Shiva Purana · Chapter 3.10

naṃdīśvara uvāca //
vidhvaṃsī dakṣayajñasya vīrabhadrāhvayaḥ prabho //
avatāraśca vijñeyaḥ śivasya paramātmanaḥ

satīcaritre kathitaṃ caritaṃ tasya kṛtsnaśaḥ //
śrutaṃ tvayāpi bahudhā nātaḥ proktaṃ suvistarāt

ataḥ paraṃ muniśreṣṭha bhavatsnehādbravīmi tat//
śārdūlākhyāvatāraṃ ca śaṅkarasya prabhoḥ śṛṇu

sadāśivena devānāṃ hitārthaṃ rūpamadbhutam//
śārabhaṃ ca dhṛtandivyaṃ jvalajjvālāsamaprabham

śivāvatārā amitā sadbhaktahitakārakāḥ //
saṅkhyā na śakyate kartuṃ teṣāṃ ca munisattamāḥ

ākāśasya ca tārāṇāṃ reṇukānāṃ kṣitestathā //
āsārāṇāṃ ca vṛddhena bahukalpaiḥ kadāpi hi

saṅkhyā viśakyate kartuṃ suprājñairbahujanmabhiḥ //
śivāvatārāṇāṃ naiva satyaṃ jānīhi madvacaḥ

tathāpi ca yathābuddhyā kathayāmi kathāśrutam//
caritraṃ śārabhaṃ divyaṃ paramaiśvaryyasūcakam

jayaśca vijayaścaiva bhavadbhiḥ śāpitau yadā //
tadā ditisutau dvau tāvabhūtāṃ kaśyapānmune

hiraṇyakaśipuścādyo hiraṇyākṣo'nujo balī //
devarṣipārṣadau jātau tau dvāvapi ditessutau

pṛthvyuddhāre vidhātrā va prārthito hi purā prabhuḥ //
hiraṇyākṣaṃ jaghānāsau viṣṇurvārāharūpadhṛk //१ १//
taṃ śrutvā bhrātaraṃ vīraṃ nihataṃ prāṇasannibham //
cukopa haraye'tīva hiraṇyakaśipurmune

varṣāṇāmayutaṃ taptvā brahmaṇo varamāpa saḥ //
na kaścinmārayenmāṃ vai tvatsṛṣṭāviti tuṣṭataḥ

śoṇitākhyapuraṃ gatvā devānāhūya sarvataḥ //
trilokīṃ svavaśe kṛtvā cakre rājyamakaṇṭakam

devarṣikadanaṃ cakre sarvadharma vilopakaḥ //
dvijapīḍākaraḥ pāpī hiraṇyakaśipurmune

prahlādena svaputreṇa haribhaktena daityarāṭ //
yadā vidveṣamakaroddharirvairaṃ viśeṣataḥ

sabhāstambhāttadā viṣṇurabhūdāvirdrutammune //
sandhyāyāṃ krodhamāpanno nṛsiṃhavapuṣā tataḥ

sarvathā muniśārdūla karālaṃ nṛharervvapuḥ //
prajajvālātibhayadaṃ trāsayandaityasattamān

nṛsiṃhena tadā daityā nihatāścaiva tatkṣaṇam //
hiraṇyakaśipuścātha yuddhañcakre sudāruṇam

mahāyuddhaṃ tayorāsīnmuhūrttammunisattamāḥ //
vikarālaṃ ca bhayadaṃ sarveṣāṃ romaharṣaṇam

sāyaṃ cakarṣa deveśo dehalyāṃ daityapuṅgavam //
vyomni deveṣu paśyatsu nṛsiṃhaśca rameśvaraḥ

athotsaṃge ca taṃ kṛtvā nakhaistadudarandrutam //
vidārya mārayāmāsa paśyatāṃ tridivaukasām

hate hiraṇyakaśipau nṛsiṃhe naiva viṣṇunā//
jagatsvāsthyantadā lebhe na vai devāviśeṣataḥ

devadundubhayo neduḥ prahlādo vismayaṃ gataḥ//
lakṣmīśca vismayaṃ prāptā rūpaṃ dṛṣṭvā'dbhutaṃ hareḥ

hato yadyapi daityendrastathāpi na puraṃ sukham //
yayurdevā nṛsiṃhasya jvālā sā na nivartitā

tayā ca vyākulaṃ jātaṃ sarvaṃ caiva jagatpunaḥ //
devāśca duḥkhamāpannāḥ kimbhaviṣyati vā punaḥ

ityevaṃ ca vadantaste bhayādūdūramupasthi tāḥ //
nṛsiṃhakrodhajajvālāvyākulāḥ padmabhūmukhāḥ

prahrādaṃ preṣayāmāsustacchāntyai nikaṭaṃ hareḥ //
sarvānmilitvā prahlādaḥ prārthito gatavāṃstadā

urasā''liṃgayāmāsa taṃ nṛsiṃhaḥ kṛpānidhiḥ //
hṛdayaṃ śītalaṃ jātaṃ ruḍjvālā na nivarttitā

tathāpi na nivṛtā ruḍjvālā narahareryadā //
iṣṭaṃ prāptāstato devāśśaṃkara śaraṇaṃ yayuḥ

tatra gatvā surāssarve brahmādyā munaya stathā //
śaṃkaraṃ stavayāmāsurlokānāṃ sukhahetave

devā ūcuḥ //
devadeva mahādeva śaraṇāgatavatsala //
pāhi naḥ śaraṇāpannā nsarvāndevāñjaganti ca

namaste'stu namaste'stu namaste'stu sadāśiva //
pūrvaṃ duḥkhaṃ yadā jātaṃ tadā te rakṣitā vayam

samudro mathitaścaiva ratnānāṃ ca vibhāgaśaḥ //
kṛte devaistadā śaṃbho gṛhītaṃ garalantvayā

rakṣitāḥ sma tadā nātha nīlakaṇṭha iti śrutaḥ //
viṣaṃ pāsyasi no cettvaṃ bhasmībhūtāstadākhilāḥ

prasiddhaṃ ca yadā yasya duḥkhaṃ ca jāyate prabho //
tadā tvannāmamātreṇa sarvaduḥkhaṃ vilīyate

idānīṃ nṛharijvālāpīḍitānnassadāśiva //
tāṃ tvaṃ śamayituṃ deva śakto'sīti suniścitam

nandīśvara uvāca //
iti stutastadā devaiśśaṃkaro bhaktavatsalaḥ //
pratyuvāca prasannātmā'bhayandattvā paraprabhuḥ

śaṃkara uvāca //
svasthānaṃ gacchata surāssarvve brahmādayo'bhayāḥ //
śamayiṣyāmi yadduḥkhaṃ sarvathā hi vratammama

gato maccharaṇaṃ yastu tasya duḥkhaṃ kṣayaṃ gatam //
matpriyaḥ śaraṇāpannaḥ prāṇebhyo'pi na saṃśayaḥ

nandīśvara uvāca//
iti śrutvā tadā devā hyānandamparamaṃ gatāḥ //
yathāgataṃ tathā jagmussmarantaśśaṃkaraṃ mudā

iti śrīśivamahāpurāṇe tṛtīyāyāṃ śatarudrasaṃhitāyāṃ śārdūlāvatāre nṛsiṃhacaritavarṇanaṃ nāma daśamo'dhyāyaḥ