Shiva Purana · Chapter 4.31

sūta uvāca // //
ataḥ paraṃ pravakṣyāmi liṃgaṃ rāmeśvarābhidham //
utpannaṃ ca yathā pūrvamṛṣayaśśṛṇutādarāt

purā viṣṇuḥ pṛthivyāṃ cāvatatāra satāṃ priyaḥ

tatra sītā hṛtā viprā rāvaṇenorumāyinā //
prāpitā svagṛhaṃ sā hi laṃkāyāṃ janakātmajā

anveṣaṇaparastasyāḥ kiṣkindhākhyāṃ purīmagāt //
sugrīvahitakṛdbhūtvā vālinaṃ saṃjaghāna ha

tatra sthitvā kiyatkālaṃ tadanveṣaṇatatparaḥ //
sugrīvādyairlakṣmaṇena vicāraṃ kṛtavānsa vai

kapīnsaṃpreṣayāmāsa caturdikṣu nṛpātmajaḥ //
hanumatpramukhānrāmastadanveṣaṇahetave

atha jñātvā gatāṃ laṃkāṃ sītāṃ kapivarānanāt //
sītācūḍāmaṇiṃ prāpya mumude so'ti rāghavaḥ

sakapīśastadā rāmo lakṣmaṇena yuto dvijāḥ //
sugrīvapramukhaiḥ puṇyairvānarairbalavattaraiḥ

padmairaṣṭādaśākhyaiśca yayau tīraṃ payonidheḥ //
dakṣiṇe sāgare yo vai dṛśyate lavaṇākaraḥ

tatrāgatya svayaṃ rāmo velāyāṃ saṃsthito hi saḥ //
vānaraissevyamānastu lakṣmaṇena śivapriyaḥ

hā jānaki kuto yātā kadā ceyaṃ miliṣyati //
agādhassāgaraścaivātāryā senā ca vānarī

rākṣaso giridharttā ca mahābalaparākramaḥ//
laṃkākhyo durgamo durga iṃdrajittanayosya vai

ityevaṃ sa vicāryaiva taṭe sthitvā salakṣmaṇaḥ//
āśvāsito vanaukobhiraṃgadādipurassaraiḥ

etasminnaṃtare tatra rāghavaśśaivasattamaḥ//
uvāca bhrātaraṃ prītyā jalārthī lakṣmaṇābhidham

rāma uvāca //
bhrātarlakṣmaṇa vīreśāhaṃ jalārthī pipāsitaḥ //
tadānaya drutaṃ pātho vānaraiḥ kaiścideva hi

sūta uvāca //
tacchrutvā vānarāstatra hyadhāvaṃta diśo daśa //
nītvā jalaṃ ca te procuḥ praṇipatya puraḥ sthitāḥ

vānarā ūcuḥ //
jalaṃ ca gṛhyatāṃ svāminnānītaṃ tattvadājñayā//
mahottamaṃ ca susvādu śītalaṃ prāṇatarpaṇam

sūta uvāca//
suprasannataro bhūtvā kṛpādṛṣṭyā vilokya tān //
tacchrutvā rāmacandro'sau svayaṃ jagrāha tajjalam

sa śaivastajjalaṃ nītvā pātumārabdhavānyadā //
tadā ca smaraṇaṃ jātamitthamasya śivecchayā

na kṛtaṃ darśanaṃ śaṃbhorgṛhyate ca jalaṃ katham //
svasvāminaḥ pareśasya sarvānaṃdapradasya vai / 4.31.२० //
ityuktvā ca jalaṃ pītaṃ tadā raghuvareṇa ca//
paścācca pārthivīṃ pūjāṃ cakāra raghunaṃdanaḥ

āvāhanādikāṃścaiva hyupacārānprakalpya vai /
vidhivatṣoḍaśa prītyā devamānarca śaṅkaram

praṇipātaisstavairdivyaiśśivaṃ saṃtoṣya yatnataḥ//
prārthayāmāsa sadbhaktyā sa rāmaśśaṃkaraṃ mudā

rāma uvāca // //
svāmiñchaṃbho mahādeva sarvadā bhaktavatsala //
pāhi māṃ śaraṇāpannaṃ tvadbhaktaṃ dīnamānasam

etajjalamagādhaṃ ca vāridherbhavatāraṇa //
rāvaṇākhyo mahāvīro rākṣaso balavattaraḥ

vānarāṇāṃ balaṃ hyetaccaṃcalaṃ yuddhasādhanam //
mamakāryaṃ kathaṃ siddhaṃ bhaviṣyati priyāptaye

tasmindeva tvayā kāryaṃ sāhāyyaṃ mama suvrata //
sāhāyyaṃ te vinā nātha mama kāryyaṃ hi durlabham

tvadīyo rāvaṇo'pīha durjjayassarvathākhilaiḥ //
tvaddattavaradṛptaśca mahāvīrastrilokajit

apyahaṃ tava dāso'smi tvadadhīnaśca sarvathā //
vicāryeti tvayā kāryaḥ pakṣapātassadāśiva

sūta uvāca //
ityevaṃ sa ca saṃprārthya namaskṛtya punaḥpunaḥ //
tadā jayajayetyuccairuddhoṣaiśśaṃkareti ca

iti stutvā śivaṃ tatra maṃtradhyānaparāyaṇaḥ //
punaḥ pūjāṃ tataḥ kṛtvā svāmyagre sa nanarta ha

premī viklinnahṛdayo gallanādaṃ yadākarot //
tadā ca śaṃkaro devassuprasanno babhūva ha

sāṃgassaparivāraśca jyotīrūpo maheśvaraḥ //
yathoktarūpamamalaṃ kṛtvāvirabhavaddrutam

tatassaṃtuṣṭahṛdayo rāmabhaktyā maheśvaraḥ //
śivamastu varaṃ brūhi rāmeti sa tadābravīt

tadrūpaṃ ca tadā dṛṣṭvā sarve pūtāstatassvayam //
kṛtavānrāghavaḥ pūjāṃ śivadharmaparāyaṇaḥ

stutiṃ ca vividhāṃ kṛtvā praṇipatya śivaṃ mudā //
jayaṃ ca prārthayāmāsa rāvaṇājau tadātmanaḥ

tataḥ prasannahṛdayo rāmabhaktyā maheśvaraḥ //
jayostu te mahārāja prītyā sa punarabravīt

śivadattaṃ jayaṃ prāpya hyanujñāṃ samavāpya ca //
punaśca prārthayāmāsa sāṃjalirnatamastakaḥ

// rāma uvāca //
tvayā stheyamiha svāmiṃllokānāṃ pāvanāya ca //
pareṣāmupakārārthaṃ yadi tuṣṭo'si śaṃkara

// sūta uvāca //
ityuktastu śivastatra liṃgarūpo'bhavattadā //
rāmeśvaraśca nāmnā vai prasiddho jagatītale

rāmastu tatprabhāvādvai sindhumuttīrya cāṃjasā //
rāvaṇādīnnihatyāśu rākṣasānprāpa tāṃ priyām

rāmeśvarasya mahimādbhuto'bhūdbhuvi cātulaḥ //
bhuktimuktipradaścaiva sarvadā bhaktakāmadaḥ

divyagaṃgājalenaiva snāpayiṣyati yaśśivam //
rāmeśvaraṃ ca sadbhaktyā sa jīvanmukta eva hi

iha bhuktvākhilānbhogāndevānāṃ durlabhānapi //
aṃte prāpya paraṃ jñānaṃ kaivalyaṃ prāpnuyāddhruvam

iti vaśca samākhyātaṃ jyotirligaṃ śivasya tu //
rāmeśvarābhidhaṃ divyaṃ śṛṇvatāṃ pāpahārakam

iti śrīśivamahāpurāṇe caturthyāṃ koṭirudrasaṃtāyāṃ rāmeśvaramāhātmyavarṇanaṃ nāmaikatriṃśo'dhyāyaḥ