Shiva Purana · Chapter 4.19

sūta uvāca//
naranārāyaṇākhyau yāvavatārau harerdvijāḥ //
tepāte bhārate khaṇḍe badaryāśrama eva hi

tābhyāṃ saṃprārthitaśśaṃbhuḥ pārthive pūjanāya vai //
āyāti nityaṃ talliṃge bhaktādhīnatayā śiva

evaṃ pūjayatośśaṃbhuṃ tayorviṣṇvavatārayoḥ //
cirakālo vyatītāya śaivayordharmaputrayoḥ

ekasminsamaye tatra prasannaḥ parameśvaraḥ //
pratyuvāca prasannosmi varo me vriyatāmiti

ityukte ca tadā
tena naro nārāyaṇassvayam//
ūcaturvacanaṃ tatra lokānāṃ hitakāmyayā

//
naranārāyaṇāvūcatuḥ //
yadi prasanno deveśa yadi deyo varastvayā //
sthīyatāṃ svena rūpeṇa pūjārthaṃ śaṃkarassvayam

sūta uvāca //
ityuktastu tadā tābhyāṃ kedāre himasaṃśraye //
svayaṃ ca śaṃkarastasthau jyotīrūpo maheśvaraḥ

tābhyāṃ ca pūjitaścaiva sarvaduḥkhabhayāpahaḥ //
lokānāmupakārārthaṃ bhaktānāṃ darśanāya vai

svayaṃ sthitastadā śaṃbhuḥ kedāreśvarasaṃjñakaḥ //
bhaktābhīṣṭaprado nityaṃ darśanādarcanādapi

devāśca pūjayaṃtīha ṛṣayaśca purātanāḥ//
manobhīṣṭa phalaṃ tete suprasannānmaheśvarāt

bhavasya pūjanānnityaṃ badaryāśramavāsinaḥ//
prāpnuvanti yataḥ so'sau bhaktābhīṣṭapradaḥ sadā

taddinaṃ hi samārabhya kedāreśvara eva ca //
pūjito yena bhaktyā vai duḥkhaṃ svapne'ti durlabham

yo vai hi pāṇḍavāndṛṣṭvā māhiṣaṃ rūpamāsthitaḥ //
māyāmāsthāya tatraiva palāyanaparo'bhavat

dhṛtaśca pāṇḍavaistatra hyavāṅmukhatayā sthitaḥ //
puccha caiva dhṛtaṃ taistu prārthitaśca punaḥpunaḥ

tadrūpeṇa sthitastatra bhaktavatsalanāmabhāk //
nayapāle śirobhāgo gatastadrūpataḥ sthitaḥ

sa vai va pūjanānnityamājñāṃ caivāpyadāttathā //
pūjitaśca svayaṃ śaṃbhustatra tasthau varānadāt

pūjayitvā gatāste tu pāṇḍavā muditāstadā //
labdhvā cittepsitaṃ sarvaṃ vimuktāssarvaduḥkhataḥ

tatra nityaṃ hassākṣātkṣetre kedārasaṃjñake //
bhāratībhiḥ prajābhiśca tathaiva paripūjyate

tatratyaṃ valayaṃ yo vai dadāti haravallabhaḥ //
hararūpāṃtikaṃ tacca hararūpasamanvitam

tathaiva rūpaṃ dṛṣṭvā ca sarvapāpaiḥ pramucyate //
jīvanmukto bhavetsopi yo gato badarīvane

dṛṣṭvā rūpaṃ narasyaiva tathā nārāyaṇasya hi //
kedāreśvaraśaṃbhośca muktabhāgī na saṃśayaḥ

kedāreśasya bhaktā ye mārgasthāstasya vai mṛtā//
gate'pi muktā bhavaṃtyeva nātra kāryyā vicāraṇā

gatvā tatra prītiyuktaḥ kedāreśaṃ prapūjya ca //
tatratyamudakaṃ pītvā punarjanma na vindati

khaṇḍesminbhārate viprā naranārāyaṇeśvaraḥ //
kedāreśaḥ prapūjyaśca sarvairjīvaissubhaktitaḥ

asya khaṇḍasya sa svāmī sarveśopi viśeṣataḥ //
sarvakāmapradaśśaṃbhuḥ kedārākhyo na saṃśaya

etadvacassamākhyātaṃ yatpṛṣṭamṛṣisattamāḥ //
śrutvā pāpaṃ haretsarvaṃ nātra kāryā vicāraṇā

iti śrīśivamahāpurāṇe caturthyāṃ koṭirudrasaṃhitāyāṃ kedāreśvarajyotirligamāhātmyavarṇanaṃ nāmaikonaviṃśo'dhyāyaḥ