Shiva Purana · Chapter 4.32

// sūta uvāca //
ataḥ paraṃ ca ghuśmeśaṃ jyotirliṃgamudāhṛtam//
tasyaiva ca sumāhātmyaṃ śrūyatāmṛṣisattamaḥ

dakṣiṇasyāṃ diśi śreṣṭho girirdeveti saṃjñakaḥ //
mahāśobhānvito nityaṃ rājate'dbhuta darśanaḥ

tasyaiva nikaṭe kaścidbhāradvājakulodbhavaḥ //
sudharmā nāma vipraśca nyavasadbrahmavittamaḥ

tasya priyā sudehā ca śivadharmaparāyaṇaḥ //
patisevāparā nityaṃ gṛhakarmavicakṣaṇā

sudharmā ca dvijaśreṣṭho devatātithipūjakaḥ //
vedamārgaparo nityamagni sevāparāyaṇaḥ

trikālasaṃdhyayā yuktassūryyarūpasamadyutiḥ //
śiṣyāṇāṃ pāṭhakaścaiva vedaśāstravicakṣaṇaḥ

dhanavāṃśca paro dātā saujanyaguṇabhājanaḥ //
śivakarmarato nityaṃ śaivaśśaivajanapriyaḥ //

āyurbahu vyatīyāya tasya dharmaṃ prakurvataḥ //
putraśca nābhavattasya ṛtuḥ syādaphalaḥ striyāḥ

tena duḥkhaṃ kṛtaṃ naiva vastujñānapareṇa hi //
ātmanastārakaścātmā hyātmanaḥ pāvanaśca saḥ

ityevaṃ mānasaṃ dhṛtvā duḥkhaṃ na kṛtavānstadā //
sudehā ca tadā duḥkhaṃ cakāra putrasambhavam

nityaṃ ca svāminaṃ sā vai prārthayadyatnasādhane //
putrotpādanahetośca sarvavidyāviśāradam

so'pi striyaṃ tadā bhartsya kiṃ putraśca kariṣyati //
kā mātā kaḥ pitā putraḥ ko baṃdhuśca priyaśca kaḥ

sarvaṃ svārthaparaṃ devi trilokyāṃ nātra saṃśayaḥ //
jānīhi tvaṃ viśeṣeṇa buddhyā śokaṃ na vai kuru

tasmāddevi tvayā duḥkhaṃ tyajanīyaṃ suniścitam //
nityaṃ mahyaṃ tvayā naiva kathanīyaṃ śubhavrate

evaṃ tāṃ sannivāryyaiva bhagavaddharmatatparaḥ //
āsītparamasaṃtuṣṭo dvandvaduḥkhaṃ samatyajat

kadācicca sudehā vai gehe ca sahavāsinaḥ //
jagāma priyagoṣṭhyarthaṃ vivādastatra saṃgataḥ

tatpatnī strīsvabhāvācca bhartsitā sā tayā tadā //
uktā ceti duruktyā vai sudehā viprakāminī

dvijapatnyuvāca // aputriṇi kathaṃ garvaṃ kuruṣe putriṇī hyaham //
maddhanaṃ bhokṣyate putro dhanaṃ te kaśca bhokṣyate

nūnaṃ hariṣyate rājā tvaddhanaṃ nātra saṃśayaḥ //
dhigdhiktvāṃ te dhanaṃ dhikca dhikte mānaṃ hi vandhyake

// sūta uvāca //
bhartsitā tābhiriti sā gṛhamāgatya duḥkhitā //
svāmine kathayāmāsa taduktaṃ sarvamādarāt

brāhmaṇo'pi tadā duḥkhaṃ na cakāra subuddhimān //
kathitaṃ kathyatāmeva yadbhāvi tadbhavetpriye

ityevaṃ ca tadā tena hyāśvastāpi punaḥ punaḥ //
na tadā sātyajadduḥkhaṃ hyāgrahaṃ kṛtavatyasau

/sudehovāca //
yathā tathā tvayā putrassamutpādyaḥ priyo'si me //
tyakṣāmi hyanyathāhaṃ ca dehaṃ dehabhṛtāṃ vara

sūta uvāca //
evamuktaṃ tayā śrutvā sudharmā brāhmaṇottamaḥ //
śivaṃ sasmāra manasā tadāgrahanipīḍitaḥ

agneragre'kṣipatpuṣpadvayaṃ vipro hyataṃdritaḥ //
manasā dakṣiṇaṃ puṣpaṃ tanmene putrakāmadam

evaṃ kṛtvā paṇaṃ patnīmuvāca brāhmaṇassa ca //
anayorgrāhyamekaṃ te puṣpaṃ putra phalāptaye

tayā ca manasā dhṛtvā putraścaiva bhavenmama //
tadā ca svāminā yacca dhṛtaṃ puṣpaṃ sametu mām

ityuktvā ca tayā tatra namaskṛtya śivaṃ tadā //
natvā cāgniṃ punaḥ prārthya gṛhītaṃ puṣpamekakam

svāminā ciṃtitaṃ yacca tadgṛhītaṃ tayā na hi //
sudehayā vimohena śivecchāsaṃbhavena vai

taddṛṣṭvā puruṣaścaiva niśvāsaṃ paryamocayat //
smṛtvā śivapadāṃbhojamuvāca nijakāminīm

sudharmovāca //
nirmitaṃ ceśvareṇaiva kathaṃ caivānyathā bhavet //
āśāṃ tyaja priye tvaṃ ca paricaryyāṃ kuru prabhoḥ

ityuktvā tu svayaṃ vipra āśāṃ parivihāya ca //
dharmakāryaratasso'bhūcchaṃkaradhyānatatparaḥ

sā sudehāgrahaṃ naiva mumocātmajakāmyayā //
pratyuvāca patiṃ premṇā sāṃjalirnatamastakā

sudehovāca //
mayi putro na cāstvanyā patnīṃ kuru madājñayā //
tasyāṃ nūnaṃ sutaścaiva bhaviṣyati na saṃśayaḥ

sūta uvāca //
tadaiva prathito vai sa brahmaṇaśśaivasattamaḥ //
uvāca svapriyāṃ tāṃ ca sudehāṃ dharma tatparaḥ

sudharmovāca //
tvadīyaṃ ca madīyaṃ ca sarvaṃ duḥkhaṃ gataṃ dhruvam //
tasmāttvaṃ dharmavighnaṃ ca priyo mā kuru sāṃpratam

sūta uvāca //
ityevaṃ vāritā sā ca svāmātuḥ putrikāṃ tadā //
gṛhamānīya bhartāraṃ vṛṇu tvenāmidaṃ jagau

sudharmovāca //
idānīṃ vadasi tvaṃ ca matpriyeyaṃ tataḥ punaḥ //
putrasūśca yadā syādvai tadā sparddhāṃ kariṣyasi

sūta uvāca//
ityuktvā tena patinā sā sudehā ca tatpriyā //
punaḥ prāha karau baddhvā sudharmāṇaṃ patiṃ dvijāḥ

( nāhaṃ sparddhāṃ bhaginyā vai kariṣye dvijasattama //
upayacchasva putrārthamimāmājñāpayāmi ca //)
ityevaṃ prārthitasso'pi sudharmā priyayā tayā //
ghuśmāṃ tāṃ samupāyaṃsta vivāhavidhinā dvijaḥ

tatastāṃ pariṇīyātha prārthayāmāsa tāṃ dvijaḥ //
tvadīyeyaṃ kaniṣṭhā hi sadā poṣyānaghe priye

uktaiva sa ca dharmātmā sudharmā śaivasattamaḥ //
yathāyogyaṃ cakārāśu dharmasaṃgrahamātmanaḥ

sā cāpi mātṛputrīṃ tāṃ dāsīvatparyavarttata //
parityajya virodhaṃ hi pupoṣāharniśaṃ priyā

kaniṣṭhā caiva yā patnī svasranujñāmavāpya ca //
pārthivānsā cakārāśu śriyamekottaraṃ śatam

vidhānapūrvakaṃ ghuṣmā sopacārasamanvitam //
kṛtvā tānprākṣipattatra taḍāge nikaṭasthite

evaṃ nityaṃ sā cakāra śivapūjāṃ svakāmadām //
visṛjya punarāvāhya tatsaparyyāvidhānataḥ

kurvantyā nityamevaṃ hi tasyāśśaṃkarapūjanam //
lakṣasaṃkhyābhavatpūrṇā sarvakāmaphalapradā

kṛpayā śaṃkarasyaiva tasyāḥ putro vyajāyata //
sundarassubhagaścaiva kalyāṇaguṇabhājam

taṃ dṛṣṭvā paramaprītaḥ sa vipro dharmavittamaḥ //
anāsaktassukhaṃ bheje jñānadharmaparāyaṇaḥ

sudehā tāvadasyāstu sparddhāmugrāṃ cakāra sā //
prathamaṃ śītalaṃ tasyā hṛdayaṃ hyasivatpunaḥ

tataḥ paraṃ ca yajjātaṃ kutsitaṃ karma duḥkhadam //
sāvadhānena manasā śrūyatāṃ tanmunīśvarā

iti śrīśivamahāpurāṇe caturthyāṃ koṭirudrasaṃhitāyāṃ ghuśmeśvaramāhātmye sudehāsudharmacaritavarṇanaṃ nāma dvātriṃśo'dhyāyaḥ