Shiva Purana · Chapter 3.3

nandīśvara uvāca
śṛṇu tāta mahāprājña vidhikāmaprapūrakam //
arddhanārīnarākhyaṃ hi śivarūpamanuttamam

yadā sṛṣṭāḥ prajā sarvāḥ na vyavarddhaṃta vedhasā //
tadā ciṃtākulo'bhūtsa tena duḥkhena dukhitaḥ

nabhovāṇī tadābhūdvai sṛṣṭiṃ mithunajāṃ kuru //
tacchrutvā maithunīṃ sṛṣṭiṃ brahmā kartumamanyata

nārīṇāṃ kulamīśānānnirgataṃ na purā yataḥ //
tato maithunajāṃ sṛṣṭiṃ kartuṃ śeke na padmabhūḥ

prabhāveṇa vinā śaṃbhorna jāyerannimāḥ prajāḥ //
evaṃ saṃcintayanbrahmā tapaḥ karttuṃ pracakrame

śivayā parayā śaktyā saṃyuktaṃ parameśvaram //
saṃciṃtya hṛdaye prītyā tepe sa paramaṃ tapaḥ

tīvreṇa tapasā tasya saṃyuktasya svayaṃbhuvaḥ //
acireṇaiva kālena tutoṣa sa śivo drutam

tataḥ pūrṇacidīśasya mūrtimāviśya kāmadām//
arddhanārīnaro bhūtvā tato brahmāntikaṃ haraḥ

taṃ dṛṣṭvā śaṃkaraṃ devaṃ śaktyā praramayānvitam //
praṇamya daṇḍavadbrahmā sa tuṣṭāva kṛtāñjaliḥ

atha devo mahādevo vācā meghagabhīrayā//
saṃbhavāya susaṃprīto viśvakarttā maheśvaraḥ

īśvara uvāca//
vatsavatsa mahābhāga mama putra pitāmaha //
jñātavānasmi sarva tattattvataste manoratha

prajānāmeva vṛddhyarthaṃ tapastaptaṃ tvayādhunā //
tapasā tena tuṣṭo'smi dadāmi ca tavepsitam

ityuktvā paramodāraṃ svabhāvamadhuraṃ vacaḥ//
pṛthakcakāra vapuṣo bhāgāddevīṃ śivāṃ śivaḥ

tāṃ dṛṣṭvā paramāṃ śaktiṃ pṛthagbhūtāṃ śivāgatām//
praṇipatya vinītātmā prārthayāmāsa tāṃ vidhiḥ

brahmovāca //
devadevena sṛṣṭohamādau tvatpatinā śive //
prajāḥ sarvā niyuktāśca śaṃbhunā paramātmanā

manasā nirmitāḥ sarve śive devādayo mayā //
na vṛddhimupagacchaṃti sṛjyamānāḥ punaḥpunaḥ

mithunaprabhavāmeva kṛtvā sṛṣṭimataḥ param //
saṃvarddhayitumicchāmi sarvā eva mama prajāḥ

na nirgataṃ purā tvatto nārīṇāṃ kulamavyayam //
tena nārīkulaṃ śreṣṭhaṃ mama śaktirna vidyate

sarvāsāmeva śaktīnāṃ tvattaḥ khalu samudbhavaḥ //
tasmāttvaṃ paramāṃ śaktiṃ prārthayāmyakhileśvarīm

śive nārīkulaṃ sraṣṭuṃ śaktiṃ dehi namo'stu te //
carācaraṃ jagadviddhi hetormātaḥ śivaṃ priye

anyaṃ tvattaḥ prārthayāmi varaṃ ca varadeśvari //
dehi me taṃ kṛpāṃ kṛtvā jaganmātarnamo'stu te

carācaravivṛddhyarthamīśenaikena sarvage //
dakṣasya mama putrasya putrī bhava bhavāmbike

evaṃ saṃyācitā devī brahmaṇā parameśvarī //
tathāstviti vacaḥ procya tacchaktiṃ vidhaye dadau

tasmāddhi sā śivā devī śivaśaktirjaganmayī //
śaktimekāṃ bhruvormadhyātsasarjātmasamaprabhām

tāmāha prahasanprekṣya śaktiṃ devavaro haraḥ //
kṛpāsindhurmaheśāno līlākārī bhavāmbikām

śiva uvāca //
tapasārādhitā devi brahmaṇā parameṣṭhinā //
prasannā bhava suprītyā kuru tasyākhilepsitam

tāmājñāṃ parameśasya śirasā pratigṛhya sā //
brahmaṇo vacanāddevī dakṣasya duhitābhavat

dattvaivamatulāṃ śaktiṃ brahmaṇo sā śivā mune //
viveśa dehaṃ śaṃbhorhi śaṃbhuścāntardadhe prabhuḥ

tadāprabhṛti loke'sminstriyā bhāgaḥ prakalpitaḥ //
ānandaṃ prāpa sa vidhiḥ sṛṣṭirjātā ca maithunī

etatte kathitaṃ tāta śivarūpaṃ mahottamam //
arddhanārīnarārddhaṃ hi mahāmaṃgaladaṃ satām

etadākhyānamanaghaṃ yaḥ paṭhcchṛṇuyādapi //
sa bhuktvā sakalānbhogānprayāti paramāṃ gatim

iti śrīśivamahāpurāṇe tṛtīyāyāṃ rudrasaṃhitāyāṃ śivasyārddhanārīnarāvatāravarṇanaṃ nāma tṛtīyo'dhyāyaḥ