Shiva Purana · Chapter 4.10

sūta uvāca //
śrīmatīkṣvākuvaṃśe hi rājā paramadhārmikaḥ //
āsīnmitrasaho nāma śreṣṭhassarvadhanuṣmatām

tasya rājñaḥ sudharmiṣṭhā madayantī priyā śubhā//
damayantī nalasyeva babhūva viditā satī

sa ekadā hi mṛgayāsnehī mitrasaho nṛpaḥ //
mahadbalena saṃyukto jagāma gahanaṃ vanam

viharaṃstatra sa nṛpaḥ kamaṭhāhvaṃ niśācaram //
nijaghāna mahāduṣṭaṃ sādhupīḍākaraṃ khalam

atha tasyānujaḥ pāpī jayeyaṃ chadmanaiva tam//
matvā jagāma nṛpaterantika cchadmakārakaḥ

taṃ vinamrākṛtiṃ dṛṣṭvā bhṛtyatāṃ kartumāgatam//
cakre mahānasādhyakṣamajñānātsa mahīpatiḥ

atha tasminvane rājā kiyatkālaṃ vihṛtya saḥ //
nivṛtto mṛgayāṃ hitvā svapurīmāyayau mudā

pituḥ kṣayāhe samprāpte nimaṃtrya svaguruṃ nṛpaḥ //
vasiṣṭhaṃ gṛhamāninye bhojayāmāsa bhaktitaḥ

rakṣasā sūdarūpeṇa saṃmiśritanarāmiṣam //
śākāmiṣaṃ puraḥ kṣiptaṃ dṛṣṭvā gururathābravīt

gururuvāca //
dhik tvāṃ narāmiṣaṃ rājaṃstvayaitacchadmakāriṇā //
khalenopahṛtaṃ mahyaṃ tato rakṣo bhaviṣyasi

rakṣaḥkṛtaṃ ca vijñāya tadaivaṃ sa gurustadā //
punarvimṛśya taṃ śāpaṃ cakāra dvādaśābdikam

sa rājānucitaṃ śāpaṃ vijñāya krodhamūrchitaḥ //
jalāṃjaliṃ samādāya guruṃ śaptuṃ samudyataḥ

tadā ca tatpriyā sādhvī madayantī sudharmiṇī //
patitvā pādayostasya śāpaṃ taṃ hi nyavārayat

tato nivṛttaśāpastu tasyā vacanagauravāt //
tatyāja pādayoraṃbhaḥ pādau kalmaṣatāṃ gatau

tataḥprabhṛti rājābhūtsa lokesminmunīśvarāḥ //
kalmaṣāṃghririti khyātaḥ prabhāvāttajjalasya hi

rājā mitrasahaḥ śāpādguro ṛṣivarasya hi //
babhūva rākṣaso ghoro hiṃsako vanagocaraḥ

sa bibhradrākṣasaṃ rūpaṃ kālāntakayamopamam //
cakhāda vividhāñjaṃtūnmānuṣādīnvanecaraḥ

sa kadācidvane kvāpi ramamāṇau kiśorakau //
apaśyadantakākāro navoḍhau munidampatī

rākṣasaḥ sa narāhāraḥ kiśoraṃ muninandanam //
jagdhuṃ jagrāha śāpārtto vyāghro mṛgaśiśuṃ yathā

kukṣau gṛhītaṃ bhartāraṃ dṛṣṭvā bhītā ca tatpriyā//
sā cakre prārthanaṃ tasmai vadaṃtī karuṇaṃ vacaḥ

prārthyamāno'pi bahuśaḥ puruṣādaḥ sa nirghṛṇaḥ//
cakhāda śira utkṛtya viprasūnordurāśayaḥ//२१/
atha sādhvī ca sā dīnā vilapya bhṛśaduḥkhitā//
āhṛtya bharturasthīni citāṃ cakre kilolbaṇām

bhartāramanugacchantī saṃviśaṃtī hutāśanam//
rājānaṃ rākṣasākāraṃ sā śaśāpa dvijāṅganā

adyaprabhṛti nārīṣu yadā tvaṃ saṃgato bhaveḥ //
tadā mṛtistavetyuktvā viveśa jvalanaṃ satī

sopi rājā gurośśāpamanubhūya kṛtāvadhim //
punaḥ svarūpamāsthāya svagṛhaṃ mudito yayau

jñātvā viprasatīśāpaṃ madayantī ratipriyam //
patiṃ nivārayāmāsa vaidhavyādatibibhyatī

anapatyo vinirviṇṇo rājyabhogeṣu pārthivaḥ //
visṛjya sakalāṃ lakṣmīṃ vanameva jagāma ha

svapṛṣṭhataḥ samāyāntīṃ brahmahatyāṃ suduḥkhadām //
dadarśa vikaṭākārāṃ tarjayantī muhurmuhuḥ

tasyā nirbhadramanvicchan rājā nirviṇṇamānasaḥ //
cakāra nānopāyānsa japavratamakhādikān

nānopāyairyadā rājñastīrthasnānādibhirdvijāḥ //
na nivṛttā brahmahatyā mithilāṃ sa yayau tadā

bāhyodyānagatastasyāścitayā parayārditaḥ//
dadarśa munimāyāntaṃ gautamaṃ pārthivaśca saḥ

abhisṛtya sa rājendro gautamaṃ vimalāśayam //
taddarśanāptakiṃcitkaḥ praṇanāma muhurmuhuḥ////
atha tatpṛṣṭakuśalo dīrghamuṣṇaṃ ca niśvasan //
tatkṛpādṛṣṭisaṃprāptasukha provāca taṃ nṛpaḥ

rājovāca //
mune māṃ bādhate hyeṣā brahmahatyā duratyayā //
alakṣitā paraistāta tarjayaṃtī padepade

yanmayā śāpadagdhena vipraputraśca bhakṣitaḥ //
tatpāpasya na śāntirhi prāyaścittasahasrakaiḥ

nānopāyāḥ kṛtā me hi tacchāntyai bhramatā mune //
na nivṛttā brahmahatyā mama pāpātmanaḥ kimu

adya me janmasāphalyaṃ saṃprāptamiva lakṣaye //
yatastvaddarśanādeva mamānandabharo'bhavat

adya me tavapādābja śaraṇasya kṛtainasaḥ //
śāṃtiṃ kuru mahābhāga yenāhaṃ sukhamāpnuyām

sūta uvāca //
iti rājñā samādiṣṭo gautamaḥ karuṇārdradhīḥ //
samādideśa ghorāṇāmaghānāṃ sādhu niṣkṛtim

gautama uvāca //
sādhu rājendra dhanyosi mahāghebhyo bhayantyaja//
śive śāstari bhaktānāṃ kva bhayaṃ śaraṇaiṣiṇām

śṛṇu rājanmahābhāga kṣetramanyatpratiṣṭhitam //
mahāpātakasaṃhāri gokarṇākhyaṃ śivālayam

tatra sthitirna pāpānāṃ mahadbhyo mahatāmapi //
mahābalābhidhānena śivaḥ saṃnihitaḥ svayam

sarveṣāṃ śivaliṃgānāṃ sārvabhaumo mahābalaḥ //
caturyuge caturvarṇassarvapāpāpahārakaḥ

paścimāmbudhitīrasthaṃ gokarṇaṃ tīrthamuttamam //
tatrāsti śivaliṃgaṃ tanmahāpātakanāśakam

tatra gatvā mahāpāpāḥ snātvā tīrtheṣu bhūriśaḥ//
mahābalaṃ ca saṃpūjya prayātāśśāṃkarampadam

tathā tvamapi rājendra gokarṇa giriśālayam //
gatvā sampūjya talliṃgaṃ kṛtakṛtyatvamāpnuyāḥ

tatra sarveṣu tīrtheṣu snātvābhyarcya mahābalam //
sarvapāpavinirmuktaḥ śivalokantvamāpnuyāḥ

sūta uvāca //
ityādiṣṭaḥ sa muninā gautamena mahātmanā //
mahāhṛṣṭamanā rājā gokarṇaṃ pratyapadyata

tatra tīrtheṣu susnātvā samabhyarcya mahābalam //
nirdhūtāśeṣapāpaugho'labhacchaṃbhoḥ parampadam

ya imāṃ śṛṇuyānnityaṃ mahābalakathāṃ priyām //
trisaptakulajaissārddhaṃ śivaloke vrajatyasau

iti vaśca samākhyātaṃ māhātmyaṃ paramādbhutam //
mahābalasya giriśaliṃgasya nikhilāghahṛt

iti śrīśivamahāpurāṇe caturthyāṃ koṭirudrasaṃhitāyāṃ mahābāhvaśivaliṃgamāhātmyavarṇanaṃ nāma daśamo'dhyāyaḥ