukhaṃ dattvā tadyānaṃ yo'dhirohati

viṣṇuloke sa jāyeta yaśca yuddhe'parājitaḥ //
aśvamedhānavāpnoti caturo na mṛtassa cet

yastu śastramanutsṛjya mriyate vāhinī mukhe //
sammukho vartate śūrassa svargānna nivartate

rājā vā rājaputro vā senāpatirathāpi vā //
hatakṣātreṇa yaḥ śūrastasya loko'kṣayo bhavet

yāvaṃti tasya romāṇi bhidyante'strairmahāhave //
tāvato labhate lokānsarvakāmadughā'kṣayān

vīrāsanaṃ vīraśayyā vīrasthānasthitissthirā //
sarvadā bhavati vyāsa iha loke paratra ca

/
gavārthe brāhmaṇārthe ca sthānasvāmyarthameva ca //
ye mṛtāste sukhaṃ yāṃti yathā sukṛtinastathā

yaḥ kaścidbrāhmaṇaṃ hatvā paścātprāṇānparityajet //
tatrāsau svapateryuddhe sa svargānna nivartate

kravyādairdatibhiścaiva hatasya gatiruttamā //
dvijagosvāmināmarthe bhavedvipuladākṣayā

śaknotviha samarthaśca yaṣṭuṃ kratuśatairapi//
ātmadehaparityāgaḥ kartuṃ yudhi suduṣkaraḥ .

yuddhaṃ puṇyatamaṃ svargyaṃ rūpajñaṃ sarvatomukham //
sarveṣāmeva varṇānāṃ kṣatriyasya viśeṣataḥ

bhṛśaṃ caiva pravakṣyāmi yuddhadharmaṃ sanātanam //
yādṛśāya prahartavyaṃ yādṛśaṃ parivarjayet

ātatāyinamāyāṃtamapi vedāṃtagaṃ dvijam//
jighāṃsaṃtaṃ jighāṃsettu na tena brahmahā bhavet

haṃtavyo'pi na haṃtavyaḥ pānīyaṃ yaśca yācate//
raṇe hatvāturānvyāsa sa naro brahmahā bhavet

vyādhitaṃ durbalaṃ bālaṃ stryanāthau kṛpaṇaṃ dhruvam//
dhanurbhagnaṃ chinnaguṇaṃ hatvā vai brahmahā bhavet

evaṃ vicāryya saddhīmānbhavetprītyāḥ raṇapriyaḥ//
sajanmanaḥ phalaṃ prāpya paratreha pramodate

iti śrīśivamahāpurāṇe pañcamyāmumāsaṃhitāyāṃ raṇaphalavarṇanaṃ nāmaikaviṃśo'dhyāyaḥ