Shiva Purana · Chapter 4.8

sūta uvāca//
dvijāḥ śṛṇuta sadbhaktyā śivaliṃgāni tāni ca //
paścimāyāṃ diśāyāṃ vai yāni khyātāni bhūtale

kapilāyāṃ nagaryāṃ tu kālarāmeśvarābhidhe //
śivaliṃge mahādivye darśanātpāpahārake

paścime sāgare caiva mahāsiddheśvaraḥ smṛtaḥ //
dharmārthakāmadaścaiva tathā mokṣaprado'pi hi

paścimāmbudhitīrasthaṃ gokarṇaṃ kṣetramuttamam //
brahmahatyādipāpaghnaṃ sarvakāmaphalapradam

gokarṇe śivaliṃgāni vidyante koṭikoṭiśaḥ //
asaṃkhyātāni tīrthāni tiṣṭhanti ca padepade

bahunātra kimuktena gokarṇasthāni sarvaśaḥ //
śivapratyakṣaliṃgāni tīrthānyambhāṃsi sarvaśaḥ

gokarṇe śivaliṃgānāṃ tīrthānāmapi sarvaśaḥ //
varṇyate mahimā tāta purāṇeṣu maharṣibhiḥ

kṛteyuge sa hi śvetastretāyāṃ sotilohitaḥ //
dvāpare pītavarṇaśca kalau śyāmo bhaviṣyati

ākrāntasaptapātālakuharopi mahābalaḥ //
prāpte kaliyuge ghore mṛdutāmupayāsyati

mahāpātakinaścātra samabhyarcya mahābalam //
śivaliṃgaṃ ca gokarṇe prayātāśśāṃkarampadam

gokarṇe tatra munayo gatvā puṇyarkṣavāsare //
ye'rcayanti ca taṃ bhaktyā te rudrāḥ syurna saṃśaya

yadā kadācidgokarṇe yo vā ko vāpi mānavaḥ //
pūjayecchivaliṃgaṃ tatsa gacchedbrahmaṇaḥ padam

brahmaviṣṇvādidevānāṃ śaṃkaro hita kāmyayā //
mahābalābhidhānena devaḥ saṃnihitassadā /

ghoreṇa tapasā labdhaṃ rāvaṇākhyena rakṣasā//
talliṃgaṃ sthāpayāmāsa gokarṇa gaṇanāyakaḥ

viṣṇurbrahmā mahendraśca viśvadevo marudgaṇāḥ//
ādityā vasavo dasrau śaśāṃkaśca satārakaḥ

ete vimānagatayo devāśca saha pārṣadaiḥ //
pūrvadvāraṃ niṣevante tasya vai prītikāraṇāt

yamo mṛtyuḥ svayaṃ sākṣāccitraguptaśca pāvakaḥ//
pitṛbhiḥ saha rudraiśca dakṣiṇadvāramāśritaḥ

varuṇaḥ saritāṃ nātho gaṃgādisaritā gaṇaiḥ //
mahābalaṃ ca sevante paścimadvāramāśritāḥ

tathā vāyuḥ kuberaśca deveśī bhadrakālikā //
mātṛbhiścaṇḍikādyābhiruttaradvāramāśritāḥ

sarve devāssagandharvāḥ pitaraḥ siddhacāraṇāḥ //
vidyādharāḥ kiṃpuruṣāḥ kinnarā guhyakāḥ khagāḥ

nānāpiśācā vetālā daiteyāśca mahābalāḥ //
nāgāśśeṣādayassarve siddhāśca munayo'khilāḥ

praṇuvanti ca taṃ devaṃ praṇamanti mahābalam //
labhanta īpsitānkāmānramante ca yathāsukham

bahubhistatra sutapastaptaṃ sampūjya taṃ vibhum //
labdhā hi paramā siddhirihāmutrāpi saukhyadā

gokarṇe śivaliṃgaṃ tu mokṣadvāra udāhṛtaḥ //
mahābalābhidhāno'sau pūjitaḥ saṃstuto dvijāḥ

māghāsitacaturdaśyāṃ mahābalasamarcanam //
vimuktidaṃ viśeṣeṇa sarveṣāṃ pāpināmapi

asyāṃ śivatithau sarve mahotsavadidṛkṣavaḥ //
āyāṃti sarvadeśebhyaścāturvarṇyamahājanāḥ

striyo vṛddhāśca bālāśca caturāśramavāsinaḥ //
dṛṣṭvā tatretya deveśaṃ lebhire kṛtakṛtyatām

mahābalaprabhāvāttu tacca liṃgaṃ śivasya tu //
sampūjyaikātha cāṇḍālī śivalokaṃ gatā drutam

iti śrīśivamahāpurāṇe caturthyāṃ koṭirudrasaṃhitāyāṃ mahābalamāhātmyavarṇanaṃ nāmāṣṭamo'dhyāyaḥ