Shiva Purana · Chapter 3.4

nandīśvara uvāca //
sanatkumāra sarvajña caritaṃ śāṃkaraṃ mudā //
rudreṇa kathitaṃ prītyā brahmaṇe sukhadaṃ sadā

śiva uvāca //
saptame caiva vārāhe kalpe manvantarābhidhe //
kalpeśvaro'tha bhagavānsarvaṃ lokaprakāśanaḥ

marnorvaivasvatasyaiva te praputro bhaviṣyati//
tadā caturyugāścaiva tasminmanvantare vidhe

anugrahārthaṃ lokānāṃ brāhmaṇānāṃ hitāya ca//
utpaśyāmi vidhe brahmandvāparākhyayugāntike

yugapravṛttyā ca tadā tasmiṃśca prathame yuge //
dvāpare prathame brahmanyadā vyāsaḥ svayaṃprabhuḥ

tadāhaṃ brāhmaṇārthāya kalau tasminyugāntike//
bhaviṣyāmi śivāyuktaḥ śveto nāma mahāmuniḥ

himavacchikhare ramye chāgale parvatottame//
tadā śiṣyāḥ śikhāyuktā bhaviṣyanti vidhe mama

śvetaḥ śvetaśikhaścaiva śvetāśvaḥ śvetalohitaḥ //
catvāro dhyānayogātte gamiṣyanti puraṃ mama

tato bhaktā bhaviṣyanti jñātvā māṃ tattvato'vyayam//
janmamṛtyujarāhīnāḥ parabrahmasamādhayaḥ

draṣṭuṃ śakyo narairnāhamṛte dhyānātpitāmaha //
dānadharmādibhirvatsa sādhanaiḥ karmahetubhiḥ

dvitīye dvāpare vyāsaḥ satyo nāma prajāpatiḥ //
yadā tadā bhaviṣyāmi sutāro nāmataḥ kalau

tatrāpi me bhaviṣyanti śiṣyā vedavido dvijāḥ //
dundubhiḥ śatarūpaśca hṛṣīkaḥ ketumāṃstathā

catvāro dhyānayogātte gamiṣyanti puraṃ mama //
tato muktā bhaviṣyanti jñātvā māṃ tattvato'vyayam

tṛtīye dvāpare caiva yadā vyāsastu bhārgavaḥ //
tadāpyahaṃ bhaviṣyāmi damanastu purāntike

tatrāpi ca bhaviṣyanti catvāro mama putrakāḥ //
viśokaśca viśeṣaśca vipāpaḥ pāpanāśanaḥ

śiṣyaiḥ sāhāyyaṃ vyāsasya kariṣye caturānana //
nivṛttimārgaṃ sudṛḍhaṃ varttayiṣye kalāviha

caturthe dvāpare caiva yadā vyāsoṃ'girāḥ smṛtaḥ //
tadāpyahaṃ bhaviṣyāmi suhotro nāma nāmataḥ

tatrāpi mama te putrāścatvāro yogasādhakāḥ //
bhaviṣyaṃti mahātmānastannāmāni bruve vidhe

sumukho durmukhaścaiva dudarbho duratikramaḥ //
śiṣyaiḥ sāhāyyaṃ vyāsasya kariṣye'haṃ tadā vidhe

pañcame dvāpare caiva vyāsastu savitā smṛtaḥ //
tadā yogī bhaviṣyāmi kaṃko nāma mahātapāḥ

tatrāpi mama te putrāścatvāro yogasādhakāḥ //
bhaviṣyanti mahātmānastannāmāni śṛṇuṣva me

sanakaḥ sanātanaścaiva prabhuryaśca sanandanaḥ //
vibhuḥ sanatkumāraśca nirmalo nirahaṃkṛtiḥ

tatrāpi kaṃkanāmāhaṃ sāhāyyaṃ saviturvidhe //
vyāsasya hi kariṣyāmi nivṛttipathavarddhakaḥ

parivarte punaḥ ṣaṣṭhe dvāpare lokakārakaḥ //
kartā vedavibhāgasya mṛtyurvyāso bhaviṣyati

tadā'pyahaṃ bhaviṣyāmi lokākṣirnāma nāmataḥ //
vyāsasya susāhā yyārthaṃ nivṛttipathavarddhanaḥ

tatrāpi śiṣyāścatvāro bhaviṣyanti dṛḍhavratāḥ //
sudhāmā virajāścaiva saṃjayo vijayastathā

saptame parivarte tu yadā vyāsaḥ śatakratuḥ //
tadāpyahaṃ bhaviṣyāmi jaigīṣavyo vibhurvidhe

yogaṃ saṃdraḍhayiṣyāmi mahāyogavicakṣaṇaḥ //
kāśyāṃ guhāntare saṃstho divyadeśe kuśāstariḥ

sāhāyyaṃ ca kariṣyāmi vyāsasya hi śatakratoḥ //
uddhariṣyāmi bhaktāṃśca saṃsārabhayato vidhe

tatrāpi mama catvāro bhaviṣyanti sutā yuge //
sārasvataśca yogīśo meghavāhaḥ suvāhanaḥ

aṣṭame parivarte hi vasiṣṭho munisattamaḥ //
karttā vedavibhāgasya vedavyāso bhaviṣyati

tatrāpyahaṃ bhaviṣyāmi nāmato dadhivāhanaḥ //
vyāsasya hi kariṣyāmi sāhāyyaṃ yogavittama

kapilaścāsuriḥ pañcaśikhaḥ śālvalapūrvakaḥ //
catvāro yoginaḥ putrā bhaviṣyanti samā mama

navame parivarte tu tasminneva yuge vidhe //
bhaviṣyati muniśreṣṭho vyāsaḥ sārasvatāhvayaḥ

vyāsasya dhyāyatastasya nivṛttipathavṛddhaye //
tadāpyahaṃ bhaviṣyāmi ṛṣabho nāmataḥ smṛtaḥ

parāśaraśca gargaśca bhārgavo giriśastathā //
catvārastatra śiṣyā me bhaviṣyanti suyoginaḥ

taiḥ sākaṃ draḍhayiṣyāmi yogamārgaṃ prajāpate //
kariṣyāmi sāhāyyaṃ vai vedavyāsasya sanmune

tena rūpeṇa bhaktānāṃ bahūnāṃ duḥkhināṃ vidhe //
uddhāraṃ bhavato'haṃ vai kariṣyāmi dayākaraḥ

so'vatāro vidhe me hi ṛṣabhākhyassuyogakṛt //
sārasvatavyāsamanaḥ karttā nānotikārakaḥ

avatāreṇa me yena bhadrāyurnṛpabālakaḥ //
jīvito hi mṛtaḥ kṣveḍadoṣato janakojjhitaḥ

prāpte'tha ṣoḍaśe varṣe tasya rājaśiśoḥ punaḥ //
yayau tadveśma sahasā ṛṣabhaḥ sa madātmakaḥ

pūjitastena sa muniḥ sadrūpaśca kṛpānidhiḥ //
upādideśa taddharmānrājyayogānprajāpate

tataḥ sa kavacaṃ divyaṃ śaṃkhaṃ khaṅgaṃ ca bhāsvaram //
dadau tasmai prasannātmā sarvaśatruvināśanam

tadaṅga bhasmanāmṛśya kṛpayā dīnavatsalaḥ //
sa dvādaśasahasrasya gajānāṃ ca balaṃ dadau

iti bhadrāyuṣaṃ samyaganuśvāsya samātṛkam//
yayau svairagatastasyāṃ pūjitastvṛṣabhaḥ prabhuḥ

bhadrāyurapi rājarṣirjitvā ripugaṇānvidhe //
rājyaṃ cakāra dharmeṇa vivāhya kīrttimālinīm

itthaṃ prabhāvaṃ ṛṣabho'vatāraḥ śaṅkarasya me //
satāṃ gatirdīnabandhurnavamaḥ kathitastava

ṛṣabhasya caritraṃ hi paramaṃ pāvanaṃ mahat //
svargyaṃ yaśasyamāyuṣyaṃ śrotavyaṃ ca prayatnataḥ

iti śrīśivamahāpurāṇe tṛtīyāyāṃ śatarudrasaṃhitāyāmṛṣabhacaritravarṇanaṃ nāma caturtho'dhyāyaḥ