Shiva Purana · Chapter 3.9

nandīśvara uvāca //
sanatkumāra sarvajña bhairavīmaparāṃ kathām //
śṛṇu prītyā mahādoṣasaṃhartrīmbhaktivarddhinīm

tatsānnidhyaṃ bhairavo'pi kālo'bhūtkālakālanaḥ //
sa devadevavākyena bibhratkāpālikaṃ vratam

kapālapāṇirviśvātmā cacāra bhuvanatrayam //
nātyākṣīccāpi taṃ devaṃ brahmahatyāpi dāruṇā

pratitīrthaṃ bhramanvāpi vimukto brahmahatyayā //
ataḥ kāmārimahimā sarvopi hyavagamyatām

pramathaiḥ sevyamāno'pi hyekadā viharanharaḥ //
kāpāliko yayau svairī nārāyaṇaniketanam

athāyāntaṃ mahākālaṃ trinetraṃ sarpakuṇḍalam //
mahādevāṃśasambhūtaṃ pūrṇākāraṃ ca bhairavam

papāta daṇḍavadbhūmau taṃ dṛṣṭvā garuḍadhvajaḥ //
devāśca munayaścaiva devanāryyaḥ samantataḥ

atha viṣṇuḥ praṇamyainaṃ prayātaḥ kamalāpatiḥ //
śirasyañjalimādhāya tuṣṭāva vividhaiḥ stavaḥ

sānando'tha hariḥ prāha prasannātmā mahāmune //
kṣīrodamathanodbhūtāṃ padmāṃ padmālayāṃ mudā

viṣṇuruvāca //
priye paśyābjanayane dhanyāsi subhage'naghe //
dhanyo'haṃ devi suśroṇi yatpaśyāvo jagatpatim

ayandhātā vidhātā ca lokānāṃ prabhurīśvaraḥ //
anādiḥ śaraṇaḥ śāntaḥ puraḥ ṣaḍviṃśasaṃmitaḥ

sarvajñaḥ sarvayogīśassarvabhūtaikanāyakaḥ //
sarvabhūtāntarātmāyaṃ sarveṣāṃ sarvadaḥ sadā

ye vinidrā viniśvāsāḥ śāntā dhyānaparāyaṇāḥ // /
dhiyā paśyaṃti hṛdaye soyaṃ padme samīkṣatām

yaṃ vidurvvedatattvajñā yogino yatamānasāḥ //
arūpo rūpavānbhūtvā so'yamāyāti sarvagaḥ

aho vicitraṃ devasya ceṣṭitamparameṣṭhinaḥ //
yasyākhyāṃ bruvato nityaṃ na dehaḥ so'pi dehabhṛt

taṃ dṛṣṭvā na punarjanma labhyate mānavairbhuvi //
soyamāyāti bhagavāṃstryambakaśśaśibhūṣaṇaḥ

puṇḍarīkadalāyāme dhanye me'dya vilocane //
yaddṛśyate mahādevo hyābhyāṃ lakṣmi maheśvaraḥ

dhigdhikpadantu devānāṃ paraṃ dṛṣṭvā na śaṃkaram //
labhyate yatra nirvāṇaṃ sarva duḥkhāntakṛttu yat

devatvādaśubhaṃ kiñciddevaloke na vidyate //
dṛṣṭvāpi sarve deveśaṃ yanmuktinna labhāmahe

evamuktvā hṛṣīkeśassaṃprahṛṣṭatanūruhaḥ //
praṇipatya mahādevamidamāha vṛṣadhvajam

viṣṇuruvāca //
kimidandevadevena sarvajñena tvayā vibho //
kriyate jagatāṃ dhātrā sarvapāpaharāvyaya

krīḍeyantava deveśa trilocana mahāmate //
kiṅkāraṇaṃ virūpākṣa ceṣṭitante smarārdana

kimarthaṃ bhagavañchambho bhikṣāñcarasi śaktipa //
saṃśayo me jagannātha eṣa trailokyarājyada

// nandīśvara uvāca //
evamuktastataḥ śambhurviṣṇunā bhairavo haraḥ //
pratyuvācādbhutotissa viṣṇuṃ hi vihasanprabhuḥ

// bhairava uvāca //
brahmaṇastu śiraśchinnamaṃgulyāgranakhena ha //
tadaghampratihantuṃ hi carāmyetadvrataṃ śubham

nandīśvara uvāca //
evamukto maheśena bhairaveṇa ramāpatiḥ //
smṛtvā kiṃcinnataśirāḥ punarevamajijñapat

// viṣṇuruvāca //
yathecchasi tathā krīḍa sarvavighnopanodaka //
māyayā māṃ mahādeva nācchādayitumarhasi

nābhīkamalakośāttu koṭiśaḥ kamalāsanāḥ//
kalpe kalpe purā hyānsatyaṃ yogabalādvibho

tyaja māyāmimāndeva dustarāmakṛtātmabhiḥ //
brahmādayo mahādeva māyayā tava mohitāḥ

yathāvadanugacchāmi ceṣṭitante śivāpate //
tavaivānugrahācchambho sarveśvara satāṃgate

saṃhārakāle saṃprāpte sadevānnikhilānmunīn //
lokānvarṇāśramavato hariṣyasi yadā hara

tadā kṛte mahādeva pāpaṃ brahmavadhādikam//
pāratantryaṃ na te śambho svairaṃ krīḍatyato bhavān

arghīva brahmaṇo hyasthnāṃ srakkaṇṭhe tava bhāsate//
tathādyanugatā śambho brahmahatyā tavānagha

kṛtvāpi sumahatpāpaṃ yastvāṃ smarati mānavaḥ //
ādhāraṃ jagatāmīśa tasya pāpaṃ vilīyate

yathā tamo na tiṣṭheta sannidhāvaṃśumālinaḥ //
tathaiva tava yo bhaktaḥ pāpantasya vrajetkṣayam

yaścintayati puṇyātmā tava pādāmbujadvayam//
brahmahatyākṛtamapi pāpantasya vrajetkṣayam

tava nāmānuraktā vāgyasya puṃso jagatpate //
apyadrikūṭatulitaṃ nainastamanubādhate

paramātmanparandhāma svecchābhidhṛtavigraha //
kutūhalaṃ taveśedaṃ kṛpaṇādhīnateśvara

adya dhanyo'smi deveśa yatra paśyaṃti yoginaḥ //
paśyāmi taṃ jaganmūrtti parameśvaramavyayam

adya me paramo lābhastvadya me maṃgalaṃ param //
taṃ dṛṣṭvāmṛta tṛptasya tṛṇaṃ svargāpavargakam

itthaṃ vadati goviṃde vimalā padmayā tayā//
manorathavatī nāma bhikṣā pātre samarpitā

bhikṣāṭanāya devo'pi niragātparayā mudā//
anyatrāpi mahādevo bhairavaścāttavigrahaḥ

dṛṣṭvānuyāyinīṃ tāntu samāhūya janārdanaḥ //
saṃprārthayadbrahmahatyāṃ vimuṃca tvaṃ triśūlinam

// brahmahatyovāca //
anenāpi miṣeṇāhaṃ saṃsevyāmuṃ vṛṣadhvajam //
ātmānampāvayiṣyāmi tvapunarbhavadarśanam

nandīśvara uvāca //
sā tatyāja na tatpārśvaṃ vyāhṛtāpi murāriṇā //
tamūce'tha hariṃ śaṃbhuḥ smerāsyo bhairavo vacaḥ

bhairava uvāca //
tvadvākpīyūṣapānena tṛpto'smi bahumānada //
svabhāvo'yaṃ hi sādhūnāṃ yattvaṃ vadasi māpate

varaṃ vṛṇīṣva goviṃda varado'smi tavānagha //
agraṇīrmama bhaktānāṃ tvaṃ hare nirvikāravān

no mādyanti tathā bhaikṣyairbhikṣavo'pyatisaṃskṛtaiḥ//
yathā mānasudhāpānairnanu bhikṣāṭanajvarāḥ

nandīśvara uvāca //
ityākarṇya vacaḥ śaṃbho bhairavasya parātmanaḥ //
suprasannataro bhūtvā samavocanmaheśvaram

viṣṇuruvāca //
eṣa eva varaḥ ślāghyo yadahaṃ dektādhipam //
paśyāmi tvāndevadeva manovāṇī pathātigam

adabhreyaṃ sudhādṛṣṭiranayā me mahotsavaḥ //
ayattnanidhilābhoyaṃ vīkṣaṇaṃ hara te satām

aviyogo'stu me deva tvadaṃghriyugalena vai //
eṣa eva varaḥ śaṃbho nānyaṃ kaścid vṛṇe varam

śrībhairavī uvāca //
evambhavatu te tāta yattvayoktaṃ mahāmate //
sarveṣāmapi devānāṃ varadastvaṃ bhaviṣyasi

nandīśvara uvāca //
anugṛhyeti daityāri keṃdrādribhuvanecaram //
bheje vimuktanagarīṃ nāmnā vārāṇasīṃ purīm

kṣetre praviṣṭamātre'tha bhairave bhīṣaṇākṛtau //
hāhetyuktvā brahmahatyā pātālaṃ cāviśattadā

kapālaṃ brāhmaṇaḥ sadyo bhairavasya karāṃbujāt //
papāta bhuvi tattīrthamabhūtkāpālamocanam

kapālaṃ brahmaṇo rudrassarveṣāmeva paśyatām //
hastātpatantamālokya nanarta parayā mudā

vidheḥ kapālaṃ nāmuṃcatkaramatyantadussaham //
parasya bhramataḥ kvāpi tatkāśyāṃ kṣaṇato'patat

śūlino brahmaṇo hatyā nāpaiti sma ca yā kvacit //
sā kāśyāṃ kṣaṇato naṣṭā tasmātsevyā hi kāśikā

kapālamocanaṃ kāśyāṃ yaḥ smarettīrthamuttamam//
ihānyatrāpi yatpāpaṃ kṣipraṃ tasya praṇaśyati

āgatya tīrthapravare snānaṃ kṛtvā vidhānataḥ //
tarpayitvā pitṝndevānmucyate brahmahatyayā

kapālamocanaṃ tīrthaṃ puraskṛtvā tu bhairavaḥ //
tatraiva tasthau bhaktānāṃ bhakṣayannaghasantatim

kṛṣṇāṣṭamyāntu mārgasya māsasya parameśvaraḥ //
āvirbabhūva sallīlo bhairavātmā satāmpriyaḥ

mārgaśīrṣāsitāṣṭamyāṃ kālabhairavasannidhau //
upoṣya jāgaraṃ kurvanmahāpāpaiḥ pramucyate

anyatrāpi naro bhaktyā tadvrataṃ yaḥ kariṣyati //
sa jāgaraṃ mahāpāpairmukto yāsyati sadgatim

anekajanmaniyutairyatkṛtaṃ jantubhistvagham //
tatsarvaṃ vilayaṃ yāti kālabhairavadarśanāt

kālabhairavabhaktānāṃ pātakāni karoti yaḥ //
sa mūḍho duḥkhito bhūtvā punardurgatimāpnuyāt

viśveśvare'pi ye bhaktā no bhaktāḥ kālabhairave //
te labhante mahāduḥkhaṃ kāśyāṃ caiva viśeṣataḥ

vārāṇasyāmuṣitvā yo bhairavaṃ na bhajennaraḥ //
tasya pāpāni varddhante śuklapakṣe yathā śaśī

kālarājaṃ na yaḥ kāśyāṃ pratibhūtāṣṭamīkujam //
bhajettasya kṣayaṃ puṇyaṃ kṛṣṇapakṣe yathā śaśī

śrutvākhyānamidampuṇyambrahmahatyāpanodakam //
bhairavotpattisaṃjñaṃ ca sarvapāpaiḥ pramucyate

bandhanāgārasaṃstho'pi prāpto'pi vipadamparām //
prādurbhāvaṃ bhairavasya śrutvā mucyeta saṅkaṭāt

iti śrīśivamahāpurāṇe tṛtīyāyāṃśata rudrasaṃhitāyāṃ bhairavāvatāralīlāvarṇanaṃ nāma navamo'dhyāyaḥ