Shiva Purana · Chapter 4.33

sūta uvāca //
putraṃ dṛṣṭvā kaniṣṭhāyā jyeṣṭhā duḥkhamupāgatā //
virodhaṃ sā cakārāśu na sahaṃtī ca tatsukham

sarve putraprasūtiṃ tāṃ praśaśaṃsurnirantaram //
tayā tatsahyate na sma śiśo rūpādikaṃ tathā

supriyaṃ tanayaṃ taṃ ca pitrossadguṇabhājanam //
dṛṣṭvā'bhavattadā tasyā hṛdayaṃ taptamagnivat

etasminnaṃtare viprāḥ kanyāṃ dātuṃ samāgatāḥ //
vivāhaṃ tasya tatraiva cakāra vidhivacca saḥ

sudharmā ghuśmayā sārddhamānandaṃ paramaṃ gataḥ //
sarve saṃbaṃdhinastasyāṃ ghuśmāyāṃ mānamādadhuḥ

taṃ dṛṣṭvā sā sudehā hi manasi jvalitā tadā //
atyantaṃ duḥkhamāpannā hā hatāsmīti vādinī

sudharmmā gṛhamāgatya vadhūṃ putraṃ vivāhitam //
utsāhaṃ darśayāmāsa priyābhyāṃ harṣayanniva

abhavaddharṣitā ghuṣmā sudehā duḥkhamāgatā //
na sahaṃtī sukhaṃ tacca duḥkhaṃ kṛtvāpatadbhuvi

ghuśmā'vadadvadhūputrau tvadīyau na madīyakau //
vadhūḥ putraśca tāṃ prītyā prasūṃ śvaśramamanyata

bharttā priyāṃ tāṃ jyeṣṭhāṃ ca mene naiva kaniṣṭhikām //
tathāpi sā tadā jyeṣṭhā svāntarmalavatī hyabhūt

ekasmindivase jyeṣṭhā sā sudehā ca duḥkhinī //
hṛdaye saṃcicinteti duḥkhaśāṃtiḥ kathaṃ bhavet

sudehovāca //
madīyo hṛdayāgniśca ghuśmānetrajalena vai //
bhaviṣyati dhruvaṃ śāṃto nānyathā duḥkhajena hi

ato'haṃ mārayāmyadya tatputraṃ priyavādinam //
agre bhāvi bhavedevaṃ niścayaḥ paramo mama

sūta uvāca //
kadaryyāṇāṃ vicāraśca kṛtyākṛtye bhavennahi//
kaṭhoraḥ prāyaśo viprāḥ sāpatno bhāva ātmahā

ekasmindivase jyeṣṭhā suptaṃ putraṃ vadhūyutam //
cicchide niśi cāṃgeṣu gṛhītvā churikāṃ ca sā

sarvāṃgaṃ khaṇḍayāmāsa rātrau ghuśmāsutasya sā //
nītvā sarasi tatraivākṣipaddṛptā mahābalā

yatra kṣiptāni liṃgāni ghuśmayā nityameva hi//
tatra kṣiptvā samāyātā suṣvāpa sukhamāgatā

prātaścaiva samutthāya ghuśmā nityaṃ tathākarot///
sudharmā ca svayaṃ śreṣṭho nityakarma samācarat

etasminnaṃtare sā ca jyeṣṭhā kāryaṃ gṛhasya vai //
cakārānandasaṃyuktā suśāṃtahṛdayānalā

prātaḥkāle samutthāya vadhūśśayyāṃ vilokya sā//
rudhirārdrāṃ dehakhaṃḍairyuktāṃ duḥkhamupāgatā

śvaśrūṃ nivedayāmāsa putraste ca kuto gataḥ//
śayyā ca rudhirārdrā vai dṛśyaṃte dehakhaṃḍakāḥ

hā hatāsmi kṛtaṃ kena duṣṭaṃ karma śucivrate//
ityuccārya rurodātivividhaṃ tatpriyā ca sā

jyeṣṭhā duḥkhaṃ tadāpannā hā hatāsmi kileti ca //
bahirduḥkhaṃ cakārāsau manasā harṣasaṃyutā

ghuśmā cāpi tadā tasyā vadhvā dukhaṃ niśamya sā//
na cacāla vratāttasmānnityapārthivapūjanāt

manaścaivotsukaṃ naiva jātaṃ tasyā manāgapi//
bhartāpi ca tathaivāsīdyāvadvratavidhirbhavet

madhyāhne pūjanāṃte ca dṛṣṭvā śayyāṃ bhayāvahām//
tathāpi na tadā kiñcitkṛtaṃ duḥkhaṃ hi ghuśmayā

yenaiva cārpitaścāyaṃ sa vai rakṣāṃ kariṣyati //
bhaktapriyassa vikhyātaḥ kālakālassatāṃ gatiḥ

yadi no rakṣitā śaṃbhurīśvaraḥ prabhurekalaḥ //
mālākāra ivāsau yānyuṅkte tānviyunakti ca

adya me ciṃtayā kiṃ syāditi tattvaṃ vicārya sā //
na cakāra tadā duḥkhaṃ śive dhairyaṃ samāgatā

pārthivāṃśca gṛhītvā sā pūrvavatsvasthamānasā //
śaṃbhornāmānyuccaraṃtī jagāma sarasastaṭe

/
kṣiptvā ca pārthivāṃstatra parāvarttata sā yadā //
tadā putrastaḍāgastho dṛśyate sma taṭe tayā

putra uvāca //
mātarehi miliṣyāmi mṛto'haṃ jīvito'dhunā //
tava puṇyaprabhāvāddhi kṛpayā śaṃkarasya vai

// sūta uvāca //
jīvitaṃ taṃ sutaṃ dṛṣṭvā ghuṣmā sā tatprasūrdvijāḥ //
prahṛṣṭvā nābhavattatra duḥkhitā na yathā purā

etasminsamaye tatra svāvirāsīcchivo drutam //
jyotirūpo maheśaśca saṃtuṣṭaḥ pratyuvāca ha

śiva uvāca //
prasanno'smi varaṃ brūhi duṣṭayā mārito hyayam //
enāṃ ca mārayiṣyāmi triśūlena varānane

// sūta uvāca //
purā tadā varaṃ vavre supraṇamya śivaṃ natā //
rakṣaṇīyā tvayā nātha sudeheyaṃ svasā mama

śiva uvāca //
apakāraḥ kṛtastasyāmupakāraḥ kathaṃ tvayā //
kriyate hananīyā ca sudehā duṣṭakāriṇī

ghuśmovāca //
tava darśanamātreṇa pātakaṃ naiva tiṣṭhati //
idānīṃ tvāṃ ca vai dṛṣṭvā tatpāpaṃ bhasmatāṃ vrajet

apakāreṣu yaścaiva hyupakāraṃ karoti ca //
tasya darśanamātreṇa pāpaṃ dūrataraṃ vrajet

iti śrutaṃ mayā deva bhagavadvākyamadbhutam //
tasmāccaivaṃ kṛtaṃ yena kriyatāṃ ca sadāśiva

sūta uvāca //
ityuktastu tayā tatra prasanno'tyabhavatpunaḥ //
maheśvaraḥ kṛpāsiṃdhuḥ samūce bhaktavatsalaḥ

śiva uvāca//
anyadvaraṃ brūhi ghuśme dadāmi ca hitaṃ tava //
tvadbhaktyā suprasanno'smi nirvikārasvabhāvataḥ

sūta uvāca //
sovāca tadvacaśśrutvā yadi deyo varastvayā //
lokānāṃ caiva rakṣārthamatra stheyaṃ madākhyayā

tadovāca śivastatra suprasanno maheśvaraḥ //
sthāsye'tra tava nāmnāhaṃ ghuśmeśākhyassukhapradaḥ

ghuśmeśākhyaṃ suprasiddhaṃ liṃgaṃ me jāyatāṃ śubham //
idaṃ sarastu liṃgānāmālayaṃ jāyatāṃ sadā

tasmācchivālayaṃ nāma prasiddhaṃ bhuvanatraye //
sarvakāmapradaṃ hyetaddarśanātsyātsadā saraḥ

tava vaṃśe śataṃ caikaṃ puruṣāvadhi suvrate //
īdṛśāḥ putrakāḥ śreṣṭhā bhaviṣyaṃti na saṃśayaḥ

sustrīkāssudhanāścaiva svāyuṣyāśca vicakṣaṇāḥ //
vidyāvaṃto hyudārāśca bhuktimuktiphalāptaye

śatamekottaraṃ caiva bhaviṣyaṃti guṇādhikāḥ //
īdṛśo vaṃśavistāro bhaviṣyati suśobhanaḥ

sūta uvāca //
ityuktvā ca śivastatra liṃgarūpo'bhavattadā //
ghuśmeśo nāma vikhyātaḥ saraścaiva śivālayam

sudharmā sa ca ghuśmā ca sudehā ca samāgatāḥ //
pradakṣiṇaṃ śivasyāśu śatamekottaraṃ dadhuḥ

pūjāṃ kṛtvā maheśasya militvā ca parasparam //
hitvā cāṃtarmalaṃ tatra lebhire paramaṃ sukham

putraṃ dṛṣṭvā sudehā sā jīvitaṃ lajjitābhavat //
tau kṣamāpyācaradviprā nijapāpāpahaṃ vratam

ghuśmeśākhyamidaṃ liṃgamitthaṃ jātaṃ munīśvarāḥ //
taṃ dṛṣṭvā pūjayitvā hi sukhaṃ saṃvarddhate sadā

iti vaśca samākhyātā jyotirliṃgāvalī mayā //
dvādaśapramitā sarvakāmadā bhukti muktidā

etajjyotirliṃgakathāṃ yaḥ paṭhecchṛṇuyādapi //
mucyate sarvapāpebhyo bhuktiṃ muktiṃ ca viṃdati

iti śrīśivamahāpurāṇe caturthyāṃ koṭirudrasahitāyāṃ dhuśmeśajyotirliṃgotpattimāhātmyavarṇanaṃ nāma trayastriṃśo'dhyāyaḥ

iti dvādaśajyotirliṃgamāhātmyaṃ samāptam //