Shiva Purana · Chapter 4.15

// sūta uvāca //
ataḥ paraṃ pravakṣyāmi mallikārjunasaṃbhavam //
yaḥ śrutvā bhaktimāndhīmānsarvapāpaiḥ pramucyate

pūrvaṃ cā kathitaṃ yacca tatpunaḥ kathayāmyaham //
kumāracaritaṃ divyaṃ sarvapāpavināśanam

yadā pṛthvīṃ samākramya kailāsaṃ punarāgataḥ //
kumārassa śivāputrastārakārirmahābalaḥ

tadā surarṣirāgatya sarvaṃ vṛttaṃ jagāda ha //
gaṇeśvaravivāhādi bhrāmayaṃstaṃ svabuddhitaḥ

tacchutvā sa kumāro hi praṇamya pitarau ca tau //
jagāma parvataṃ kraucaṃ pitṛbhyāṃ vārito'pi hi

kumārasya viyogena tanmātā girijā yadā //
duḥkhitāsīttadā śaṃbhustāmuvāca subodhakṛt

kathaṃ priye duḥkhitāsi na duḥkhaṃ kuru pārvati //
āyāsyati sutaḥ subhrūstyajyatāṃ duḥkhamutkaṭam

sā yadā ca na tanmene pārvatī duḥkhitā bhṛśam //
tadā ca preṣitāstatra śaṃkareṇa surarṣayaḥ

devāśca ṛṣayassarve sagaṇā hi mudānvitāḥ //
kumārānayanārthaṃ vai tatra jagmuḥ subuddhayaḥ

tatra gatvā ca te sarve kumāraṃ supraṇamya ca //
vijñāpya bahudhāpyenaṃ prārthanāṃ cakrurādarāt

devādiprārthanāṃ tāṃ ca śivājñāsaṃkulāṃ guruḥ //
na mene sa kumāro hi mahāhaṃkāravihvalaḥ

tataśca punarāvṛtya sarve te hi śivāṃtikam //
svaṃsvaṃ sthānaṃ gatā natvā prāpya śaṃkaraśāsanam

tadā ca girijādevī virahaṃ putrasaṃbhavam //
śaṃbhuśca paramaṃ duḥkhaṃ prāpa tasminnanāgate

atho suduḥkhitau dīnau lokācārakarau tadā //
jagmatustatra susnehātsvaputro yatra saṃsthitaḥ

sa putraśca kumārākhyaḥ pitrorāgamanaṃ gireḥ //
jñātvā dūraṃ gato'snehādyojanatrayameva ca

krauṃce ca parvate dūraṃ gate tasminsvaputrake //
tau ca tatra samāsīnau jyo tīrūpaṃ samāśritau

putrasnehāturau tau vai śivau parvaṇiparvaṇi //
darśanārthaṃ kumārasya svaputrasya hi gacchataḥ

amāvāsyādine śaṃbhussvayaṃ gacchati tatra ha //
paurṇamāsīdine tatra pārvatī gacchati dhruvam

taddinaṃ hi samārabhya mallikārjunasaṃbhavam //
liṃgaṃ caiva śivasyaikaṃ prasiddhaṃ bhuvanatraye

talliṃgaṃ yaḥ samīkṣeta sa sarvaiḥ kilbiṣairapi //
mucyate nātra sandehaḥ sarvānkāmānavāpnuyāt

duḥkhaṃ ca dūrato yāti sukhamātyaṃtikaṃ labhet //
jananīgarbhasaṃbhūtaṃ kaṣṭaṃ nāpnoti vai punaḥ

dhanadhānyasamṛddhiśca pratiṣṭhārogyameva ca //
abhīṣṭaphalasiddhiśca jāyate nātra saṃśayaḥ

jyotirliṃgaṃ dvitīyaṃ ca proktaṃ mallikasaṃjñitam //
darśanātsarvasukhadaṃ kathitaṃ lokahetave

iti śrīśivapurāṇe caturthyāṃ koṭi rudrasaṃhitāyā mallikārjunadvitīyajyotirliṃgavarṇanaṃnāma paṃcadaśo'dhyāyaḥ