Shiva Purana · Chapter 4.9

ṛṣaya ūcuḥ //
sūtasūta mahābhāga dhanyastvaṃ śaivasattamaḥ //
cāṇḍālī kā samākhyātā tatkathāṃ kathaya prabho

sūta uvāca //
dvijāḥ śṛṇuta sadbhaktyā tāṃ kathāṃ paramādbhutām//
śivaprabhāvasaṃmiśrāṃ śṛṇvatāṃ bhaktivarddhinīm

cāṃḍālī sā pūrvabhare'bhavadbrāhmaṇakanyakā //
sauminī nāma candrāsyā sarvalakṣaṇasaṃyutā

atha sā samaye kanyā yuvatiḥ sauminī dvijāḥ //
pitrā dattā ca kasmaicidvidhinā dvijasūnave

sā bhartāramanuprāpya kiṃcitkālaṃ śubhavratā //
reme tena dvijaśreṣṭhā navayauvanaśālinī

atha tasyāḥ patirviprastaruṇassurujārditaḥ //
sauminyāḥ kālayogāttu pañcatvamagamaddvijāḥ

mṛte bhartari sā nārī dukhitātiviṣaṇṇadhīḥ//
kiṃcitkālaṃ śubhācārā suśīlovāsa sadmani

tatassā manmathāviṣṭahṛdayā vidhavāpi ca//
yuvāvasthāviśeṣeṇa babhūva vyabhicāriṇī

tajjñātvā gotriṇastasyā duṣkarma kuladūṣaṇam //
sametāstatyaju dūraṃ nītvā tāṃ sakacagrahām/९//
kaścicchūdravarastāṃ vai vicarantīṃ nijecchayā//
dṛṣṭvā vane striyaṃ cakre nināya svagṛhaṃ tata

atha sā piśitāhārā nityamāpītavāruṇī //
ajījanatsutāntena śūdreṇa suratapriyā

kadācidbhartari kvāpi yāte pītasurātha sā //
iyeṣa piśitāhāraṃ sauminī vyabhicāriṇī

tato meṣeṣu baddheṣu gobhissaha bahirvraje //
niśāmukhe tamo'ndhe hi khaḍgamādāya sā yayau

avimṛśya madāveśānmeṣabudyā''miṣa priyā //
ekaṃ jaghāna govatsaṃ krośaṃtamatidurbhagā

hataṃ taṃ gṛhamānīya jñātvā govatsamaṃganā //
bhītā śivaśivetyāha kenacitpuṇyakarmaṇā

sā muhūrtaṃ śivaṃ dhyātvāmiṣabhojanalālasā //
chittvā tameva govatsaṃ cakārāhāramīpsitam

evaṃ bahutithe kāle gate sā sauminī dvijāḥ //
kālasya vaśamāpannā jagāma yamasaṃkṣayam

yamo'pi dharmamālokya tasyāḥ karma ca paurvikam //
nivartya nirayāvāsāccakre cāṇḍālajātikām

sātha bhraṣṭā yamapurāccāṇḍālīgarbhamāśritā //
tato babhūva janmāndhā praśāṃtāṃgāramecakā

janmāndhā sātha bālye'pi vidhvastapitṛmātṛkā //
ūḍhā na kenacidduṣṭā mahākuṣṭharujārditā

tataḥ kṣudhārditā dīnā yaṣṭipāṇirgatekṣaṇā //
cāṇḍālocchiṣṭapiṃḍena jaṭharāgnimataparyat

evaṃ kṛcchreṇa mahatā nītvā svavipulaṃ vayaḥ //
jarayāgrastasavārṅgī duḥkhamāpa duratyayam

kadācitsātha cāṃḍālī gokarṇaṃ taṃ mahājanān //
āyāsyaṃtyāṃ śivatithau gacchato bubudhe'nvagān

athāsāvapi cāṃḍālī vasanāsanatṛṣṇayā //
mahājanān yācayituṃ saṃcacāra śanaiḥ śanaiḥ

gatvā tatrātha cāṃḍālī prārthayantī mahājanān//
yatra tatra cacārāsau dīnavākprasṛtāñjaliḥ

evamabhyarthayaṃtyāstu cāṃḍālyāḥ prasṛtāñjalau //
ekaḥ puṇyatamaḥ pānthaḥ prākṣipadbilvamaṃjarīm

tāmaṃjalau nipatitā sā vimṛśya punaḥ punaḥ //
abhakṣyamiti matvātha dūre prākṣipadāturā

tasyāḥ karādvinirmuktā rātrau sā bilvamaṃjarī //
papāta kasyaciddiṣṭyā śivaliṃgasya mastake

saivaṃ śivacaturdaśyāṃ rātrau pānthajanānmuhuḥ //
yācamānāpi yatkiṃcinna lebhe daivayogataḥ

evaṃ śivacaturdaśyā vrataṃ jātaṃ ca nirmalam //
ajñānato jāgaraṇaṃ paramānandadāyakam

tataḥ prabhāte sā nārī śokena mahatā vṛtā //
śanairnivavṛte dīnā svadeśāyaiva kevalam

śrāṃtā ciropavāsena nipataṃtī padepade //
atītya tāvatīṃ bhūmiṃ nipapāta vicetanā

atha sā śaṃbhukṛpayā jagāma paramaṃ padam //
āruhya suvimānaṃ ca nītaṃ śivagaṇairdrutam

ādau yadeṣā śivanāma nārī pramādato vāpyasatī jagāda //
teneha bhūyaḥ sukṛtena viprā mahābalasthānamavāpa divyam

śrīgokarṇe śivatithāvupoṣya śivamastake //
kṛtvā jāgaraṇaṃ sā hi cakre bilvārcanaṃ niśi

akāmataḥ kṛtasyāsya puṇyasyaiva ca tatphalam //
bhunaktyadyāpi sā caiva mahābalaprasādataḥ

evaṃvidhaṃ mahāliṃgaṃ śaṃkarasya mahābalam //
sarvapāpaharaṃ sadyaḥ paramānandadāyakam

evaṃ vaḥ kathitaṃ viprā māhātmyaṃ paramaṃ mayā //
mahābalābhidhānasya śivaliṃgavarasya hi

athānyadapi vakṣyāmi māhātmyaṃ tasya cādbhutam //
śrutamātreṇa yenāśu śive bhaktiḥ prajāyate

iti śrīśivamahāpurāṇe caturthyāṃ koṭirudrasaṃhitāyāṃ cāṇḍālīsadgativarṇanaṃ nāma navamo'dhyāyaḥ