Shiva Purana · Chapter 4.34

vyāsa uvāca //
iti śrutvā vacastasya sūtasya ca munīśvarāḥ //
samūcustaṃ supraśasya lokānāṃ hitakāmyayā

ṛṣaya ūcuḥ //
sūta sarvaṃ vijānāsi tataḥ pṛcchāmahe vayam //
harīśvarasya liṃgasya mahimānaṃ vada prabho

cakraṃ sudarśanaṃ prāptaṃ viṣṇuneti śrutaṃ purā //
tadārādhanatastāta tatkathā ca viśeṣataḥ

sūta uvāca //
śrūyatāṃ ca ṛṣiśreṣṭhā harīśvarakathā śubhā //
yatassudarśanaṃ labdhaṃ viṣṇunā śaṃkarātpurā

kasmiṃścitsamaye daityāḥ saṃjātā balavattarāḥ //
lokāṃste pīḍayāmāsurdharmalopaṃ ca cakrire //

te devāḥ pīḍitā daityairmahābalaparākramaiḥ //
svaṃ dukhaṃ kathayāmāsurviṣṇuṃ nirjararakṣakam

devā ūcuḥ //
kṛpāṃ kuru prabho tvaṃ ca daityaissaṃpīḍitā bhṛśam //
kutra yāmaśca kiṃ kurmaśśaraṇyaṃ tvāṃ samāśritāḥ

sūta uvāca //
ityevaṃ vacanaṃ śrutvā devānāṃ duḥkhitātmanām //
smṛtvā śivapadāṃbhojaṃ viṣṇurvacanamabravīta

viṣṇuruvāca //
kariṣyāmi ca vaḥ kāryyamārādhya giriśaṃ surāḥ //
baliṣṭhāśśatravo hyete vijetavyāḥ prayatnataḥ

sūta uvāca //
ityuktāste surāssarve viṣṇunā prabhaviṣṇunā //
matvā daityānhatānduṣṭānyayurdhāma svakaṃsvakam

viṣṇurapyamarāṇāṃ tu jayārthamabhajacchivam//
sarvāmarāṇāmadhipaṃ sarvasākṣiṇamavyayam

gatvā kailāsanikaṭe tapastepe harissvayam //
kṛtvā kuṃḍaṃ ca saṃsthāpya jātavedasamagrataḥ

pārthivena vidhānena maṃtrairnānāvidhairapi//
stotraiścaivāpyanekaiśca giriśaṃ cābhajanmudā

kamalaissaraso jātairmānasākhyānmunīśvarāḥ //
baddhvā caivāsanaṃ tatra na cacāla harissvayam

prasādāvadhi caivātra stheyaṃ vai sarvathā mayā //
ityevaṃ niścayaṃ kṛtvā samānarca śivaṃ hariḥ

yadā naiva harastuṣṭo babhūva haraye dvijāḥ //
tadā sa bhagavānviṣṇurvicāre tatparo'bhavat

vicāryaivaṃ svamanasi sevanaṃ bahudhā kṛtam //
tathāpi na harastuṣṭo babhūvotikaraḥ prabhuḥ

tatastu vismito viṣṇurbhaktyā paramayānvitaḥ

sahasrairnāmabhiḥ prītyā tuṣṭāva parameśvaram

pratyekaṃ kamalaṃ tasmai nāmamaṃtramudīrya ca //
pūjayāmāsa vai śaṃbhuṃ śaraṇāgatavatsalam

parīkṣārthaṃ viṣṇubhaktestadā vai śaṃkareṇa ha //
kamalānāṃ sahasrāttu hṛtamekaṃ ca nīrajam

na jñātaṃ viṣṇunā tacca māyākāraṇamadbhutam //
nyūnaṃ taccāpi sañjñāya tadanveṣaṇatatparaḥ

babhrāma sakalāṃ pṛthvīṃ tatprītyai sudṛḍhavrataḥ //
tadaprāpya viśuddhātmā netramekamudāharat

taṃ dṛṣṭvā sa prasanno'bhūcchaṃkarassarvaduḥkhahā //
āvirbabhūva tatraiva jagāda vacanaṃ harim

śiva uvāca //
prasanno'smi hare tubhyaṃ varaṃ brūhi yathepsitam //
mano'bhilaṣitaṃ dadmi nādeyaṃ vidyate tava

sūta uvāca //
tacchrutvā śaṃbhuvacanaṃ keśavaḥ prītamānasaḥ //
mahāharṣasamāpanno hyabravītsāṃjaliśśivam

viṣṇuruvāca //
vācyaṃ kiṃ me tvadagre vai hyantaryāmī tvamāsthitaḥ //
tathāpi kathyate nātha tava śāsanagauravāt

daityaiśca pīḍitaṃ viśvaṃ sukhaṃ no nassadā śiva //
daityānhaṃtuṃ mama svāminsvāyudhaṃ na pravarttate

kiṃ karomi kva gacchāmi nānyo me rakṣakaḥ paraḥ//
ato'haṃ parameśāna śaraṇaṃ tvāṃ samāgataḥ

sūta uvāca //
ityuktvā ca namaskṛtya śivāya paramātmane//
sthitaścaivāgrataśśaṃbhoḥ svayaṃ ca purupīḍitaḥ

sūta uvāca //
iti śrutvā vaco viṣṇordevadevo maheśvaraḥ //
dadau tasmai svakaṃ cakraṃ tejorāśiṃ sudarśanam

tatprāpya bhagavānviṣṇurdaityāṃstānbalavattarān //
jaghāna tena cakreṇa drutaṃ sarvānvinā śramam

jagatsvāsthyaṃ paraṃ lebhe babhūvussukhinassurāḥ //
suprītaḥ svāyudhaṃ prāpya harirāsīnmahāsukhī

ṛṣaya ūcuḥ //
kiṃ tannāmasahasraṃ vai kathaya tvaṃ hi śāṃkaram //
yena tuṣṭo dadau cakraṃ haraye sa maheśvaraḥ

tanmāhātmyammama brūhi śivasaṃvādapūrvakam //
kṛpālutvaṃ ca śaṃbhorhi viṣṇūpari yathātatham

vyāsa uvāca //
iti teṣāṃ vacaśśrutvā munīnāṃ bhāvitātmanām //
smṛtvā śivapadāṃbhojaṃ sūto vacanamabravīt

iti śrīśiva mahāpurāṇe caturthyāṃ koṭirudrasaṃhitāyāṃ viṣṇusudarśanacakralābhavarṇanaṃ nāma catustriṃśo'dhyāyaḥ