Shiva Purana · Chapter 5.16

sanatkumāra uvāca//
teṣāṃ mūrddhopariṣṭādvai narakāṃstāñchṛṇuṣva ca//
matto munivaraśreṣṭha pacyaṃte yatra pāpinaḥ

rauravaśśūkaro rodhastālo vivasanastathā //
mahājvālastaptakuṃbho lavaṇopi vilohitaḥ

vaitaraṇī pūyavahā kṛmiṇaḥ kṛmibhojanaḥ //
asipatravanaṃ ghoraṃ lālābhakṣaśca dāruṇaḥ

tathā pūyavahaḥ prāyo bahirjvālo hyadhaśśirāḥ //
saṃdaṃśaḥ kālasūtraśca tamaścāvīciro dhanaḥ

śvabhojano'tha ruṣṭaśca mahārauravaśālmalī //
ityādyā bahavastatra narakā duḥkhadāyakāḥ

pacyaṃte teṣu puruṣāḥ pāpakarmaratāstu ye //
kramādvakṣye tu tān vyāsa sāvadhānatayā śṛṇu

kūṭasākṣyaṃ tu yo vakti vinā viprān surāṃśca gāḥ //
sadā'nṛtaṃ vadedyastu sa naro yāti rauravam

bhrūṇahā svarṇahartā ca gorodhī viśvaghātakaḥ //
surāpo brahmahaṃtā ca paradravyāpahārakaḥ

yastatsaṃgī sa vai yāti mṛto vyāsa gurorvadhāt //
tataḥ kuṃbhe svasurmāturgoścaiva duhitustathā

sādhvyā vikrayakṛccātha vārddhakī keśavikrayī //
taptaloheṣu pacyaṃte yaśca bhaktaṃ parityajet

avamaṃtā gurūṇāṃ yaḥ paścādbhoktā narādhamaḥ //
devadūṣayitā caiva devavikrayikaśca yaḥ

agamyagāmī yaścāṃte yāti saptabalaṃ dvija //
cauro goghno hi patito maryādādūṣakastathā

/
devadvijapitṛdveṣṭā ratnadūṣayitā ca yaḥ //
sa yāti kṛmibhakṣaṃ vai kṛmīnatti duriṣṭakṛt

pitṛdevasurān yastu paryaśnāti narādhamaḥ//
lālābhakṣaṃ sa yātyajño yaśśastrakūṭakṛnnaraḥ

yaścāṃtyajena saṃsevyo hyasadgrāhī tu yo dvijaḥ //
ayājyayājakaścaiva tathaivābhakṣya bhakṣakaḥ

rudhiraughe pataṃtyete somavikrayiṇaśca ye//
madhuhā grāmahā yāti krūrāṃ vaitaraṇīṃ nadīm

navayauvanamattāśca maryādābhedinaśca ye //
te kṛtyaṃ yāṃtyaśaucāśca kulakājīvinaśca ye

asipatravanaṃ yāti vṛkṣacchedī vṛthaiva yaḥ//
kṣurabhrakā mṛgavyādhā vahnijvāle pataṃti te

bhraṣṭācāro hi yo vipraḥ kṣatriyo vaiśya eva ca //
yātyaṃte dvija tatraiva yaḥ śvapākeṣu vahnidaḥ

vratasya lopakā ye ca svāśramādvicyutāśca ye//
saṃdaṃśayātanāmadhye pataṃti bhṛśadāruṇe

vīryaṃ svapneṣu skaṃdeyurye narā brahmacāriṇaḥ//
putrā nādhyāpitā yaiśca te pataṃti śvabhojane

ete cānye ca narakāḥ śataśo'tha sahasraśaḥ //
yeṣu duṣkṛtakarmāṇaḥ pacyate yātanāgatāḥ

tathaiva pāpānyetāni tathānyāni sahasraśaḥ //
bhujyaṃte yāni puruṣairnarakāṃtaragocaraiḥ

varṇāśramaviruddhaṃ ca karma kurvaṃti ye narāḥ//
karmaṇā manasā vācā niraye tu pataṃti te

adhaśśirobhirdṛśyaṃte nārakā divi daivataiḥ//
devānadhomukhānsarvānadhaḥ paśyaṃti nārakāḥ

sthāvarāḥ kṛmipākāśca pakṣiṇaḥ paśavo mṛgāḥ //
dhārmikāstridaśāstadvanmokṣiṇaśca yathākramam

yāvaṃto jaṃtavassvarge tāvaṃto narakaukasaḥ //
pāpakṛdyāti narakaṃ prāyaścittaparāṅmukhaḥ

gurūṇi gurubhiścaiva laghūni laghubhistathā //
prāyaścittāni kāleya manussvāyambhuvo'bravīt

yāni teṣāmaśeṣāṇāṃ karmārṇyuktāni teṣu vai//
prāyaścittamaśeṣeṇa harānusmaraṇaṃ param

prāyaścittaṃ tu yasyaiva pāpaṃ puṃsaḥ prajāyate//
kṛte pāpe'nutāpo'pi śivasaṃsmaraṇaṃ param

māheśvaramavāpnoti madhyāhnādiṣu saṃsmaran//
prātarniśi ca saṃdhyāyāṃ kṣīṇapāpo bhavennaraḥ

muktiṃ prayāti svargaṃ vā samastakleśasaṃkṣayama//
śivasya smaraṇādeva tasya śaṃbhorumāpateḥ

pāpantarāyo viprendra japahomārcanādi ca //
bhavatyeva na kutrāpi trailokye munisattama

maheśvare matiryasya japahomārcanādipu //
yatpuṇyaṃ tatkṛtaṃ tena devendratvādikaṃ phalam

pumānna narakaṃ yāti yaḥ smaranbhaktito mune //
aharniśaṃ śivaṃ tasmātsa kṣīṇāśeṣapātakaḥ

narakasvargasaṃjñāye pāpapuṇye dvijottama //
yayostvekaṃ tu duḥkhāyānyatsukhāyodbhavāya ca

tadeva prītaye bhūtvā punarduḥkhāya jāyate //
tatsyādduḥkhātmakaṃ nāsti na ca kiṃcitsukhātmakam

manasaḥ pariṇāmo'yaṃ sukhaduḥkhopalakṣaṇaḥ //
jñānameva paraṃ brahma jñānaṃ tattvāya kalpate

jñānātmakamidaṃ viśvaṃ sakalaṃ sacarācaram //
paravijñānataḥ kiṃcidvidyate na paraṃ mune

evametanmayākhyātaṃ sarvaṃ narakamaṇḍalam //
ata ūrdhvaṃ pravakṣyāmi sāṃprataṃ maṃḍalaṃ bhuvaḥ

iti śrīśivamahāpurāṇe pañcamyāmumāsaṃhitāyāṃ brahmāṇḍavarṇane narakoddhāravarṇanaṃ nāma ṣoḍaśo'dhyāyaḥ