Shiva Purana · Chapter 4.16

ṛṣaya ūcuḥ //
sūta sarvaṃ vijānāsi vastu vyāsa prasādataḥ //
jyotiṣāṃ ca kathāṃ śrutvā tṛptirnaiva prajāyate

tasmāttvaṃ hi viśeṣeṇa kṛpāṃ kṛtvātulāṃ prabho //
jyotirliṃgaṃ tṛtīyaṃ ca kathaya tvaṃ hi no'dhunā

sūta uvāca // //
dhanyo'haṃ kṛtakṛtyo'haṃ śrīmatāṃ bhavatāṃ yadi //
gataśca saṃgamaṃ viprā dhanyā vai sādhusaṃgatiḥ

ato matvā svabhāgyaṃ hi kathayiṣyāmi pāvanīm //
pāpapraṇāśinīṃ divyāṃ kathāṃ ca śṛṇutādarāt

avaṃtī nagarī ramyā muktidā sarvadehinām //
śivapriyā mahāpuṇyā vartate lokapāvanī

tatrāsīdbāhmaṇaśreṣṭhaśśubhakarmaparāyaṇaḥ //
vedādhyayanakarttā ca vedakarmaratassadā

agnyādhānasamāyuktaśśivapūjāratassadā //
pārthivīṃ pratyahaṃ mūrtiṃ pūjayāmāsa vai dvijaḥ

sarvakarmaphalaṃ prāpya dvijo vedapriyassadā//
satāṃ gatiṃ samālebhe samyagjñānaparāyaṇaḥ

tatputrāstādṛśāścāsaṃścatvāro munisattamāḥ //
śivapūjāratā nityaṃ pitroranavamāssadā

devapriyaśca tajjyeṣṭhaḥ priyamedhāstataḥ param//
tṛtīyastu kṛto nāma dharmavāhī ca suvrataḥ

teṣāṃ puṇyapratāpācca pṛthivyāṃ sukhamaidhata //
śuklapakṣe yathā candro varddhate ca niraṃtaram

tathā teṣāṃ guṇāstatra varddhante sma sukhāvahāḥ //
brahmatejomayī sā vai nagarī cābhavattadā

etasminnantare tatra yajjātaṃ vṛttamuttamam//
śrūyatāṃ taddvijaśreṣṭhāḥ kathayāmi yathāśrutam

parvate ratnamāle ca dūṣaṇākhyo mahāsuraḥ //
balavāndaityarājaśca dharmadveṣī nirantaram

brahmaṇo varadānācca jagatucchīcakāra ha//
devā parājitāstena sthānānnissāritāstathā

pṛthivyāṃ vedadharmāśca smṛtidharmāśca sarvaśaḥ //
sphoṭitāstena duṣṭena siṃheneva śaśā khalu

yāvaṃto vedadharmāśca tāvaṃto dūrataḥ kṛtāḥ //
tīrthetīrthe tathā kṣetre dharmo nītaśca dūrataḥ

avaṃtī nagarī ramyā tatraikā dṛśyate punaḥ //
itthaṃ vicārya tenaiva yatkṛtaṃ śrūyatāṃ hi tat

bahusainyasamāyukto dūṣaṇassa mahāsuraḥ //
tatrasthānbrahmaṇānsarvānuddiśya samupāyayau

tatrāgatya sa daityendraścaturo daityasattamān //
provācāhūya vacanaṃ vipra drohī mahākhalaḥ

daitya uvāca //
kimete brāhmaṇā duṣṭā na kurvaṃti vaco mama //
vedadharmaratā ete sarve daṃḍyā mate mama

sarve devā mayā loke rājānaśca parājitāḥ //
vaśe kiṃ brāhmaṇāśśakyā na kartuṃ daityasattamāḥ

yadi jīvitumicchā syāttadā dharmaṃ śivasya ca //
vedānāṃ paramaṃ dharmaṃ tyaktvā sukhasubhāginaḥ

anyathā jīvane teṣāṃ saṃśayaśca bhaviṣyati //
iti satyaṃ mayā proktaṃ tatkurudhvaṃ viśaṃkitāḥ

sūta uvāca //
iti niścitya te daityāścatvāraḥ pāvakā iva //
caturdikṣu tadā jātāḥ pralaye ca yathā purā / २५ //
te brāhmaṇāstathā śrutvā daityānāmudyamaṃ tadā //
na duḥkhaṃ lebhire tatra śivadhyāna parāyaṇāḥ

dhairyaṃ samāśritāste ca rekhāmātraṃ tadā dvijāḥ //
na celuḥ paramadhyānādvarākāḥ ke śivāgrataḥ

etasminnantare taistu vyāptāsīnnagarī śubhā //
lokāśca pīḍitāstaistu brāhmaṇānsamupāyayuḥ

lokā ūcuḥ //
svāminaḥ kiṃ ca karttavyaṃ duṣṭāśca samupāgatāḥ //
hiṃsitā bahavo lokā āgatāśca samīpataḥ

sūta uvāca //
teṣāmiti vacaśśrutvā vedapriyasutāśca te //
samūcurbrāhmaṇāstānvai viśvastāśśaṃkare sadā

brāhmaṇā ūcuḥ //
śrūyatāṃ vidyate naiva balaṃ duṣṭabhayāvaham//
na śastrāṇi tathā saṃti yacca te vimukhāḥ punaḥ

sāmānyasyāpamāno no hyāśrayasya bhavediha //
punaśca kiṃ samarthasya śivasyeha bhaviṣyati

śivo rakṣāṃ karotvadyāsurāṇāṃ bhayataḥ prabhuḥ //
nānyathā śaraṇaṃ loke bhaktavatsalataśśivāt

sūta uvāca //
iti dhairyaṃ samāsthāya samarcāṃ pārthivasya ca //
kṛtvā te ca dvijāḥ samyaksthitā dhyānaparāyaṇāḥ //
dṛṣṭā daityena tāvacca te viprāssabalena hi

dūṣaṇena vacaḥ proktaṃ hanyatāṃ vadhyatāmiti //
tacchrutaṃ taistadā naiva daityaproktaṃ vaco dvijaiḥ //
vedapriyasutaiśśaṃbhordhyānamārgaparāyaṇaiḥ

atha yāvatsa duṣṭātmā hantumaicchaddvijāṃśca tān//
tāvacca prārthivasthāne garttaṃ āsītsaśabdakaḥ

gartāttatassamutpannaḥ śivo vikaṭarūpadhṛk //
mahākāla iti khyāto duṣṭahaṃtā satāṃ gatiḥ

mahākālassamutpanno duṣṭānāṃ tvādṛśāmaham//
khala tvaṃ brāhmaṇānāṃ hi samīpāddūrato vraja

ityuktvā huṃkṛtenaiva bhasmasātkṛtavāṃstadā//
dūṣaṇaṃ ca mahākālaḥ śaṃkarassabalaṃ drutam

kiyatsainyaṃ hataṃ tena kiṃcitsainyaṃ palāyitam//
dūṣaṇaśca hatastena śiveneha parātmanā

sūryaṃ dṛṣṭvā yathā yāti saṃkṣayaṃ sarvaśastamaḥ //
tathaiva ca śivaṃ dṛṣṭvā tatsainyaṃ vinanāśa ha

devadundubhayo neduḥ puṣpavṛṣṭiḥ papāta ha//
devāssamāyayussarve haribrahmādayastathā

bhaktyā praṇamya taṃ devaṃ śaṃkaraṃ lokaśaṃkaram //
tuṣṭuvurvividhaiḥ stotraiḥ kṛtāṃjalipuṭā dvijāḥ

brāhmaṇāṃśca samāśvāsya suprasannaśśivassvayam //
varaṃ brūteti covāca mahākālo maheśvaraḥ

tacchrutvā te dvijāssarve kṛtāñjalipuṭāstadā //
supraṇamya śivaṃ bhaktyā procussaṃnatamastakāḥ

// dvijā ūcuḥ //
mahākāla mahādeva duṣṭadaṇḍakara prabho //
muktiṃ prayaccha naśśaṃbho saṃsārāṃbudhitaśśiva

atraiva lokarakṣārthaṃ sthātavyaṃ hi tvayā śiva //
svadarśakānnarāñchambho tāraya tvaṃ sadā prabho

sūta uvāca //
ityuktastaiśśivastatra tasthau garte suśobhane //
bhaktānāṃ caiva rakṣārthaṃ dattvā tebhyaśca sadgatim

dvijāste muktimāpannāścaturddikṣu śivāspadam //
krośamātraṃ tadā jātaṃ liṃgarūpiṇa eva ca

mahākāleśvaro nāma śivaḥ khyātaśca bhūtale //
taṃ dṛṣṭvā na bhavetsvapne kiṃcidduḥkhamapi dvijāḥ

yaṃyaṃ kāmamapekṣyaiva talliṃgaṃ bhajate tu yaḥ //
taṃtaṃ kāmamavāpnoti labhenmokṣaṃ paratra ca

etatsarvaṃ samākhyātaṃ mahākālasya suvratāḥ //
samudbhavaśca māhātmyaṃ kimanyacchrotumicchatha

iti śrīśivamahāpurāṇe caturthyāṃ koṭirudrasaṃhitāyāṃ mahākālajyotirliṃgamāhātmyavarṇanaṃ nāma ṣoḍaśo'dhyāyaḥ