Shiva Purana · Chapter 3.2

// nandīśvara uvāca //
śṛṇu tāta maheśasyāvatārānparamānprabho //
sarvakāryakarām̐lloke sarvasya sukhadānmune

tasya śaṃbhoḥ pareśasya mūrtyaṣṭakamayaṃ jagat //
tasminvyāpya sthitaṃ viśvaṃ sūtre maṇigaṇā iva

śarvo bhavastathā rudra ugro bhīmaḥ paśo patiḥ //
īśānaśca mahādevo mūrtayaścāṣṭa viśrutāḥ

bhūmyaṃbhognimarudvyomakṣetrajñārkaniśākarāḥ //
adhiṣṭhitāśca śarvādyairaṣṭarūpaiḥ śivasya hi

dhatte carācaraṃ viśvaṃ rūpaṃ viśvaṃbharātmakam //
śaṃkarasya maheśasya śāstrasyaiveti niścayaḥ

saṃjīvanaṃ samastasya jagataḥ salilātmakam //
bhava ityucyate rūpaṃ bhavasya paramātmanaḥ

bahiraṃtarjagadviśvaṃ bibharti spandatesya yam //
ugra ityucyate sadbhī rūpamugrasya satprabho

sarvāvakāśadaṃ sarvavyāpakaṃ gaganātmakam //
rūpaṃ bhīmasya bhīmākhyaṃ bhūpavṛndasva bhedakam

sarvātmanāmadhiṣṭhānaṃ sarvakṣetranivāsakam //
rūpaṃ paśupaterjñeyaṃ paśupāśanikṛntanam

sandīpayañjagatsarvaṃ divākarasamāhvayam //
īśānākhyaṃ maheśasya rūpaṃ divi visarpati

āpyāyayati yo viśvamamṛtāṃśurniśākaraḥ //
mahādevasya tadrūpaṃ mahādevasya cāhvayam

ātmā tasyāṣṭamaṃ rūpaṃ śivasya paramātmanaḥ //
vyāpiketaramūrtīnāṃ viśvaṃ tasmācchivātmakam

śākhāḥ puṣyanti vṛkṣasya vṛkṣamūlasya secanāt //
tadvadasya vapurviśvaṃ puṣyate ca śivārcanāta

yatheha putrapautrādeḥ prītyā prīto bhavetpitā //
tathā viśvasya samprītyā prīto bhavati śaṃkaraḥ

kriyate yasya kasyāpi dehino yadi nigrahaḥ //
aṣṭamūrtteraniṣṭaṃ tatkṛtameva na saṃśayaḥ

aṣṭamūrtyātmanā viśvamadhiṣṭhāyāsthitaṃ śivam //
bhajasva sarvabhāvena rudraṃ paramakāraṇam

iti proktāḥ svarūpāste vidhiputrāṣṭaviśrutāḥ //
sarvopakāraniratāḥ sevyāḥ śreyorthibhirnaraiḥ

iti śrīśivamahāpurāṇe tṛtīyāyāṃ śatarudrasaṃhitāyāṃ śivāṣṭamūrttivarṇanaṃ nāma dvitīyo'dhyāyaḥ